மறைந்து போன தமிழ் நூல்கள்

இது தமிழின் மிகப்பெரிய ஆராய்ச்சி நூல் என்பேன். ஏனென்றால் என்னென்ன புத்தகங்கள் இருக்கின்றன எனப் பட்டியல் போடுவது சுலபம். ஆனால் என்னென்ன இருந்து இல்லாமல் மறைந்து விட்டன என ஆய்வு செய்து பட்டியலிடுவது மிகவும் கடினம். முதலில் மயிலையார் இந்த ஆய்வினை ஏன் செய்தார் என்று முன்னுரையில் குறிப்பிட்டுள்ளார். அவருக்கு வாழ்வில் தீராத்துயரம் ஒன்று ஏற்பட்டுள்ள நிலையில் அதிலிருந்து மனதை திசைத் திருப்புவதற்காக இவ்வாய்வில் இறங்கியிருக்கிறார். இது தமிழ் ஆய்வுலகிற்கு மிகப்பெரும் கொடையாக இருக்குமென பலர் ஊக்குவிக்கவும் புத்தகமாக வெளியிட்டுருக்கிறார். அக்கால கட்டத்திலேயே பல பதிப்புகளைக் கண்டிருக்கிறது. இலக்கிய நூல்கள் - அகப்பொருள் - 32 இலக்கிய நூல்கள் - புறப்பொருள் - 9 இலக்கிய நூல்கள் - காவியம் - 9 இலக்கிய நூல்கள் - ஏனையவை - 67 இசைத்தமிழ் நூல்கள் - 10 நாடகத்தமிழ் நூல்கள் - 24 இலக்கண நூல்கள் - 45 பெயர் தெரியாத நூல்கள் சிதைவுண்ட நூல்கள் தமிழ் நூல்கள் எவ்வாறு மறைந்தன? மேலுள்ள பட்டியல்படி ஒவ்வொரு நூலாக விவரிக்கிறார். மயிலையாரின் புத்தகங்களிலேயே இதுதான் கடினமானதாக இருக்கும் என்று நினைக்கிறேன். ஏனென்றால் பாதிக்கும் மேல் உரையற்ற செய்யுள்களால் நிரம்பியுள்ளது. சில செய்யுள்களைத்தான் வாசிக்க முயன்றேன். மற்றவற்றில் இது குறித்து எங்கு குறிப்பிட்டுருந்தது? அதை மயிலையார் எப்படி கண்டறிந்தார் என்ற விளக்கங்களை ஆர்வமுடன் படித்தேன். உண்மையில் அவை என சுவாரசியமானவையாக இருந்தன. இப்புத்தகத்தை வாசிக்கிறிர்களோ இல்லையோ இறுதிக் கட்டுரையான இப்படி இத்தனை நூல்கள் எப்படியெல்லாம் மறைந்திருக்கக் கூடும் என்ற கட்டுரை மிகவும் முக்கியமானது. அரசுப் பணிக்கான தேர்வுகளுக்கு படிக்கையில் பல தமிழ் நூல்கள் குறித்து படித்திருக்க வேண்டும். அவ்வழி மயிலையார் குறிப்பிடும் நூல்கள் குறித்து ஏற்கனவே அறிந்திருந்ததை எண்ணி எனக்கு நானே சபாஷ் சொல்லிக் கொண்டேன். மயிலையார் குறிப்பிடும் நூல்கள் குறித்து தனித்தனியாக விளக்கமாக நிறைய எழுதலாம். சுவாரசியமாக இருக்கும். உதாரணத்திற்கு ஜைன ராமாயணம் குறித்து என் பக்கத்தில் எழுதியிருந்தேன். முதற்சங்க நூல்களில் தொடங்கி 150 ஆண்டுகளுக்கு முந்தைய நூல்கள் வரை அன்னாரது பட்டியலில் இடம் பெற்றிருக்கிறதை பார்க்கையில் தோன்றுவது ஒன்றுதான். தமிழனுக்கு நூல்களை மதிக்காதிருக்கும் பழக்கம் இனவழமைதான் போலும்.