சு. வெங்கடேசன் (S. Venkatesan) தமிழ்நாட்டைச் சேர்ந்த ஒரு சிறந்த எழுத்தாளர் மற்றும் அரசியல்வாதி ஆவார். இவர் இந்தியப் பொதுவுடைமைக் கட்சி (மார்கசியக் கட்சி) மாநிலக் குழு உறுப்பினர். இவரது அறிமுக நாவலான 'காவல் கோட்டம்' (2008) 2011ஆம் ஆண்டிற்கான சாகித்திய அகாதமி விருதை வென்றது. இந்த நாவலை அடிப்படையாகக் கொண்டு வசந்தபாலன் இயக்கத்தில் 'அரவான்' என்ற திரைப்படம் உருவாக்கப்பட்டது. சாகித்திய அகாதமி விருது பெற்ற இவர், தமிழ்நாடு முற்போக்கு எழுத்தாளர்கள் கலைஞர்கள் சங்கத்தின் தலைவராகவும் பொறுப்பு வகிக்கிறார். இவரது இரண்டாவது நாவலான 'வீரயுக நாயகன் வேள்பாரி' ஆனந்த விகடன் இதழில் தொடராக வெளியாகி வாசகர்களிடம் பெரும் வரவேற்பைப் பெற்றது. அமரர் கல்கியின் 'பொன்னியின் செல்வன்' நாவலுக்குப் பிறகு தமிழ் வாசகர்களிடையே ஒரு மாபெரும் அலையை உருவாக்கிய வரலாற்றுப் புதினமாக இது போற்றப்படுகிறது.