தம்பியைக் காதலிக்கும் பெண்ணாக தனது வீட்டினுள் நுழையும் பெண்ணை, ஏமாற்றி திருமணம் செய்யும் நாயகன். அவன் மீது கோபத்தை பொழியும் நாயகியைத் தன் வசம் ஈர்ப்பானா? அவசரமாகத் திருமணம் செய்யும் காரண்மென்ன, பல சுவாரசியமான திருப்பங்களுடன், மனதைக் கொள்ளையடிக்கும் காதலுடனும்... என் காதல் நீயல்லவோ!

கதையில் இருந்து சிறு துளி!

தனது மடியில் மயங்கிச் சரிந்தவளைக் கையில் ஏந்திக்கொண்ட ஹ்ருதயனின் முகத்தில் சிறு பதற்றம்.

திருமணத்திற்கு வந்த சொந்தங்கள், மணப்பெண் மயங்கியதில் கிசுகிசுப்பாகத் தங்களுக்குள் ஏதோ பேசிக்கொள்ள, கங்காவிற்கு உள்ளம் பதறியது.

"ஷனா..." என அழைத்தபடி ஹ்ருதயன் அவள் கன்னத்தைத் தட்டி, முகத்தைத் தண்ணீரால் துடைத்து விட மெல்லக் கண் விழித்தாள்.

"காலைல சாப்பிட்டாளா?" கங்காவிடம் ஹ்ருதயன் வினவ, வசந்தன் பதில் அளித்தான்.

“இவள் நேத்து நைட்டே சாப்பிடல மாமா. காலைலயும் எதுவும் சாப்பிட்டது மாதிரித் தெரியல."

லக்ஷ்மன், "என்ன கங்கா இது. அவளைச் சாப்பிட வச்சுருக்கலாம்ல." எனக் கண்டித்திட,

"வந்தவங்களைக் கவனிச்சுட்டு இருந்தேங்க. கொஞ்ச நேரம் கழிச்சு சாப்பிட்டுக்கறேன்னு அப்படியே நேரத்தை ஓட்டிட்டா…" என்றவரின் முகத்தில் கவலை தெறித்தது.

கண்ணைக் கசக்கியபடி மெல்ல விழித்தவளுக்கு, ஹ்ருதயனின் முகமே அருகில் தெரிந்தது.

சரட்டென எழுந்து அமர்ந்தவள், "என்ன ஆச்சு?" என்பது போல அனைவரையும் பார்க்க, பைரவி நிலையைச் சரி செய்யும் பொருட்டு, "இதுக்குப் பேர் தான் அழகுல மயங்குறதா..." என்றாள் கேலியாக.

ஷனன்யாவிற்கு எங்காவது முட்டிக் கொள்ளலாம் போல இருந்தது. ‘இப்படியா பயத்தில் மயங்கி விழுவது?’ தன்னைத் தானே மானசீகமாக அறைந்து கொண்டவளை, ஆழ்ந்து ஏறிட்ட ஹ்ருதயன் வசந்தனிடம், "ஜூஸ் வாங்கிட்டு வா…" என்றான்.

ஐயரும், ஷனன்யாவை ஒரு மாதிரியாகப் பார்த்து விட்டு, "குங்குமத்தை நடுவகுத்துலயும், மாங்கல்யத்துலயும் வச்சுட்டு, அக்கினியைச் சுத்தி வாங்கோ" என்றிட, "ஜூஸ் வரட்டும்." என்றவன் இடத்தை விட்டு அசையவே இல்லை. அவளையும் அசைய விடவில்லை.

கழுத்தில் தொங்கிக் கொண்டிருந்த தாலியைப் பார்க்கப் பார்க்கக் கண் இருட்டிப் பின் தெளிந்தது.

வசந்தன் உடனடியாகப் பழச்சாறு வாங்கி வரவும், அதனை முழுதாய் அவளைக் குடிக்க வைத்த பிறகே மற்ற சம்பிரதாயங்களில் இறங்கினான் ஹ்ருதயன்.

"நொவ் பெட்டர்?" கேட்டவனைத் தீயாக முறைத்தாள்.

'இவனால தான மயங்கியே விழுந்தேன்' என்ற எரிச்சல் அவளுக்கு.

‘தான் விரும்புவதைத் தனது வாயால் கேட்ட பிறகும், ஏன் இந்த மடத்தனம்!’ எங்காவது ஓடி விடலாம் போல இருந்தது அவளுக்கு.

"மூளையை உடைச்சு யோசிச்சு முடிச்சாச்சா ஷனா?" பின்னிருந்து ஹ்ருதயனின் குரல் கேட்க, அவன் புறம் திரும்பவே இல்லை அவள்.

"நம்ம லவ் மேரேஜ்னு சொல்லிருக்கேன். உன் பேரண்ட்ஸும் அப்படித்தான் நினைச்சு இருக்காங்க. அதுக்கு ஏத்த மாதிரி நடந்துக்க." என்றான் கண்டிப்புடன்.

"நீங்க என்னை பிளாக்மெயில் பண்ணிக் கல்யாணம் பண்ணிருக்கீங்க ஹ்ருதயன். இட்ஸ் நாட் ஃபேர்…" கமறிய குரலில் அவன் புறம் நிமிர்ந்து கேட்க,

"இங்க பிரெட் ஹல்வா நல்லா இருக்கும். டேஸ்ட் பண்ணிப் பார்க்குறியா?" என அவள் கேட்டதற்கும் அவனுக்கும் சம்பந்தமே இல்லாத ரீதியில், அவளுக்காக அவனே தட்டில் உணவை நிரப்பித் தந்தான்.

"இருதயமே இல்லாத உங்களுக்கு யாரு ஹ்ருதயன்னு பேர் வச்சது?" யாரும் அறியாமல் சீறினாள்.

"எனக்குப் பேர் வச்சது யாருன்னு பொறுமையா விசாரிச்சுத் தெரிஞ்சுக்கலாம் ஷனா. அதுக்குள்ள, கட்டுன புருஷனோட வரலாறைத் தெரிஞ்சுக்க அவ்ளோ ஆர்வமா?" மின்னிய குறும்புதனை விழிகளுக்குள் அடக்கினான்.

"ஆமா, பெரிய காட் ஃபாதர் அஜித். இவர் வரலாறைத் தெரிஞ்சுக்க நாங்க துடிக்கிறோம்."

"காட் ஃபாதர் இல்ல தான். நீ மனசு வச்சா நம்ம பேபிக்கு ஃபாதர் ஆகலாம்." மீசை புன்னகைக்கத் துடித்தது.

அதில் திகைத்தவள், "மிரட்டிக் கல்யாணம் பண்ணுன மாதிரி, எல்லாத்துலயும் காரியம் சாதிக்க நினைக்காதீங்க ஹ்ருதயன்…" எனக் கோபத்துடன் மொழிந்தாலும் சிறு பயமும் வளர்ந்தது.

"எனக்குத் தேவைன்னா, எப்படியும் எந்த வழியிலயும் காரியம் சாதிச்சுடுவேன் ஷனா" அழுத்தம் திருத்தமாய் கூறினான்.

உள்ளுக்குள் ஒரு பயப்பந்து அவளது தொண்டைக்குள் அடைத்து நின்றது.