அன்றாட வாழ்வில் நாம் கவனிக்கத் தவறும் சிறிய அசைவுகளையும் உணர்வுகளையும் இந்தக் கவிதைகள் அழகாகப் பதிவு செய்கின்றன. சில தருணங்களில் நிகழும் தவறுகள்கூட கல்யாண்ஜியின் பார்வையில் அழகாகத் தோன்றுகின்றன. வெயில், பழம், ஆறு, உப்பு போன்ற சாதாரண விஷயங்களிலும் உயிர் இருப்பதை உணர்த்துகிறார்.

இவற்றைப் படித்த பிறகு, இதை இப்படியும் பார்த்திருக்கலாமே என்ற புதிய பார்வை கிடைக்கிறது. நாம் கவனிக்காமல் தவறவிட்ட வாழ்க்கையை மீண்டும் பார்க்க வைக்கும் இந்தக் கவிதைகள் மனதை மெல்ல வருடுகின்றன.

கல்யாண்ஜியின் கவிதைகள் படித்தவுடன் புரிகின்றன; மனதில் பதிந்து காட்சியாகவும் கண்முன் நிற்கின்றன. தேர்ந்த எழுத்தாளர்களின் கவிதைகளைப் புரிந்துகொள்ள வழக்கமாகத் தேவைப்படும் மெனக்கெடல் இவற்றுக்கு இல்லை.

அன்றாட வாழ்க்கையை இத்தனை வேறொரு கோணத்தில் பார்க்கவும் ரசிக்கவும் முடியுமா என்று ஒவ்வொரு வரியும் வியக்க வைக்கிறது. இயல்பும் இயற்கையும் நிறைந்த, வாழ்க்கையையே கவிதையாக மாற்றிய தொகுப்பு இது. இவரைப் போல ஒரு கவிதையாவது எழுதிவிட்டால் என் பிறவிப்பயனை அடைந்ததாக உணர்வேன்.