Reviews for மறக்கவே நினைக்கிறேன்

செல்வம் அண்ணா என்று கூடப் பிறந்த தம்பி போலக் கூப்பிட வேண்டும் என்ற ஆசையை உண்டாக்கிவிட்டது இந்தப் புத்தகம். அந்த அளவுக்கு நெருக்கமான உணர்வைத் தருகிறது மாரியின் எழுத்து.

இது நான் படித்த முதல் சிறுகதைத் தொகுப்பு. இதில் வரும் அனைத்துக் கதைகளும் ஓர் ஆழமான தாக்கத்தை ஏற்படுத்தியது என்று சொன்னால் அது மிகையாகாது. பூனை, வாத்தியார், கிளி, வாழைப்பழம் என ஏதோ ஒரு சொல் நம் நினைவுகளில் நிச்சயமாக அசைபோடும். இதில் வரும் அனைத்துக் கதைகளும் மறக்க முடியாத வடுக்கள்தான்.

புத்தகம் படிப்பதாகவே இல்லை — மாரி செல்வராஜ் கூடவே வாழ்வதாக இருந்தது. இதற்கு முன்பு ராஜு முருகனின் "வட்டியும் முதலும்" இதே அனுபவத்தைத் தந்தது.

உண்மை மனிதர்களின் வாசம் நிறைந்த புத்தகம் இது. ஆசிரியர் அனுபவித்த நிஜ மனிதர்களின் கதைகள் — ஒவ்வொன்றும் உண்மையின் உச்சத்தில் சொல்லப்பட்டிருக்கிறது, அதுவே இந்தக் கதைகளைச் சிறப்பானதாக ஆக்குகிறது.

திருநெல்வேலி, தூத்துக்குடி பகுதிகளில் பிறந்து வளர்ந்தவர்கள் இந்தப் புத்தகத்தோடு மிகவும் இணைந்து கொள்ள முடியும். 90ஸ் குழந்தைகளின் குறும்புகளும் நினைவுகளும் நிறைய இருக்கின்றன.

நம்மில் பலருக்கு மாரி செல்வராஜ் ஓர் இயக்குனர் என்ற அளவில்தான் தெரிந்திருக்கும் — ஆனால் இந்தப் புத்தகம் அவரைப் பற்றிய முற்றிலும் வேறொரு பார்வையைத் தருகிறது.

நினைவுகளை, கதைகளை, பால்யகால வாழ்க்கையை, அந்தப் பகுதியின் கலாசாரம், பாரம்பரியம், சடங்குகளை இயல்பாக விவரிக்கிறார். அவரது திரைப்படங்கள் ஒவ்வொன்றும் இந்தப் புத்தகத்தின் — அவரது வாழ்க்கையின் — பிரதிபலிப்பே.

வலிமிகுந்த சம்பவங்கள் நிறைந்தாலும், கதாபாத்திரங்களை விவரிக்கும் நுணுக்கமும் கதை சொல்லும் பாணியும் மிகவும் சுவாரசியமாக இருக்கின்றன.

"தாமிரபரணியில் கொல்லப்படாதவர்கள்" சிறுகதைத் தொகுப்பை வாசித்துவிட்டு இந்த நூலைக் கையில் எடுத்தேன். நூலெங்கும் அன்றாடம் நாம் கவனிக்கத் தவறும் எளிய மனிதர்கள் நிரம்பிய பக்கங்கள்!

கர்ணன், பரியேறும் பெருமாள் கதாமாந்தர் குறித்து நாமறியாத பின்புலங்கள் இதில் நிறையவே உண்டு! பரியனைக் கொல்ல வரும் ஆணவக் கொலை தாத்தா தான் மூக்கையா தாத்தா. சலங்கை கட்டிப் பெண்ணாக ஆடும் தேர்ந்த சம்படி ஆட்டக்காரன் மாரியின் அப்பாவே தான்!

மறக்க நினைப்பதாய் எழுதி, நம்மால் மறக்கவே இயலாத காட்சிகளைப் பதியவிட்டுச் செல்கிறார் மாரி. தன் சொந்தக் கிராமத்துக் கதைகளில் இருந்து, கல்லூரிக் காலத்து நெல்லை, சினிமா வாய்ப்பு தேடி வந்த சென்னைக் கதை வரையான நிறைய சம்பவங்களில் நம்மையே மாரியாக உணர வைப்பது எழுத்தின் வெற்றி!

நல்லது கெட்டது கடந்து உள்ளது உள்ளபடியே சில மனிதர்களை அறிமுகம் செய்கிற விதம் தேர்ந்த கலைஞன் இவர் என்று காட்டுகிறது.

"புரிந்துகொள்ளுங்கள்; பிரியம் கொள்ளுங்கள்; மன்னித்துக் கொள்ளுங்கள், கூச்சமில்லை எனில் ஒரு முறை முத்தமிடுங்கள்!"

கட்டாயம் படிக்க வேண்டிய புத்தகம். மாரி செல்வராஜின் நேர்மையான வாழ்க்கை அனுபவங்கள் ஒவ்வொரு வாசகரையும் ஆழமாகத் தொடும்.

மறக்க விரும்பும் வாழ்க்கை அனுபவங்களைப் பேசும் புத்தகம் இது. சோகமோ துயரமோ அல்ல — மனித இயல்பின் மீதான லேசான வருத்தமும், சில இடங்களில் ஆசிரியரின் சொந்தத் தவறுகளும் நிறைந்திருக்கின்றன. மிகவும் இயல்பான புத்தகம் — உண்மையானது, அனைத்து மனிதர்களோடும் கதைகளோடும் பயணிக்கும் அனுபவத்தைத் தருகிறது. கட்டாயம் படியுங்கள் — பிடிக்கும்.

மாரிசெல்வராஜ் அவர்களின் வாழ்க்கை அனுபவங்களை 30 கட்டுரைகளாகக் கொண்ட இந்தப் புத்தகம் — வாசிக்கும்போது குபீரென்று சிரிக்கவும், பெரும் சிந்தனையில் ஆழ்த்தவும், கண் கலங்கவும் வைக்கிறது. இத்தனை விதமான அனுபவங்களா என்ற வியப்பையும் ஏற்படுத்துகிறது.

மாரி அவர்களின் கதை சொல்லும் விதம் — என்றாவது ஒரு நாள் அவரைச் சந்திக்க வாய்ப்பு கிடைத்தால் பல வருடம் பழகியது போல ஒரு நெருக்கத்துடன் பேசத் தோன்றும் அளவிற்கு இந்தப் புத்தக வாசிப்பு ஒரு நல்ல அனுபவத்தைக் கொடுத்திருக்கிறது.

மாரிசெல்வராஜ் அவர்களின் சிந்தனைகளை அவரது அனுபவங்களோடு சேர்த்துப் பார்க்கையில், அவர் சிந்தனை இத்தனை ஆக்கபூர்வமாக இருப்பதில் ஆச்சரியம் ஏதுமில்லை.

2022-இல் படித்த முதல் புத்தகம். ஆனந்த விகடனில் வந்த மாரி செல்வராஜின் தொடரின் புத்தக வடிவம் — மாரியின் அகம் சார்ந்த வாழ்க்கைப் பதிவு.

கதைகள் நம்மை மாரி செல்வராஜின் உலகிற்குக் கூட்டிச்சென்று வெளிப்படையான விளிம்புநிலை வாழ்வியல் முகத்தை உணரச் செய்கின்றன. சில கதைகளின் கரு அவரின் பரியேறும் பெருமாள், கர்ணன் திரைப்படங்களின் திரைக்கதைப் பார்வைக்குரிய காட்சிப் படிமம்.

ஜெயமோகனின் அறம், எஸ்.ராவின் கதாவிலாசம் போன்ற வகைப்படிவம் என்று வகைப்படுத்துவேன்.

தனது காயங்களைக் காவியமாக்கியிருக்கிறார் ஆசிரியர்.