Reviews for டாலர் தேசம்

மிகச்சிறந்த புத்தகம். இதைப் படிக்கும்போது அமெரிக்காவையும் அதன் வரலாற்றையும் பிற நாடுகளுடனான மோதல்களையும் நன்கு புரிந்துகொள்ள முடியும். பல போர்களிலும் அமெரிக்காவின் பங்கு எப்படிப்பட்டது என்பதை விரிவாக எடுத்துச்சொல்கிறது.

சுதந்திர தேவி சிலை புத்தக அட்டையில் இருக்கிறது. ஆனால் புத்தகத்தில் அதைப் பற்றி எந்தக் குறிப்பும் இல்லை என்பது ஒரு குறை.

அருமை! அற்புதம்! அட்டகாசம்!

அட்டகாசமான விறுவிறுப்பான புத்தகம். கண்முன் ஒரு வரலாறு ஓடியது. ஏன் வாஷிங்டன் என்ற பெயர் வந்தது, முதலாம் உலகப் போர்களில் அமெரிக்கா அடைந்த ஆதாயம், ஏன் அமெரிக்கா ஜெர்மனி மீது அணுகுண்டு வீசாமல் ஜப்பானிடம் வீசியது, மார்ட்டின் லூதர் கிங் மற்றும் ரூஸ்வெல்ட்டின் ஆளுமை, இரட்டைக் கோபுரத் தாக்குதலின் பின்னணி - இது போல பல சுவாரசிய விஷயங்கள் நிறைந்த புத்தகம். ஆசிரியரின் கடின உழைப்புக்கு நன்றி.

டாலர் தேசம் - அண்டம் பணியும் ஏகாதிபத்திய அமெரிக்காவின் பிறப்பும் எழுச்சியும், அதன் குள்ள நரித்தனமும், சித்தாந்தம் என்றால் இனிப்பா புளிப்பா என்ற அதன் அணுகுமுறையும், வல்லரசு என்ற ஒற்றைச்சொல் மேல் அதற்கிருந்த தீராக்காதலும் - அக்காதலால் அடிக்க வேண்டியவனை அடித்தும் அணைக்க வேண்டியவனை அணைத்தும் அழிக்க வேண்டியவனை தடம் தெரியாமல் அழிக்கும் அதன் குணாதிசயங்களைப் புரிந்துகொள்ள தமிழின் மிகச்சிறந்த புத்தகம்.

வரலாற்று நூல் புகழ் பா.ராகவனின் மற்றுமொரு மாஸ்டர் பீஸ்!

இந்தப் புத்தகத்தைப் படிக்க ஆரம்பித்தபோது படித்து முடிக்க முடியும் என்ற நம்பிக்கை இல்லை. தேர்வுகளை எழுதிவிட்டு மதியம் சில நேரம் படிக்கலாம் என்று அமர்வேன். பல மணிநேரம் போவதுகூட தெரியாமல் படிப்பேன். அத்தனை ஆர்வமூட்டும் நூல்!

அமெரிக்காவின் வரலாற்றைப் படித்தால் போதும், கடந்த நூற்றாண்டின் பெரும்பாலான உலக வரலாற்றைப் படித்தது போன்றது என்று முன்பு கேள்விப்பட்டிருக்கிறேன். அது உண்மை என்று இப்புத்தகத்தைப் படித்துப் புரிந்துகொண்டேன்.

உலக அரசியல் வரலாற்றைப் பற்றிய அடித்தளத்தைக் கொண்டது இந்நூல்!

ஒரு வல்லரசின் சுருக்கமான வரலாறு மிகப் பிரம்மாண்டமாக 1000 பக்கங்களில் விரிகிறது.

அமெரிக்காவை கண்டு ஏன் உலக நாடுகள் அஞ்சுகின்றன, எப்படி அசைக்க முடியாத வல்லரசாக உருவானது, ஆரம்ப காலக்கட்டங்களில் எந்த மாதிரியான இன்னல்களை சந்தித்தது என்பதெல்லாம் ஓரளவிற்கு கூற முயற்சித்திருக்கிறார். ராணுவரீதியாக அமெரிக்கா தன்னை வலுப்படுத்திக்கொண்டது மிகவும் பிரதானமாக்கி கூறப்பட்டுள்ளது. ஆனால் பொருளாதாரத்தைப் பற்றியோ, தன்னிறைவு கண்ட உள்கட்டமைப்பு பற்றியோ அவ்வளவாக விளக்கப்படவில்லை.

புத்தகத்தில் ஆங்காங்கே ஆச்சரியப்படுத்தும் பல விஷயங்கள் இருக்கின்றன. கடைசி கால் பகுதி ஒசாமா பின் லேடன் பற்றிய வருணனைகளில் போய்விடுவது கொஞ்சம் ஆயாசத்தை வரவழைக்கிறது. முதல் பாதியில் இருந்த சுவாரசியம் இரண்டாம் பாதியில் சற்றே குறைவு. புத்தகம் 2004 உடன் முடிவடைவதும் ஒரு சின்ன குறை. ஆனால் ஒரு அகண்ட தேசத்தின் வரலாற்றை 1000 பக்கங்களில் கொடுக்கும்போது இது போன்ற சின்ன குறைகளைப் புறந்தள்ளிவிடலாம்.

மொத்தத்தில் ஒரு நிறைவான வாசிப்பு.

இந்தப் புத்தகத்தின் சிறப்பே, தலைவர்கள் முக்கியமான தருணங்களில் எப்படி செயல்பட்டார்கள் என்ற நுண்ணறிவை வழங்குவதுதான். அமெரிக்கா எப்படி எப்போதும் உலக அரங்கில் முன்னணியில் நிற்கிறது என்பதை புரிந்துகொள்ள முடிகிறது. ஆர்வமூட்டும் எழுத்தாளர் பா.ராகவன் இந்தப் புத்தகத்திற்காக மிகுந்த உழைப்பையும் நேரத்தையும் செலவிட்டிருக்கிறார்.

அமெரிக்கா என்றவுடன் வல்லரசு என்ற சொல் தானாக நினைவுக்கு வருவதைத் தவிர்க்க முடியாது. பிரிட்டனின் 13 காலனி மாகாணங்கள் எப்படி இருபத்தோராம் நூற்றாண்டில் மிகப்பெரிய வல்லரசாக உருவானது என்ற கதையே டாலர் தேசம். இது குடியேறிகளின் தேசம்; குரூரமானவர்களின் தேசம்.

மொத்த அமெரிக்க வரலாற்றை நான்கு பெரும் பாகங்களாகப் பிரிக்கலாம்:

1. 1500 முதல் 1783 வரை - பிரிட்டனின் காலனித் தேசங்கள் சுதந்திரப் போரின் மூலம் ஒற்றைத் தேசமாக உருவெடுத்த வரலாறு. பண்ணைக்காரர் ஜார்ஜ் வாஷிங்டன் ஜனாதிபதி ஆன கதை.

2. 1783 முதல் 1914 வரை - செவ்விந்தியர்களின் இனஒழிப்பு, ஆப்பிரிக்காவிலிருந்து இறக்குமதி செய்யப்பட்ட அடிமைகளின் கண்ணீர் வாழ்வு. ஆபிரஹாம் லிங்கன், மார்ட்டின் லூதர் கிங், மால்கம் எக்ஸ் போன்ற உத்தமர்கள் உயிரைத் தந்து பெற்றுத்தந்த கறுப்பின சுதந்திரம். இதே காலகட்டத்தில் அமெரிக்கா தொழில்துறையை உலகுக்குத் திறந்து வைத்தது - உனக்கும் லாபம் எனக்கும் லாபம் என்ற பொருளாதாரக் கோட்பாடு.

3. 1914 முதல் 1945 வரை - இரு உலகப் போர்களின் காலத்தில் அமெரிக்கா தன்னை வல்லரசாக நிலைநிறுத்தியது. ஐரோப்பிய தேசங்களுக்கு குண்டூசி முதல் போர் விமானங்கள் வரை ஏற்றுமதி செய்யும் ஒன் ஷாப் ஸ்டாப்பாக மாறியது. கடனை திருப்பிச் செலுத்த முடியாத தேசங்களை வர்த்தகக் காலனிகளாக மாற்றிக்கொண்டது.

4. 1945 முதல் இன்றுவரை - கொரியா, வியட்நாம், கியூபா, ஈராக் என எண்ணற்ற போர்கள், ரஷ்யாவுடனான பனிப்போர், பயங்கரவாதத் தாக்குதல்கள். கம்யூனிசத்திற்கு எதிரான போர்களில் அடிவாங்கிய அமெரிக்கா, மத்தியகிழக்கு எண்ணெய்ப் போர்களில் வெற்றி பெற்றது.

1980 வரை நடுநிலையாக எழுதப்பட்டிருக்கிறது. ஆனால் இஸ்ரேல்-பாலஸ்தீன் விவகாரத்தில் ஆசிரியரின் வலதுசாரி சார்பு தெரிகிறது. இதைத் தவிர்த்துவிட்டுப் பார்த்தால், 400 ஆண்டு கால வரலாற்றை மிகச்சிறப்பாக பா.ராகவன் தொகுத்துக் கொடுத்திருக்கிறார். அமெரிக்காவின் அரசியல் யுத்தங்களைத் தீர்மானிக்கிறது, யுத்தங்கள் அடுத்தடுத்த அரசுகளைத் தீர்மானிக்கின்றன - இந்த சக்கரம் அமெரிக்க மக்களைப் பாதிக்காமல் பார்த்துக்கொள்வதே வல்லரசின் சூத்திரம்.

மிகப்பெரிய புத்தகம். நிச்சயம் படித்துப்பாருங்கள், உலக வரலாற்றின் குறுக்கு வெட்டுத் தோற்றம் கிடைக்கும்.

கொலம்பஸ் சென்றடைந்த கண்டம் வெறும் 500 ஆண்டுகள் பழமையானது. ஆனால் இன்று வல்லரசாக உலகை ஆட்டிப்படைத்து வருகிறது. எப்படி இது சாத்தியமாயிற்று என்பதை மிக விரிவாக எழுதியிருக்கிறார் ஆசிரியர் பா.ராகவன்.

23 மணிநேர ஒலிப்புத்தகம். கேட்பதற்கு சிறிது அயர்ச்சியாக இருந்தாலும், மிக விரிவாக தகவல்களைத் திரட்டி எழுதியிருக்கும் ஆசிரியரின் முயற்சி பாராட்டத்தக்கது.

அமெரிக்க சுதந்திரப் போரில் ஆரம்பித்து ஈராக் போர் வரை ஏறத்தாழ 230 ஆண்டு கால வரலாறு. ஆனால் இந்த 230 ஆண்டுகளில் போர்கள், சிஐஏயின் கைங்கரியத்தில் பிற நாடுகளில் எத்தனை பதவி கவிழ்ப்புகள் மற்றும் புரட்சிகள், செவ்விந்திய மற்றும் ஆபிரிக்க-அமெரிக்கர்கள் மீதான அடக்குமுறைகள் ஒருபுறமும், விஞ்ஞான மற்றும் கைத்தொழில் வளர்ச்சி மறுபுறமும் என அமெரிக்க வரலாறெங்கும் இரத்தமும் பணமும் ஆறாக ஓடியிருக்கின்றது.

பா.ராவின் அதிக அலட்டலில்லாத இயல்பான மொழிநடையும், அமெரிக்கா நேரடியாகவோ மறைமுகமாகவோ நிகழ்த்திய எண்ணற்ற போர்களும் நூலை சுவாரஸ்யம் குறையாமல் நகர்த்துவதால் 600+ பக்கங்கள் என்ற உணர்வே இன்றி வாசிக்க முடிந்தது.

வாசிக்கும்போது சில தவறுகளை அவதானித்தேன். ஜோர்ஜ் வாஷிங்டன் அமெரிக்காவின் முதல் அதிபர் தான், எட்டாவது கிடையாது. அவருக்கு முன்னிருந்தவர்கள் காங்கிரஸால் நியமனம் மூலம் தேரிவு செய்யப்பட்ட கான்டினென்டல் காங்கிரஸ் தலைவர்கள். இப்பதவி சபாநாயகர் போன்ற பதவியேயன்றி அதிபர் பதவிக்கும் இதற்கும் சம்பந்தமில்லை. அவர்கள் மொத்தம் 14 பேர், 7 பேர் அல்ல. முதல் தலைவர் பேட்டன் ராண்டால்ப், ஹன்சன் அல்ல.

இன்னொரு தவறு - நாஸி கட்சியை உருவாக்கியது ஹிட்லர் அல்ல, அன்ரன் டிரெக்ஸ்லர்.

தென்னமெரிக்க நாடுகளில் அமெரிக்கா நிகழ்த்திய திருகுதாளங்களையும் செவ்விந்தியர்களுக்கு நிகழ்த்தப்பட்ட அநீதிகளையும் விரிவாக விவரித்து, பின்லேடன் பற்றிய அத்தியாயங்களை சுருக்கியிருப்பின் இந்நூல் மேலும் சிறப்பாக அமைந்திருக்கும். முழுமையாக நோக்கின் இந்நூல் அமெரிக்க வரலாற்றை சுருக்கமாக அறிந்துகொள்ள உதவும் என்பதில் ஐயமில்லை.

புத்தகத்தின் சைஸை பார்த்தால் சற்று மலைப்பாகத்தான் இருந்தது. வரிகள் மறைந்து போய், பக்கங்கள் திரும்புவது தெரியாமல் மனக்கண்ணில் நாமும் நிகழ்வுகளோடு ஓடிக்கொண்டிருப்பது ஒரு நாவல் வாசிப்பில் நிகழலாம். வரலாற்றையும் இவ்வாறு படிக்க ராகவனைத்தான் தேடவேண்டும். எழுத்தும் நடையும் அப்படி.

நானூறு ஆண்டுகளுக்கு முன் அமேரிக்கா என்னும் நாடே இல்லை. ஆனால் கடந்த நூறு வருடங்களில் அமெரிக்கா இல்லாமல் உலக வரலாறே இல்லை. உலக நாட்டாமை, உலக போலீஸ், தொழில்நுட்ப, ராணுவ, வர்த்தக ஏகாபத்தியம் என்று பல ரோல்கள். அவர்கள் வரலாற்றைத் தொடர்ந்தால் 20ஆம் நூற்றாண்டின் முக்கிய நிகழ்வுகள், நாடுகள், மனிதர்கள் எல்லாவற்றையுமே படிக்க முடிகிறது.

அவர்களுக்குத் தெரிந்ததெல்லாம் பிசினஸ் மட்டுமே. ஆட்டோமொபைல், எலெக்ட்ரானிக்ஸ், கம்ப்யூட்டர், சாப்ட்வேர், சில்லறை வர்த்தகம் என்று எல்லாமே பெரு முதலாளிகள். அமெரிக்க அரசாங்கம் அவர்களுக்கு மேலே முதலாளிகளுக்கெல்லாம் முதலாளி. ஒரு வர்த்தக நிறுவனத்திற்கு என்ன வெளியுறவுக் கொள்கை இருக்குமோ அதே போன்றதொரு தேசக் கொள்கை.

ஒரு நாடு போரில் பங்கு பெறுகிறது என்றால் அதன் பொருளாதாரம் சுணங்கிப் படுக்கும் என்பது இயல்பு. ஆனால் அமெரிக்கா இல்லாத போரே இல்லை. தென் அமெரிக்கா, ஐரோப்பா, வளைகுடா, ஆப்ரிக்கா, மேற்காசியா, கிழக்காசியா, கொரியா என மனித சஞ்சாரம் உள்ள எல்லாப் பக்கமும் சண்டைக்குப் போயிருக்கிறார்கள். முக்கால்வாசி இன்னொரு நாட்டுக்குள் வாலண்டியராக மூக்கை நுழைத்து பஞ்சாயத்து பண்ணியது. ஆனாலும் அதன் ராணுவ பட்ஜெட் பல பில்லியன்கள் கூடிக்கொண்டே போகுதே தவிர உள்நாட்டு சொகுசுக்கும் குறைவில்லை.

புத்தகத்தின் தலைப்பைப் பார்த்தபோது வித்தியாசமாகத் தெரிந்தது. அதென்ன அரசியல் வரலாறு? வரலாறு என்று சொன்னால் மட்டும் போதாதா? யோசித்துப் பார்த்தால் அமெரிக்காவுக்கு என்று வேறு எந்த வரலாறும் கிடையாது. கலை, கலாச்சாரம், மொழி, மதம் என்று எல்லாமே இரவல் வாங்கியது அல்லது இல்லவே இல்லை.

ஏறக்குறைய வாஸ்கோ த காமா இங்கு கால் ஊன்றியபோது தான் கொலம்பஸ் அங்கு கால் ஊன்றினார். தொடக்கத்தில் அவர்களும் ஒரு பிரிட்டன் காலனி தான். ஒரு வித்தியாசம் - அப்போது நம்மிடம் எல்லாமே இருந்தது, அவர்களிடம் ஒன்றுமே இல்லை. விடுதலைப் போராட்டம், உலகின் முதல் ஜனநாயக நாடு என்று அதன் பிறகு அவர்கள் தேர்ந்தெடுத்த பாதை தான் டாலர் தேசம்.

பத்தாண்டுகளுக்கு முன் வந்த புத்தகம். ஜூனியர் புஷ் சதாமை கொன்று 2005ல் இரண்டாவது முறையாக அதிபர் தேர்தலை எதிர்நோக்கியதோடு முடிகிறது. ஆனாலும் அமெரிக்காவைத் தமிழில் புரிந்துகொள்ள ஏதுவான புத்தகம்.