Reviews for தமிழக அரசியல் வரலாறு

இது ஆசிரியரின் செய்தித்தாள் பத்திகளிலிருந்து தொகுக்கப்பட்ட இரண்டு பாகத் தொடர். எளிமையான மொழியும் சுருக்கமான விவரிப்பும் இதன் சிறப்பு. முக்கிய அரசியல் நிகழ்வுகளின் பின்னணி காரணங்களை தெளிவான பட்டியலாக முன்வைக்கிறார். தலைவர்கள் தங்கள் கட்சிகளிலிருந்து பிரிந்து புதிய கட்சிகளை உருவாக்கிய தருணங்கள் உத்வேகமளிக்கின்றன.

காமராஜரின் கல்விக் கொள்கைகள் தமிழகத்தின் இன்றைய தொழில்துறை வளர்ச்சிக்கு அடித்தளமிட்டன. அண்ணாவின் சொற்பொழிவு ஆற்றலும் எளிய மொழித் திறனும் அரசியல் தொடர்பாடலையே மாற்றியமைத்தது. அண்ணாவுக்குப் பின் திமுகவின் நிலைத்தன்மையும் காங்கிரஸின் வீழ்ச்சியும் முக்கிய கருப்பொருளாக விளங்குகிறது. எம்.ஜி.ஆர் உண்மையான நிர்வாகத் திறன் கொண்ட நடிகர்-அரசியல்வாதியாக தனித்து நிற்கிறார். இந்தி திணிப்பை எதிர்த்தும் வலுவான கூட்டாட்சிக்காகவும் குரல் எழுப்பிய சில மாநிலங்களுள் தமிழகம் முதன்மையானது.

நான் அதிக நேரம் விரும்பி செலவு செய்த சில புத்தகங்களில் இதுவும் ஒன்று. சுதந்திரத்திற்கு பிறகான தமிழ்நாடு அரசியல் வரலாற்றை விரிவாக விவரிக்கும் நூல். இராஜாஜி தொடங்கி எம்.ஜி.ஆர் ஆட்சி வரை அரசியல் வரலாற்றை எளிமையான எழுத்து நடையில் விளக்குகிறது.

ஒவ்வொரு தேர்தலிலும் இந்தி திணிப்பு, இட ஒதுக்கீடு, ஈழத்தமிழர் பிரச்சினை ஆகியவற்றுக்கே கூடுதல் முக்கியத்துவம் தரப்படுவது வழக்கம். காவிரி பிரச்சனை, கூட்டணிகள், கச்சத்தீவு விவகாரம், சாதிக் கலவரங்கள், எமர்ஜென்சி என அத்தனை நிகழ்வுகளையும் கால வரிசையாக பதிவு செய்துள்ளார்.

சில இடங்களில் குறிப்பிட்ட ஒரு கட்சிக்கு மட்டும் ஆதரவாக கருத்துக்கள் பதிவு செய்யப்பட்டிருக்கின்றன. சர்க்காரியா கமிஷன் பற்றிய பகுதி மழுப்பலாக உள்ளது. இதை ஒதுக்கிவிட்டு பார்த்தால், அரசியலை தெரிந்து கொள்ள நல்ல புத்தகம். இன்றைய இளைய தலைமுறைக்கு அரசியல் பின்புலத்தை அறிந்து கொள்ள நிச்சயம் பயனுள்ள நூல்.

"அரசியல்ல இதெல்லாம் சாதாரணம்" என்ற வரி தான் புத்தகத்தை வாசிக்கும் போது மீண்டும் மீண்டும் நினைவில் வந்தது. நீதிக்கட்சியில் தொடங்கிய தமிழக அரசியல் எதிர்பாரா திருப்பங்களையும் அதிரடி காட்சிகளையும் அரங்கேற்றிக் கொண்டே வந்திருக்கிறது.

நீதிக்கட்சியில் இருந்து திராவிடர் கழகம், அதிலிருந்து திமுக, திமுகவிலிருந்து அதிமுக என ஒவ்வொன்றின் பின்னணியும் தெளிவாகவும் விறுவிறுப்பாகவும் எழுதப்பட்டிருக்கின்றன. முதுகுளத்தூர் படுகொலை, கீழ்வெண்மணி படுகொலை குறித்தும் சுருக்கமாக பேசப்பட்டுள்ளன.

காமராஜர், எம்ஜிஆர், ராஜாஜி என புனித பிம்பம் கொடுக்கப்பட்டிருக்கும் அனைவரின் அரசியல் முடிவுகளும் கூட்டணி கூத்துகளும் சிரிப்பை ஏற்படுத்துகின்றன. தமிழகத்தின் அரசியலை விறுவிறுப்பான நடையில் வாசித்து தெரிந்து கொள்ள மிகச் சரியான புத்தகம்.

அனைவரும் படித்து புரிந்துகொள்ள வேண்டிய நூல். ராஜாஜி முதல் எம்.ஜி.ஆர் வரையிலான அரசியல் வரலாறு விரிவாக பேசப்பட்டுள்ளது. விடுதலை தாகம், இந்தி திணிப்பு, கச்சத்தீவு விவகாரத்தில் மத்திய அரசு காட்டிய அலட்சியம் என அனைத்தும் மிகக் கொடுமையான விஷயங்கள்.

மிசா காலகட்டத்தில் தமிழகம் மட்டும் தான் சுதந்திர காற்றை சுவாசித்தது. மத்திய அரசின் அடக்குமுறையும், சிலரின் சூழ்ச்சியால் வீழ்த்தப்பட்ட வரலாறும் துல்லியமாக பதிவு செய்யப்பட்டுள்ளது. அண்ணாவின் தலைமையில் திமுக கண்ட சாதனைகள், 70 களில் கலைஞர் காட்டிய தைரியம், எம்.ஜி.ஆரின் பிரிவு என மின்னல் வேக வரலாறு. ஆவலுடன் பாகம் 2 எதிர்பார்க்கிறேன்!

காமராஜர், அண்ணாதுரை போன்ற தலைவர்களைப் பற்றி வாசிப்பது மிகவும் உத்வேகமளிக்கிறது. எமர்ஜென்சி காலத்தில் கருணாநிதியின் தைரியமான நிலைப்பாடும், அதிமுக தொடக்க ஆண்டுகளில் எம்.ஜி.ஆரின் அரசியல் அறிவிப்புகளும் இப்புத்தகத்தின் சிறப்பம்சங்கள்.

தமிழக அரசியல் என்றைக்குமே மந்தமாக இருந்ததில்லை, அது முதல் தேர்தலில் இருந்தே சுவாரசியமும் உற்சாகமும் கூடவே பல திருப்புமுனைகளும் கொண்டது. இந்திய அரசியலில் பெரிய அளவு செல்வாக்கை தமிழக அரசியல் தலைவர்கள் செலுத்தியுள்ளார்கள் என்பது இப்புத்தகத்தை வாசிப்பதன் மூலம் புலப்படுகிறது. படிக்கச் படிக்கச் ஆச்சர்யத்தை தூண்டிக் கொண்டே இருக்கிறது ஆசிரியரின் எழுத்து.

முதல் தேர்தலில் இருந்தே தமிழக அரசியல் பெரியாரை சுற்றியே நடந்தேறியுள்ளது. பெரியாரின் கமராஜர் ஆதரவு, திமுக விமர்சனம், 1967 வெற்றிக்கு பின் அண்ணா பெரியாரை சந்தித்தது, கலைஞரை முதலமைச்சராக்க விருப்பத்தை வெளிப்படுத்தியது, திமுக பிளவை எதிர்த்தது என பெரியாரின் தாக்கம் தொடர்ந்து கொண்டே இருக்கிறது.

1972 இல் தனி கட்சியை தொடங்குகிறார் எம்ஜிஆர், அது வரை கொள்கையை பேசி கொண்டிருந்த தொண்டர்கள், இந்த நிகழ்வுக்கு பிறகு தனிமனித துதி பாட தொடங்கி விட்டார்கள். அதிமுகவிற்கு என்று தீர்க்கமான கொள்கை இருந்ததே இல்லை. எமர்ஜென்சியை ஆதரித்த ஒரே கட்சி தமிழகத்தில் அதிமுக மட்டும் தான்.

சுதந்திரம் முதல் எமர்ஜென்சி வரை தமிழக அரசியலில் நிகழ்ந்த மாற்றங்களை இந்நூல் காலவரிசை அடிப்படையில் அருமையாக விளக்குகிறது. தமிழக சட்டமன்ற தேர்தல் நெருங்கும் இக்காலகட்டத்தில், இது போன்ற வரலாறுகளை புரிந்து வைத்துக்கொள்வது அவசியமானது.