Reviews for மூன்றாம் உலகப் போர்

எளிய நடையில் ஒரு உலக அரசியலைச் சொல்லும் புத்தகம்.

ஒரு விவசாயியின் வாழ்க்கை பற்றிய உண்மையான படைப்பு. எமிலி மற்றும் சின்னப்பாண்டி கதாபாத்திரங்கள் மிகவும் நன்றாக இருக்கின்றன, குறிப்பாக எமிலி. அனைவரும் கட்டாயம் படிக்க வேண்டிய புத்தகம் — விவசாயமும் விவசாயியும் எவ்வளவு முக்கியம் என்பதை இந்த நாவலைப் படித்தாவது தெரிந்துகொள்ள வேண்டும்.

கதையின் போக்கு சற்றே நழுவி கட்டுரையின் போக்காக மாறியது. விவசாயம் பற்றியும் புவி வெப்பமயமாதல் பற்றியும் கருத்துகளை தொடர்ந்து சொல்லிக்கொண்டே இருக்கிறார். எமிலியும் இஷிமுராவும் கதையோடு ஒட்டாமல் இருப்பது சலிப்பை ஏற்படுத்துகிறது. இறுதி அத்தியாயங்கள் செல்லச்செல்ல கதை எப்போது முடியும் என்ற எதிர்பார்ப்புடன் பக்கங்களை நகர்த்தியவாறே புத்தகத்தை முடிக்க வேண்டியதாகியது.

சில பகுதிகள் பிடித்திருந்தன. க்ளைமாக்ஸ் மிகவும் நன்றாக இருந்தது. ஆனால் இரண்டு வெளிநாட்டுக் கதாபாத்திரங்கள் மிகவும் செயற்கையாக இருந்தன. சில இடங்களில் வரும் கவிதை வரிகள் கதையின் ஓட்டத்துடன் பொருந்தாமல் செயற்கையாகத் தெரிந்தன. சின்னப்பாண்டியின் காதல் உணர்வுகள் கதையுடன் ஒட்டவில்லை — அது தேவையற்றது. ஆசிரியர் எடுத்துக்கொண்ட கருத்துக்கு முழு நியாயம் செய்யவில்லை என்று தோன்றுகிறது.

பிரபலமான ஒருவர் இந்தப் பொருளைப் பேச முனைந்ததற்கே பாராட்ட வேண்டும். பல தகவல்கள் நிறைந்த நூல். இப்படி ஒரு எழுத்தாளர் எழுதும்போது கருத்துகள் பல்வேறு தளங்களைச் சென்றடையும் என்பதில் சந்தேகமில்லை. சிற்சில ஓட்டைகள், செயற்கையான சில கதாபாத்திரங்கள் உள்ளன. நிச்சயம் வாசிக்கலாம், ஆனால் வைரமுத்துவின் மற்ற சிறந்த படைப்புகளோடு ஒப்பிட முடியாது.

கிராமக் கதைப் பகுதிகள் கள்ளிக்காட்டு இதிகாசம், கருவாச்சி காவியம் போன்ற படைப்புகளை நினைவூட்டினாலும், வைரமுத்துவின் சொற்களும் சிந்தனைகளும் "இவர் எப்படி எப்போதும் புதுமையாக நினைத்து, சாதாரண விஷயங்களை வித்தியாசமாகப் பார்க்கிறார்?" என்று வியக்க வைத்தன. வைரமுத்துவின் புத்தகம் படிக்கும் ஒவ்வொரு முறையும் தமிழ் மொழியின் மீது காதல் பெருகுகிறது. இந்தப் புத்தகம் நம் சுற்றுச்சூழலைப் பற்றியும் சிந்திக்க வைக்கிறது.

போர்கள் மனித நாகரிகத்தின் அடித்தளம் என்ற கோணத்தில் தொடங்கி, இன்றைய மூன்றாம் உலகப்போர் விவசாயம் சார்ந்தது என்று நிரூபிக்கும் புத்தகம். சேர-சோழ-பாண்டிய மன்னர்களின் போர் வீரத்திலிருந்து இன்றைய விவசாயிகளின் போராட்டம் வரை — வரலாற்றையும் நிகழ்காலத்தையும் இணைத்து சிந்திக்க வைக்கும் படைப்பு.

ஒரு பக்கத்தில் விவசாயிகள் பற்றி வைரமுத்து குறிப்பிடும்போது வியந்துபோனேன் — "திறந்த வானம், தாவரக்காற்று, திசைகளுக்குச் சுவர்கட்டி நிற்கும் தூரத்து மலைகள், பறவைகளின் பாடல்கள், மழைத்துளிகளின் ஆசீர்வாதம் — இதற்குள்தான் உங்கள் தொழில்; இதற்குள்தான் உங்கள் வாழ்க்கை எனில் யாருக்கு வாய்க்கும் இது?" விவசாயிகளின் வாழ்வின் அழகை இப்படி வர்ணிக்க வைரமுத்துவால் மட்டுமே முடியும்.

உலகத் தமிழர்கள் எல்லோரும், குறிப்பாக இளைஞர்கள் கட்டாயம் படிக்க வேண்டிய புத்தகம். சீனிச்சாமியின் உணர்ச்சிகரமான ஃப்ளாஷ்பேக், சுழியனும் பன்றி மேய்ப்பவளும் செய்யும் காதல் சரசங்கள், கருத்தமாயின் மாஸ் க்ளைமாக்ஸ் எல்லாம் எனக்குப் பிடித்த காட்சிகள். ஒரு விவசாயியின் துக்கத்தைப் பகிர்ந்துகொண்ட அனுபவம் நிச்சயம் கிடைக்கும்.

ஆழ்கடலில் குதித்து அறிவுச் சிப்பிக்குள் உணர்வென்னும் முத்தை, வைரம் போன்ற கூர்மையான வார்த்தைகளால் செதுக்கிக் கீறியெடுத்து முத்தாய் மிளிர்வது இந்தப் புத்தகம் மட்டுமல்ல, வாசித்த பின் நம் மனமும்தான். மூன்றாம் உலகப்போர் — இது வெறும் புத்தகம் அல்ல, மனிதன் ஒவ்வொருவனும் வாழ வேண்டிய பெரும் வாழ்வு!