கொஞ்சம் மோதல்! கொஞ்சும் காதல்!!! : KONJAM MOTHAL! KONJUM KADTHAL!!! (Tamil Edition)

"ஹாய், ஐயம் கமல்..." என்றபடி எழுந்தவன் அவள் கையை நீட்டும் முன் அவளது கையைப் பற்றிக் குலுக்க... அடுத்த நொடி அவள் வேகமாய் அவனது கரத்தில் இருந்து தனது கரத்தினை உருவி கொண்டவள் நேரே கழிவறை நோக்கி சென்றாள். அங்குச் சென்று தனது கரத்தினை மூன்று தடவைக்கு மேல் சோப் போட்டு கழுவியவள் பின்பு திருப்தி உற்றவளாய் வெளியில் வந்தாள்.

கமலுக்கு எதிரே இருந்த நாற்காலியினை அங்கிருந்த டிஷ்யூ பேப்பர் கொண்டு துடைத்தவள் அதன் பிறகே அதில் அமர்ந்தாள். கமல் அவளது நடவடிக்கையை விசித்திரமாகப் பார்த்திருந்தான். ஆனால் எதையும் வெளிக்காட்டி கொள்ளவில்லை.

"பேரர்..." என்று அழைத்த சைந்தவி பேரர் வந்ததும்,

"கேப்பச்சீனோ ப்ளீஸ்..." என்றவள் அமைதியாகி விட... கமல் அவளை அதிசயமாகப் பார்த்தபடி பேரரிடம்,

"எனக்கு ஒரு கோல்ட் காபி..." என்று ஆர்டர் கொடுத்தான். பேரர் அங்கிருந்து அகன்றதும் கமல்,

"அப்புறம் சைந்தவி, பிசினஸ் எல்லாம் எப்படிப் போயிக்கிட்டு இருக்கு?" என்று புன்னகையுடன் கேட்க...

"ஏன்... நஷ்டம்ன்னா பணம் கொடுத்து உதவி பண்ண போறீங்களா?" அவள் நறுக்கென்று கேட்க... அதில் அவன் அயர்ந்து தான் போனான்.

"ஓகே லீவ் இட்... உங்களுக்கு என்ன பிடிக்கும்? அதாவது ஃபுட், கலர், சினிமா இப்படி..."

"தெரிஞ்சு என்ன பண்ண போறீங்க மிஸ்டர். கமல்? என்னுடைய ரசனை உங்களுடையதா மாறப் போகுதா? இல்லை உங்களுடையது என்னுடையதா மாறப் போகுதா? நான் நானாகத் தான் இருக்கப் போகிறேன். நீங்களும் அப்படியே..." என்றவளை கண்டு அவன் வாயடைத்துப் போனான்.

அதற்குள் பேரர் வந்து இருவருக்கும் காபி கொண்டு வந்து வைக்க... அவள் தன் முன்னிருந்த காபி கோப்பையின் விளிம்பினை டிஷ்யூ பேப்பர் கொண்டு துடைக்க... கமல் திகைத்தார் போன்று அவளைக் கண்டு விழித்தான். அவள் அதைக் கண்டு கொள்ளாது தன்னைப் போன்று சூடாய் இருந்த கேப்பச்சீனோவை பருக துவங்க... அவன் அமைதியாய் அவனைப் போன்றிருந்த கூல் காபியை பருக துவங்கினான். இருவருக்கும் இடையில் பலத்த மௌனம் நிலவியது. இடக்கு மடக்காகப் பேசும் அவளிடம் அவன் பேசவே பயந்தான். பேரர் வந்து பில் கொண்டு வந்து கொடுக்கும் வரை இந்த அமைதி நீடித்தது. பேரர் இருவருக்கும் சேர்த்து ஒரே பில்லாகப் போட்டுக் கொண்டு வந்து கொடுத்தான். அதைக் கண்டதும் சைந்தவி,

"ஹலோ, எனக்கு உண்டான பில்லை மட்டும் தனியா கொடுங்க..." என்றபடி பேரரை கண்டு முறைத்தாள்.

"ஹேய் சைந்தவி, கூல்யா... நம்ம ரெண்டு பேருக்கும் சேர்த்து நான் பே பண்ணிர்றேன்." என்றான் கமல் சிறு சிரிப்புடன்...

"நமக்குக் கல்யாணம் ஆகிருச்சா? நமக்குள்ள என்ன உறவு? நீங்க எதுக்கு எனக்காகப் பே பண்ணணும்?" அவள் படபடவெனக் கேள்விகள் கேட்க... கமல் பதில் சொல்ல முடியாது திகைத்து விழித்தான்.

"எதுக்கு இப்படி ஓவரா ரியாக்ட் பண்றீங்க சைந்தவி?"

"இது ஓவர் இல்லை. ஸ்மார்ட்... என்னுடையதை என்னால் பார்த்துக்க முடியும்ங்கிற நம்பிக்கை. நான் யாரையும் நம்பி இல்லைங்கிற நிமிர்வு." என்று கூறியவள் தனது காபிக்கான பணத்தை மட்டும் மேசை மீது வைத்து விட்டு தனது கைப்பையை எடுத்துக் கொண்டு எழுந்தாள்.

"ரொம்பச் சைல்டிஷ்ஷா பிஹேவ் பண்றீங்க... இதோட விளைவு என்னவாக இருக்கும்ன்னு தெரியுமா?" என்றவனை உற்று நோக்கியவள்,

"நீ என்ன என்னை வேண்டாம்ன்னு சொல்றது. இப்போ நான் சொல்றேன்... நீ எனக்கு வேண்டாம், போடா..." என்று அவனது முகத்துக்கு நேரே கூறிவிட்டு நிமிர்ந்த நடையுடன் அந்தக் காபி ஷாப்பை விட்டு அவள் வெளியேறினாள்.

"உனக்கு இந்த இருபத்தியேழு வயசில் மட்டும் இல்லை... ஔவையார் மாதிரி குடுகுடு கிழவியானாலும் கூடக் கல்யாணம் நடக்காது." என்று கோபத்துடன் கத்தியவன் கெட்ட கெட்ட வார்த்தைகளால் அவளை அர்ச்சிக்க ஆரம்பித்தான்.