Reviews for துப்பட்டா போடுங்க தோழி

ஓட்டமும் நடையுமாக தன் வாழ்வை நோக்கிப் பயணிக்கும் ஓர் பெண்ணினைத் துரத்திச் சென்று, அவளை நிறுத்தி, அதீத அக்கறையுள்ள இச்சமூகம் அவளிடம் சொல்லும் "துப்பட்டா போடுங்க தோழி".

பெண் தன் உடலின் ஓர் அங்கத்தை அசிங்கமாக ஏன் எண்ணுகிறாள்? குடும்ப ஆண் என பிரித்துப் பார்க்காத இச்சமூகம் பெண்ணை மட்டும் ஏன் பாகுபடுத்துகிறது? அவளின் வெளி என்பது வீடாக மட்டுமே ஏன் இருக்க வேண்டும்?

கற்பு, நகையலங்காரம், சுயபரிவு, உடற்பயிற்சி, நட்பு, பயணம், சம்பாத்தியம் எனப் பல தலைப்புகளில் 30 கட்டுரைகளாக கேள்வி கேட்கிறது கீதா இளங்கோவனின் இந்தப் புத்தகம்.

இந்தப் புத்தகத்தில் மொத்தம் 30 கட்டுரைகள் உள்ளன. ஒவ்வொரு கட்டுரையிலும் ஒரு பெண்ணிற்கு நடந்த சம்பவத்தை விவரிக்கும் போது நமக்கே நடந்தது போலவே தோன்றுகிறது.

முதல் கட்டுரையின் தலைப்பு "துப்பட்டா போடுங்க தோழி". தன் உடல் மீது இருக்கும் கோபமும் வெறுப்பும், குறிப்பாக மார்பகங்களின் மேல் இருக்கும் வெறுப்பு — இது மாதிரி அனுபவங்களை நேர்மையாக பேசுகிறது.

குழந்தை பெற்றுக் கொள்வது என்ற முடிவை இந்தக் குடும்பம், சமுதாயம், இப்போது பெருகிவரும் மகப்பேறு மையங்களின் ஆதிக்கம் தான் தீர்மானிக்கிறது — பெண்களின் விருப்பமல்ல. குழந்தை பெற்றுக் கொள்வது முதலில் அவள் முடிவு மட்டும் தான்.

இந்தப் புத்தகம் பெண்களுக்கானது மட்டுமல்ல — அனைவருக்கும் ஆனது. அனைத்து வயதினருக்கும் ஏற்ற புத்தகம்.

"நமது அருமையான மகள்களைவிட, அவர்களது உயிரைவிட, உரிமைகளை விட, கல்வியை விட, அவர்கள் கனவு வேலைகளை விட, அழகான வாழ்க்கையை விட, இந்தப் பிற்போக்குத்தனமான, கொடுமையான கற்பு என்ற கருத்தாக்கம் முக்கியமில்லை."

பெண்கள் மீது சமுதாயம் திணிக்கும் கட்டுப்பாடுகளுக்கான பதில் தான் இந்தப் புத்தகம். துப்பட்டா போடுங்க என்பதில் தொடங்கி எத்தனையோ விதிகள் — காலப்போக்கில் பெண்கள் உரிமைகளைப் பற்றி நிறைய விழிப்புணர்வு ஏற்பட்டாலும் இன்னமும் சில கட்டுப்பாடுகள் இருந்துக்கொண்டே தான் இருக்கின்றன.

ஒரு பெண் குழந்தை பிறந்து, வளர்ந்து, பருவமடைந்து, படித்து, வேலைக்குச் சென்று, திருமணம் ஆகி, தாயாகி, வயதாகி — இறக்கும் வரை "இப்படித் தான் இருக்க வேண்டும்" என எத்தனை விதிகள். அவை எல்லாவற்றிற்கும் சாட்டையடி பதில் தான் இந்தப் புத்தகம். கண்டிப்பாக எல்லாரும் படிக்க வேண்டிய படைப்பு.

இந்தப் புத்தகத்தைப் படிக்கும் ஒவ்வொரு பெண்ணுக்கும் மனதில் ஒரு நம்பிக்கை, நம்மாலும் எல்லாம் முடியும் என்ற தன்னம்பிக்கை உண்டாகும்.

இந்தப் புத்தகம் 2023 ஜனவரியில் படித்து முடித்தபோது குட்ரீட்ஸில் பட்டியலிடப்படவில்லை. இப்போது பட்டியலிடப்பட்டிருப்பது இந்தப் புத்தகத்தின் வெற்றியைக் காட்டுகிறது.

அத்தியாயங்களில் மக்களுக்கு ஏற்கனவே தெரியாத புதிய விஷயங்கள் இல்லை. ஆனாலும் அனைவரும் படிக்க வேண்டும். அப்போதாவது திருத்தம் வரும் என்ற நம்பிக்கைதான்.

பெண்ணியம் சார்ந்த பல கருத்துகளை, பெண்கள் சந்திக்கும் பிரச்சினைகளை, மிக நேர்த்தியாக, ஆழமாக, முக்கியமாக எல்லாருக்கும் புரியும்படியாக எடுத்துரைக்கும் புத்தகம்.

ஆணாதிக்க சமூகம் ஒரு பெண்ணின் மீது திணிக்கும் நியாயமற்ற எதிர்பார்ப்புகள், முறையற்ற கேள்விகள், கேவலமான முன்முடிவுகள் என்று நீளும் பட்டியல் அனைத்தையும் அழகாக அணுகி தெளிவுபடுத்துகிறார் ஆசிரியர் கீதா.

அக்கறை என்கிற பெயரில், நம் சமூகம், ஏன் சக பெண்கள் கூட ஆணாதிக்க சிந்தனையுடன் ஒரு பெண்ணை கட்டுக்குள்ளே வைத்து, கண்களுக்கு தெரியாத ஒரு கோடிட்டு அதனுள்ளே மட்டுமே அவள் தன் வாழ்வை முடித்துக்கொண்டு "நல்ல பெண்" என்று பெயர் வாங்க வேண்டும் என்று எண்ணுகிறது.

படித்துக்கொண்டிருக்கும் பொழுதே, பல கேள்விகளை எழுப்புகிறது, பல உண்மைகளை நமக்கு உணரச்செய்கிறது. இது பெண்கள் படிக்க வேண்டிய புத்தகம் மட்டும் இல்லை, ஆண்கள் நிச்சயமாக படிக்க வேண்டிய புத்தகம்.