Reviews for செம்மாரி

பாரம்பரிய ஆடு புலியாட்டத்தின் நுணுக்கங்களை அறிமுகப்படுத்தும் எளிய, விறுவிறுப்பான கதை. காட்சிகள், இடங்கள், நிகழ்வுகளின் விரிவான விவரிப்பும் சுலபமான தமிழ் நடையும் வாசிப்புக்கு உதவுகின்றன. எதிரிகளைச் சமாளிக்க செம்மாரி வகுக்கும் உத்திகள் குறிப்பாக ஈர்க்கின்றன. இறுதி அத்தியாயத்தில் வழிகாட்டி கதையை விளக்கும் விதமும் நன்றாக அமைந்துள்ளது.

மெதுவாகத் தொடங்கும் கதை, இறுதிப் பகுதியில் தொடர்ந்து படிக்கத் தூண்டும் அளவுக்கு விறுவிறுப்பாகிறது. ஆடு புலியாட்டத்துக்கும் பாத்திரங்களுக்கும் உள்ள தொடர்பே தனிச்சிறப்பு. ஆனால் எழுத்துப் பிழைகள் அதிகம்; பாத்திர வளர்ச்சியும் போதவில்லை. நதியாள் வழக்கமான தமிழ்க் கதாநாயகியாகவே தோன்றுகிறாள். சில நிகழ்வுகள் ஊகிக்க முடிகின்றன; முடிவும் அவசரமாக அமைந்துள்ளது. இந்தக் குறைகள் இருந்தாலும் சுவாரஸ்யமான சாகசக் கதை.

ஆடு புலியாட்டத்தை மையப்படுத்திய சுவாரஸ்யமான கதைக்களம்; புதிய எழுத்தாளரின் முயற்சி பாராட்டத்தக்கது. ஆனால் சிறுவர் கதைபோன்ற தொடக்கம், பல இடங்களில் எடுபடாத எதுகைமோனை நகைச்சுவை, எழுத்துப் பிழைகள் ஆகியவை குறைகள். ஆசிரியர் இடையில் குறுக்கிட்டுப் பேசுவதும், கதை நிகழும் இடத்துக்குப் பொருந்தாத வட்டார வழக்கும் ஓட்டத்தைப் பாதிக்கின்றன. மாமல்லபுரம் என்ற பெயரைப் பயன்படுத்தியிருக்கலாம். சில பகுதிகள் இழுத்தாலும், மொத்தக் கதை அமைப்பு நன்றாக உள்ளது.

பழமையான ஆடு புலியாட்டத்தை வாழ்வின் நெருக்கடிகளுடன் இணைத்துக் கதையை அமைத்த விதம் சிறப்பு. செம்மாரியின் அறிவை மையப்படுத்தும் கதைக்களமும், நன்றாக உருவாக்கப்பட்ட பாத்திரங்களும் ஈர்க்கின்றன. எளிய, தெளிவான மொழியில் கதை வேகமாக நகர்கிறது. சில இடங்களில் விளையாட்டைப் பற்றிய விளக்கம் தேவைக்கு அதிகமாக இருப்பதே குறை. மற்றபடி தொடர்ந்து படிக்கத் தூண்டும், பரிந்துரைக்கத்தக்க நாவல்.

பொன்னியின் செல்வன், சிவகாமியின் சபதம் போன்ற வரலாற்றுப் பயணத்தை எதிர்பார்த்தால் ஏமாற்றமே மிஞ்சுகிறது. ஆடு புலியாட்ட விதிகளைத் தவிர மற்ற பகுதிகள் சலிப்பூட்டுகின்றன. உணர்ச்சிகளைச் சொல்லப் பயன்படுத்திய சொற்கள் செயற்கையாகத் தோன்றி, காட்சிகளின் உணர்வைக் கடத்தத் தவறுகின்றன. இந்த எழுத்துநடை ஈர்க்கவில்லை.

ஆடு புலியாட்டத்தைச் சுற்றி அமைந்த கதையில் திருப்பங்கள் தர்க்கம் குலையாமல் ஒன்றோடொன்று பொருந்துகின்றன. எளிய சொற்களில் பழங்காலச் சூழலைக் கொண்டுவந்ததும், செம்மாரியின் அறிவார்ந்த திட்டங்களை வடிவமைத்ததும் சிறப்பு. சாதியோ தொழிலோ திறமைக்குத் தடையல்ல என்ற கருத்தும் கதையோடு இணைகிறது. இறுதிப் பகுதியில் திட்டங்களின் பின்னணியை விளக்கும் விதம் வியப்பளிக்கிறது. விளையாட்டையே முயன்று பார்க்கத் தூண்டும், தமிழ் வாசகர்கள் படிக்க வேண்டிய நாவல்.

குழந்தைகளுடன் சேர்ந்து படித்து மகிழ ஏற்ற கதைக்களமும், எதிர்பாராத திருப்பங்களும் இந்நாவலின் சிறப்புகள். எளிய பொதுத்தமிழ் நடை வாசிப்பைச் சுலபமாக்குகிறது. எத்தனை தடைகள் வந்தாலும் சமாளிக்கலாம் என்ற நம்பிக்கையையும், தவறான வழியைத் தவிர்த்துப் பெறுவதே உண்மையான வெற்றி என்ற கருத்தையும் கதை வலியுறுத்துகிறது. குழந்தைகளும் அணுகக்கூடிய இத்தகைய தமிழ்ப் படைப்புகள் மேலும் வரவேண்டும் என்ற விருப்பத்தை ஏற்படுத்துகிறது.

ஆடு புலியாட்டத்தை மையமாகக் கொண்ட எளிய வரலாற்றுக் கதை, தொடக்கம் முதல் சலிப்பின்றி நகர்கிறது. உடல் வலிமையைவிட செம்மாரியின் அறிவுக்கு முக்கியத்துவம் கொடுத்திருப்பது சிறப்பு. பாத்திரங்கள் கண்முன் நிற்கும் வகையில் சித்தரிக்கப்பட்டுள்ளன. விளையாட்டைப் பற்றியும் அறிமுகம் தரும் இந்த நூல், விறுவிறுப்பான வரலாற்றுக் கதைகளை விரும்புவோருக்குப் பரிந்துரைக்கத்தக்கது.

பழமையான ஆடு புலியாட்டத்தை மீண்டும் அறிமுகப்படுத்தும் முயற்சி பாராட்டத்தக்கது. முதல் படைப்புக்குரிய தடுமாற்றங்கள் தெரிந்தாலும், எதிர்பாராத திருப்பங்களுடன் கதை எளிமையாக நகர்கிறது. சிக்கலற்ற கதைசொல்லல் என்பதால் வாசிப்பைத் தொடங்கும் இளம் வாசகர்களுக்கு ஏற்ற நூலாக அமைகிறது.

படித்து மகிழக்கூடிய நூல்.