இராஜராஜேச்சரம் [Rajarajecharam]

தமிழன் பெருமை பரவட்டும்.. இந்த வாய்பை மற்றும் வழியை தந்த Youtube தொலைக்காட்சி - அறம் பழகிக்குபார் க்கு நன்றி!!!

தஞ்சைப் பெருங்கோவிலின்பால் விருப்பமுள்ளவர்களுக்கு இந்நூல் ஒரு பெரும் புதையல் என கூறினால் அது மிகையல்ல. கோவிலின் கட்டுமானம் மற்றும் அது கூறும் தத்துவங்களும், சிற்பங்களின் எழிலும் அவை கூறும் கதைகளும், ஸ்ரீவிமானத்தின் உள்ளிருக்கும் ஓவியங்களும் அவற்றின் வரலாறும், கோவில் கட்டப்பட்ட காலந்தொட்டு இன்று வரை அது பெற்ற மாற்றங்களும் அவற்றைச் சுற்றி நடந்த நிகழ்வுகளும் என நாம் வளரும் நந்தி நிழல் சாயாத கோபுரம் எனப் பகிர்ந்து கொள்ளும் கற்பனைக் கதைகள் வரை இதில் இல்லாத தகவலே இல்லை. ஆசிரியர் தன் பெரும்பாலான விளக்கங்களுக்கு கல்வெட்டு அல்லது செப்பேட்டு ஆதாரங்களை மேற்கோள் காட்டுவது சிறப்பு. நூலில் நம் பார்வைக்காக இணைக்கப்பட்டுள்ள நிழற்படங்கள் அனைத்தும் வண்ணப்படங்களாக இருந்தால் மேலும் சிறப்பாக இருக்கும்.

சரித்திரம் என்பது கடந்தகால நிகழ்வுகளின் தொகுப்பு. இந்திய வரலாறு என்னும் காலப் பெட்டகத்தில் "தமிழக வரலாறு" ஒரு முக்கிய பொக்கிஷம். சங்ககாலம், களப்பிரர் காலம், பல்லவர், சேரர், சோழர், பாண்டியர், விஜயநகர நாயக்கர்கள், மராத்தியர்கள், பிரெஞ்சு, நவாப், இஸ்லாமியர்கள், பிரிட்டிஷ் ஆட்சி என்று நீண்ட நெடிய கலவரிசை கொண்டது நம் தமிழ்நாடு. ஆனால் சோழர் ஆட்சிக்காலத்தை சுட்டிக்காட்டாமல் தமிழக வரலாறு முழுமை அடையாது. பல்லவர் காலத்தில் ஆரம்பித்த கற்கோயில்கள் சோழர்கள் காலத்தில் மேலோங்கியது. கலை, சிற்பம், ஓவியம், கட்டுமான பிரம்மாண்டம் என்று படிக்க படிக்க என்னை பிரமிக்க வைத்த புத்தகம் தான் ஐயா திரு.குடவாயில் பாலசுப்ரமணியம் எழுதிய "ராஜராஜேச்சுரம்". கிபி 850ல் விஜயாலய சோழன் முத்தரைய மன்னனை வென்று தஞ்சையை கைப்பற்றி, அதை தலைநகரமாக ஆக்கினார். நிசும்பசூதனி எனும் தேவியே குலதெய்வமாக தோற்றுவித்தார். விஜயாலய சோழன் தொடங்கி ஆதித்தன், பராந்தகன், கண்டராதித்தன், அரிஞ்சயன், சுந்தரசோழன், ஆதித்த கரிகாலன், மதுராந்தகா உத்தம சோழன், ராஜராஜ சோழன், ராஜேந்திர சோழன் என்று 175 ஆண்டுகள் மாபெரும் சாம்ராஜ்யம் அமைத்தது சோழ பேரரசு. இதில் ராஜராஜ சோழன் தனிச் சிறப்பிற்கு உரியவன். பல்லவர் ஆட்சியில் போர்கள் காரணமாக தமிழகத்தின் செல்வ வளங்கள் சீரழிந்ததை உணர்ந்து, போர்க்களம் காணாமல் இருக்க எல்லா எதிரிநாடுகளுக்கும் தூது அனுப்பி நட்புக்கரம் நீட்டினான். எதிர்த்தவர்களை அடக்கியும், படைகளையும் தலைவர்களையும் அனுப்பி நிலையான ஆட்சி செய்தவன் ராஜராஜன். காஞ்சிபுரத்தில் ராஜசிம்ம பல்லவனால் கட்டப்பட்ட கயிலாசநாதர் கோவிலால் மயங்கிய ராஜராஜனுக்கு ஓர் எழுச்சி தூண்டியது. அதன் விளைவாக உருவானதே, 1000 ஆண்டுகள் தாண்டியும் கம்பீரமாக காட்சியளிக்கும் தஞ்சை பெருவுடையார் கோவில். ராஜராஜன் பாராட்டுக்குரியவன் என்றாலும், கோவிலை உருவாக்கிய கட்டிடக்கலைஞன் "வீரசோழன் குஞ்சரமல்லன் எனும் ராஜராஜ பெருந்தச்சன்" இல்லாமல் இந்த கோவில் சாத்தியமில்லை. இப்பெருங்கோவிலின் கட்டடக்கலை, விமானத்தின் சிறப்பு, வரலாற்றை கூறும் கல்வெட்டுகள், கவின்மிகு கலை, அரசியல், சமயம், பொருளாதார நிலை, இறையாண்மை என்று திகட்ட திகட்ட தேன் அமுதை உண்டது போல ஒரு திருப்தி இந்த புத்தகத்தை படித்தபோது எனக்கு கிடைத்தது. கோவில் கட்டுவதற்கு எங்கிருந்து கற்கள் எடுக்கப்பட்டது? கோவில் எந்த ஆகம விதிப்படி எழுப்பப்பட்டது? ஒவ்வொரு சிற்பங்களும், ஓவியங்களும் சொல்லும் கதைகள் என்னென்ன? பிற்காலத்தில் மராத்தியர்களும், நாயக்கர்களும் கோவிலை எப்படி புதுப்பித்தனர்? இஸ்லாமியர் / ஆங்கிலேயர் காலத்தில் கோவில் எப்படி சிதைவுக்குள்ளானது? அனைத்திற்குமான பதில் இந்த புத்தகத்தில் உள்ளது. ஒவ்வொரு கலாரசிகரும் வீட்டில் பொக்கிஷமாக வைத்துக்கொள்ளவேண்டிய புத்தகம்.