Reviews for ரோலக்ஸ் வாட்ச்

பணம், அதிகாரம், காதல், நட்பு என எல்லாவற்றையும் உள்ளடக்கிய ஒரு நாவல் இது. மனித உறவுகளின் பல பரிமாணங்களை ஒரே கதைக்குள் விரித்துக்காட்டுகிறது.

2018-ன் முதல் தேர்வும், இந்த எழுத்தாளரின் முதல் படைப்பும் இதுவே. வித்தியாசமான கதாபாத்திரங்களும் அதிகாரத்தின் சூழ்நிலைகளும் நிறைந்த நாவல்.

கதை சொல்லல் வித்தியாசமான முறையில் அமைந்திருக்கிறது. நாவலின் முக்கிய கதாபாத்திரம் யார் என்று எளிதில் கண்டுபிடிக்க முடியாது. கல்லூரிக்குச் சென்றவர்கள் யாரும் இந்தக் கதையுடன் தங்களை இணைத்துக்கொள்ள முடியும்.

நாம் வாழும் இன்றைய காலத்தில் நடக்கும் கதை இது. சந்திரனே கதையின் நாயகன், ஆனால் கடைசிவரை பெயரே சொல்லாத அந்த ஆசாமியால் அதை ஏற்றுக்கொள்ள முடியவில்லை — இருந்தாலும் மனதில் அவ்வளவு மரியாதை.

தப்பு செய்யும்போதெல்லாம் சந்திரனை நினைத்தே பயப்படுகிறார். இவர் சொல்லும் கதைகள், வரும் மனிதர்கள், நடக்கும் காட்சிகள், நடத்தும் உரையாடல்கள் — அனைத்தும் மிகவும் சிறப்பாக இருந்தன!

நாவல் முழுக்க பல மனிதர்கள் வருகிறார்கள், ஆனால் ஒருவர் கூட சிறுகதை அளவுக்குக்கூட தாக்கம் ஏற்படுத்தவில்லை. பெரும்பாலான மனிதர்கள் ஏதேனும் ஒன்றிற்கான உவமைகளாக வந்து போகிறார்கள்.

ஒரு உவமையைச் சொல்ல வேண்டுமென்றால் அதற்கு மிகப்பெரிய சம்பவம் ஒன்றை உருவாக்கி, அதிலிருந்து உவமையை எடுத்துக் கொண்டுவரும் உத்தி — சில சமயங்களில் சுவாரஸ்யமாக இருக்கும், சில சமயங்களில் பெருமூச்செறியச் செய்யும்.

ஒவ்வொரு அரசு அலுவலகத்திலும் — அது வீஏஓ அலுவலகமாகட்டும், பிரதமர் அலுவலகமாகட்டும் — "இவரைப் பிடி, காரியம் நடக்கும்" என ஒருவரைச் சொல்வார்கள். அப்படிப்பட்டவர்களின் வாழ்க்கையைச் சொல்லும் புத்தகம் இது.

இவர்கள் எங்கும் தனியாக இல்லை, நம்முடனே கலந்திருப்பார்கள். இவர்களது அகராதியில் சம்பளம், இலாபம் என்றெல்லாம் இருக்காது — இந்த வேலை முடித்துக் கொடுத்தால் இவ்வளவு வருமானம், அவ்வளவுதான்.

படிக்க ஆரம்பித்ததுதான் தெரியும், 158 பக்கங்கள் எப்படி முடிந்ததென்றே தெரியவில்லை. நிழல் உலக மனிதர்களைப் பற்றிய கதை என்றாலும் இது முழுக்க மனிதனின் மனம் பற்றியது, அவனது ஈகோவைப் பற்றியது.

ஒவ்வொரு நல்லவனுக்குள்ளும் ஒரு எதிரி இருப்பார், ஒவ்வொரு எதிரிக்குள்ளும் ஒரு நண்பன் இருப்பான். அப்படிப்பட்ட இருவர் பற்றிய கதைதான் இது. "அதுல அதிகம் பேசாதவன் தான் ஹீரோவா இருப்பான்" — மிக மிக இரசித்த வசனம்!

சாரு தனது எழுத்துலக வாரிசாக இவரை ஏன் குறிப்பிட்டார் என்பது 50 பக்கங்கள் தாண்டுவதற்குள் புரிந்துவிடும். கண்டிப்பாகத் தவற விடக்கூடாத நாவல்!

யாரோ ஒருவர் தான் சந்தித்த பல மனிதர்களைப் பற்றி, அவர்களின் நினைவுகளைப் பற்றி முழு வரைபடமாக உங்களுடன் பகிர்ந்துகொண்டால் எப்படி இருக்கும்? அப்படித்தான் இருந்தது ரோலக்ஸ் வாட்ச். "அதுக்கு என்ன இப்ப" என்று கேட்கத் தோன்றும் தருணங்கள் பல!

என்னுடைய வேலைக்கு இடையில் சிறிது சிறிதாகப் படித்த நூல் இது. ஒவ்வொரு அத்தியாயமாகப் பெருமையாய் படித்தது மனதை நெகிழ்த்திவிட்டது.

சந்திரனுக்காக நானும் மனமார வேண்டிக்கொண்டேன் என்பதுதான் உண்மை. அவர் உண்மையா இல்லையா என்று தெரியவில்லை — உண்மை என்றால் அவர் கண்டிப்பாக மீண்டு வர வேண்டும். இதில் வருகிற ஒவ்வொரு கேரக்டரையும் தனித்தனியாக விலாவாரியாக அனுபவித்து எழுத வேண்டும் என்றே ஆவல்.

எத்தனை நயமாக வடிக்கப்பட்ட கதாபாத்திரங்கள்! அவர்களின் மனவெழுச்சிகள், அகச் சிக்கல்கள் என எழுத்தாளர் மெனக்கெட்டு வடித்திருக்கிறார் என்பதை நினைக்கும்போது புல்லரிக்கிறது. கண்டிப்பாகத் தவற விடக்கூடாத நாவல்!

சமகால அரசியல் தரகர்களின் வாழ்வை இவ்வளவு ஆழமாகப் பேசிய நாவல் வேறு எதுவும் இல்லை. வாய்ப்புக்காகக் காத்திருக்கும் அத்தனை பேரும் தவமிருப்பவர்கள் அல்ல. அதே நேரம் சாதாரண ஆசா பாசங்கள் உள்ளவனும் சந்தர்ப்பங்களை சரியாகப் பயன்படுத்தி வெற்றியைச் சுவைப்பான் என்கிற — மனித சமூகம் இன்றுவரை மறுத்தலித்துக்கொண்டிருக்கும் உண்மையைக் கருவாக எடுத்து எழுதியிருக்கும் ஆசிரியரைக் கண்டிப்பாகப் பாராட்டியே ஆக வேண்டும்.

கலை வடிவம் அனைத்திலும் ஒரு நாயகனை, அவனுக்கேற்ற வில்லனை, ஒரு நல்ல முடிவை எதிர்பார்க்கும் வாசகர்களை ஏமாற்றும் ஆசிரியர், வாழ்வின் சாரம்சம் இதுதான், இப்படியும் கூட இருக்கும் என்ற முடிவுக்கு வாசகர்களை நம்ப வைத்துள்ளார்.

சமகால இலக்கியப் படைப்புகளில் தனக்கான இடத்தைப் பிடிக்கும் நாவல் இது. கண்டிப்பாகப் பரிந்துரைக்கக்கூடிய, இலக்கிய ஆர்வமுள்ளவர்களுக்கான நாவல்!

அரசியல் மற்றும் அரசாங்க உலகில் நிழல் மனிதனாக வளரும் கதாநாயகனின் வாழ்க்கையை சுவாரஸ்யமான முன்னிலையில் காட்டுகிறது இந்த நாவல். ஒவ்வொரு அத்தியாயமும் வெவ்வேறு கதாபாத்திரங்களை மையமாக வைத்திருந்தாலும், முக்கிய கதாபாத்திரங்களின் ஆழமான சித்தரிப்பு போதுமானதாக இல்லை.

கல்லூரி வாழ்க்கையை மையமாகக் கொண்ட பகுதிகள் மிகவும் வலிமையானவை. சில இடங்களில் கடுமையான நையாண்டியுடன் நடை பளிச்சிட்டாலும், ஒட்டுமொத்தமாக சராசரி அனுபவமாகவே இருந்தது.