தங்க தாமரை மலரே (Thanga Thamarai Malare): விஸ்வேஸ்வரன் - கமலினி (Tamil Edition)

தங்க தாமரை மலரே நாவலுக்கான விளக்கங்கள்.நாவலை வாசித்துவிட்டு உங்கள் மதிப்பீடுகளையும் கருத்துக்களையும் சமர்ப்பித்தால் மகிழ்வேன் தோழமைகளே ... " தாயின் கல்யாண மருதாணிக்கு மகிழும் மகன் " இப்படி தலைப்பிட்ட ஒரு போட்டோ , பிரபல நடிகரின் மகளுடைய இரண்டாவது திருமண போட்டோ சமீபத்தில் சமூக வலைதளங்களில் உலவியது .என் மனதில் அழுத்தமாக பதிந்தது இந்த போட்டோ .பாராட்டக்கூடிய , அவசியமான பெண்களுக்கான எதிர்கால நிலைமை இது . இதனை அடிப்படையாக்கி சரசரவென ஒரு கதை மனதில் உருவாக கையில் குழந்தையோடு பாரிஜாதம் உருவானாள் .

அடுத்து கதை நிகழும் களத்திற்கான சிந்தனையில் இருந்த போது , சமீபத்தில் நடந்து முடிந்த என் மகளின் திருமணத்திற்காக வாங்கிய நகைகள் , சென்ற நகைக்கடைகள் போன்றவற்றிலிருந்து கவனித்து வைத்த விபரங்கள் அடிமனதை நச்சரித்தபடி கிடக்க , அவற்றையே கூட்டிக் கோர்த்து நகை வியாபாரக் குடும்பமாக களத்தினை அமைத்தேன் .

ஒரு பெண்ணின் மறுமணத்தில் அக்கறை எடுத்துக் கொள்பவர் பெற்றோராக மட்டுமே ஏன் இருக்க வேண்டும்? அது ஏன் மாமியாராக இருக்க கூடாது ...என்ற எனது சிந்தனையில் உருவானவர்தான் ராஜசுலோச்சனா .உண்மையில் கதையின் அடிநாதம் இவர்தான் .ஆண் அகங்காரம் கொண்டிருந்த விஸ்வேஸ்வரனை மாற்றியது கமலினி அல்ல ....ராஜசுலோச்சனாதான் .

பெண்ணின் முன்னேற்றத்திற்கான அடுத்த படியென்றாலே உடனடி மறுப்பு சொல்லக் கூடியவன் ஆண்தான் .அதற்காக பலப்பல சமாதானங்களை தனக்கு தானே சொல்லிக் கொள்வான் .அப்படி ஒரு கேரெக்டரை கதையில் யோசித்த போது உருவானவன்தான் விஸ்வேஸ்வரன் . நான் இந்த நாவலின் ஆசியர் கடிதத்தில் சொல்லியிருந்த்து போல் விஸ்வேஸ்வரன் ஒரு சராசரி ஆண் . தான் நினைத்தது , கேட்டது நிறைவேறா பட்சத்தில் வேகமும், ஆவேசமும் கொள்ளும் சராசரி ஆண் .அவனிடம் இதை விட வேறு பெரிதாக என்ன எதிர்பார்க்க முடியும் ? ஆனாலும் விஸ்வேஸ்வரனுக்கு கதாநாயகன் அந்தஸ்து கொடுத்துவிட்டதால் அவனே தன்னுடைய வாழ்க்கையை கறையோ , கல்மிசமோ இல்லாமல் க்ளீன் சிலேட்டாக வைத்திருக்கிறான் , அதையே மற்றவர்களிடம் எதிர்பார்க்கிறான் என அவனை வடிவமைத்தேன் . அதனால்தான் ஆரம்ப அத்தியாயங்களில் காதலென்றால் என்ன ..என அப்பாவியாக விழி விரிக்கும் சின்னதம்பி கேரெக்டர் அவனுக்கு . அந்த அத்தியாயங்கள் மிக நிச்சயமாக கமர்சியலுக்காக சேர்க்கப்பட்டவை என்பதை தயங்காமல் ஒத்துக் கொள்கிறேன் .

நம் அனைவருக்குமே ( பெண்களுக்கு )ஆளுமையாக இருந்தபடி நம்மை தாங்கும் ஆண்களை பிடிக்கும் .பெரும்பான்மை குடும்பநாவல்களின் அடிப்படை இவைகள்தாம் .என்னுடைய நாவல்களில் பொதுவாக அவ்விதம் ஆளுமையான ஆணொருவன் சில குறைகளோடு இருப்பான் .அவனை பெண் சந்தித்ததும் , போராடி ...வாதாடி உண்மை உணர்த்தி் மீட்பாள் .உடனே அவனை திருத்துவதுதான் இவள் வேலையா எனக் கேட்டு விடாதீர்கள் .இந்த இடத்தில்தான் இருவரையும் தொடர்புற வைக்கும் மையப்புள்ளியாக காதல் இருக்கிறது . காதல் கதைகளுக்கு எந்த விதமான நியாயங்களும் சொல்லப்படுவதில்லை .இங்கே நியாயமும் , நியாமின்மையும் காதல் மட்டுமே .

தேவா நகைகள் பற்றிய விளக்கங்கள் இப்போதும் நடந்து கொண்டிருப்பவை . ஆண் பிள்ளைகளுக்கு மட்டுமே அந்தக் கலை அக்குடும்பத்தினரால் கற்றுத்தரப்படுகிறது .இதனை என் கதையில் சுட்டிக் காட்டியிருக்கிறேனே தவிர , அதற்கொரு நியாயம் பேச விரும்பவில்லை .அப்படி சொல்வதானால் அதற்கொரு குறுநாவல் எழுத வேண்டியதிருக்கும் .வேண்டாம் ...ரசிக்காது .விட்டு விடுவோம் .

மற்றபடி குடும்பநாவல்களில் தவறாமல் இருக்கும் கதாநாயகனை விரட்டி விரட்டி காதலித்து அவனை அடைவதற்காக ஹீரோயினை ஒழிக்க பல திட்டங்கள் போடும் அந்த வில்லி கேரெக்டர் எனது கதைகளில் இருக்காது . என் கதைகளில் சந்தர்ப்பங்கள் அல்லது ஆண்தான் வில்லன் .கொஞ்சம் குணக்கேடாக இருக்கும் பெண் இறுதியில் திருந்தி விடுவாள் . இது வரை எழுதி முடித்திருக்கும் நாவல்களும் இப்படித்தான் .இனி எழுத இருக்கும் நாவல்களும் இப்படித்தான். இதனை எனக்கென வரிக்கப்பட்ட ஒரு கட்டளையாகவே பின்பற்றி வருகிறேன் .

கதை வாசிக்கும் வாசகர்கள் மதிக்கப்பட வேண்டியவர்கள் என்பதை தாண்டி , விளக்கங்கள் கொடு என சினந்து சிணுங்கும் செல்லக் குழந்தைகள் போன்றவர்கள் .அவர்களை சமாதானப்படுத்தும் கடமை படைப்பாளிகளுக்கு நிச்சயம் உண்டு .எனவே இதோ ... தங்க தாமரை மலருக்கான விளக்கங்களை கொடுத்துவிட்டேன் . ஒரு முழுமையான கதையை கொடுத்த மனநிறைவுடன் அடுத்த கதைக்குள் நுழைகிறேன் .தொடர்ந்து கதையை வாசித்த தோழமைகள் அனைவருக்கும் நன்றியும் , பிரியங்களும் .