எழுதும் கலை [Ezhudhum Kalai]

எழுதும் ஆர்வமுள்ளவர்களுக்கு கதை, சிறுகதை, நாவல், கட்டுரை ஆகிய வடிவங்களின் அடிப்படைகளை அறிமுகம் செய்துவைக்கிறது இந்நூல். ஒரு வாசகனாகவும் இதன் மூலம் அடிப்படை இலக்கணங்களை தெரிந்துக்கொண்டு ஒரு இலக்கியப்பிரதியிடமிருந்து எவற்றை எதிர்ப்பார்க்கலாம் என தெரிந்துக்கொள்ளமுடியும்.தமிழ்ச்சூழலில் எந்த கலைவடிவத்தை எடுத்து உடைத்து அதற்கான தர்கங்களை வரையறை செய்தாலும், ”அப்படியெல்லாம் சொல்லிவிட முடியாது. கலை எதற்குள்ளும் அடங்காது” என்று சொல்கிறவர்கள் ஏராளம். இக்கண்ணோட்டம் அக்கலை வடிவத்தை முன்னோக்கி செல்ல அனுமதிக்காது. மேற்கத்திய நாடுகளில் இசை, திரைக்கதை, புகைப்படம் என அனைத்து கலைவடிவத்திற்கும் வரையறைகள் உள்ளன. புதிதாக அத்துறைக்கு வர ஆசைப்படும் ஆர்வலர்களுக்கு இவ்வரையறைகள் பெரும் உதவியாக இருக்கும்.சிட் ஃபீல்ட், ப்ளேக் ஸ்னைடர், ஜான் ட்ரூபி போன்ற அறிஞர்கள் திரைக்கதையின் கோட்பாட்டை உடைத்து வரையறை செய்தவற்றை படித்ததால் மட்டுமே திரைக்கதையின் மேல் ஆர்வமும் கவனமும் குவிந்து இன்று அது என் தொழிலாக மாறியுள்ளது.அதுபோல, இலக்கியத்தின் அடிப்படைகளை ஒருவர் சொல்லித்தராவிட்டால் அக்கலை வடிவத்தை அணுகும் முறை தெரியாமலேயே போய்விடும். இக்காரணத்தால் இன்று பலர் சினிமாவின் மூலம் மட்டுமே கதைகளை கேட்டு பழகி, ஒரு நாவலையோ சிறுகதையையோ படித்தால் - போர் அடிக்கிறது - என்று சொல்லத்தொடங்கிவிட்டனர். அவர்களை பொருத்தவரை திரைக்கதை வடிவத்தில் ஒரு கதை பொருந்தாவிட்டால், பக்கத்திற்கு பக்கம் திருப்பங்களை கொண்டிராவிட்டால் அக்கதை சலிப்பு தட்டிவிடும்.ஒரு காலத்தில் எனக்கும் இச்சிக்கல் இருந்தது. அதன் பின்னர், ‘நவீன தமிழ் இலக்கிய அறிமுகம்’ என்கிற ஜெயமோகனின் நூலினை பாதி வாசித்தப்பின்பு ஒரு தெளிவு கிடைத்தது. முன்னெப்போதையும் விட வாசித்தலின் மேல் ஆர்வம் பெருக்கெடுத்தது. பெரும் நாவல்களை வாசிக்க தூண்டியது.இந்நூல், ‘நவீன தமிழ் இலக்கிய அறிமுகம்’ நூலின் ஒரு குட்டி என்று சொல்லலாம். இந்நூலிலிருந்து கற்றுக்கொண்டவை:1. சிறுகதை சமையல் குறிப்புசிறுகதை என்பது சிறிய கதை என்று அர்த்தமாகாது. வாசகனை உள்ளூர இழுத்து பங்கெடுக்க செய்து, இறுதியில் எதிர்பாரா திருப்பத்துடன் ஒரு கதையை முடிப்பதே சிறுகதை. அத்திருப்பம் வாசகன் மனதில் இன்னொரு தொடக்கத்தை ஏற்படுத்தியிருக்க வேண்டும்.சிறுகதையின் மூலம் நீதி சொல்லக்கூடாது. அந்நீதி வாசகனுக்கு உணர்த்தப்பட வேண்டும். சிறுகதையின் முக்கியமான பங்கு வாசக பங்களிப்பு. அதனால் விவரிப்புகளும் மனவோட்டங்களும் சீராக வாசகனை அவ்விடத்திற்கே அழைத்துச்செல்லும்படி அமையவேண்டும். இது சிறுகதை எழுத்தையும் தாண்டி ஒரு கதையை நரேட் செய்யும்போதும் பயன்படுத்த வேண்டிய ஒரு யுக்தி.கதை சொல்லல் என்பது, ‘தகவல்களை ஒப்பிப்பது அல்ல. அனுபவத்தை கேட்பவருக்கு அளிப்பது’2. நாவல் ஒரு சமையல் குறிப்புஒரு முழுவாழ்க்கை சித்திரத்தை ஏற்படுத்த கூடியதாக இருக்கவேண்டும். மையக்கதாபாத்திரம் என்று ஒன்று தேவையில்லை. அப்படி ஒரு பாத்திரம் இருந்தாலும், பிற கதாபாத்திரங்கள் முக்கியம். அவையனைத்தும் வெவ்வேறு தர்க்கங்களும் செயல்பட வேண்டும். அவர்களின் தத்துவங்களும் செயல்களும் ஒன்றோடொன்று முரண்படும்போது நாடகீய தருணங்கள் அமையும்.எழுதுவதே கலை. திரைக்கதையைப்போல அடுத்தடுத்த சம்வங்கள் அனைத்தையும் திட்டம்போட்டு நாவல் எழுதுவது உகந்ததல்ல. ஒரு தொடக்கம். ஒரு மையக்கரு. Designing Principle. ஆகியவற்றை மனதில் வைத்து எழுதிப்பார்த்து தான் நாவலை கண்டடைய வேண்டும். இதனால் ஒரு நாவலை முடிக்க பலவருடங்கள் ஆகலாம். என்பதுகளுக்கு முன்னர் வரை நாவல்கள் ஒரே நீரோட்டத்தில் உருண்டு திரண்டு பெருத்துக்கிடக்கும். டால்ஸ்டாயின் நாவல்கள் ஒரு உதாரணம். அதன் பின்னர் வந்த நவீன நாவல்கள் இன்னும் செறிவுடன் எழுதப்பட வேண்டிய கட்டாயம் உள்ளது. ஒரு கதைக்களத்தை எடுத்துக்கொண்டால் அதன் அனைத்து பக்கங்களும் அதில் பதிவுசெய்யப்பட வேண்டியது அவசியம். எழுத்தாளனின் ஆழ்மன கேள்விகளுக்கு விடைதேடலே இந்நாவல்கள்.உதாரணம். ஒரு நாவல் 18ம் நூற்றாண்டு காலணிய காலம் என்கிற கதைக்களத்தை எடுத்துக்கொண்டால்: அச்சூழலின் மன்னர்கள், அரசு அதிகாரிகள், பொதுமக்கள், தாசிகள், படித்தவர்கள், ஏழைகள் - என அனைத்து தரப்பினரையும் உட்கொண்டு அந்நாவல் எழுதப்பட வேண்டும். பிரபஞ்சனின் மானுடம் வெல்லும் ஒரு சிறந்த உதாரணம்.இது போன்ற நாவல்கள் நமக்கு வாழ்க்கையை பற்றிய பருந்துப்பார்வையை அளிக்கிறது. புதிய புரிதல்களை உருவாக்குகிறது. நாவல் நமக்கு பாடம் புகுட்டாது. அந்நாவலை வாசித்து பெற்ற அனுபவங்களை சீராய்ந்து நாம் நமக்கான பாடங்களை உருவாக்கிக்கொள்கிறோம்.3. கட்டுரை ஒரு சமையல் குறிப்புகட்டுரை, ஆராய்ச்சிக்கட்டுரை என இரு வெவ்வேறு வடிவங்கள் உள்ளன. குழப்பிக்கொள்ள கூடாது. ஒரு கட்டுரை ஏற்கனவே வகுக்கப்பட்ட விழுமியங்களை மீண்டும் அடிக்கோடிட்டு சொல்லும். ஆராய்ச்சிக்கட்டுரை இதுவரை வரையறுக்கப்பட்ட கருத்துகளின் மேல்நின்று புதிய கருத்தை நிறுவும்.கட்டுரை ஒரே ஒரு சீர்கருத்தை மையமாக வைத்து எழுதப்பட வேண்டும். அதற்கு சம்மந்தம் இல்லாத எதையும் உள்ளே வைத்திருக்க கூடாது. ஒரு கருத்துக்கு ஒரு உதாரணம் போதுமானது. பிற உதாரணங்களை வாசகர்கள் யூகித்திக்கொள்வார்கள். இதன் பின்னர் எழுதுதல் பற்றிய சந்தேகங்களை வாசகர் கடிதங்கள் மூலம் ஜெயமோகன் பதிலளிக்கிறார். இதுவரை எழுததல் பற்றிய புத்தங்களில் ஜெயமோகனை தவிர சீராக எழுதியவர் எவருமில்லையென்றே தோன்றுகிறது. சிறந்த புத்தகம்.