மகே காதலே : Mage Kathale (Tamil Edition)

இலங்கை தமிழில் மற்றும் ஒரு கதை... சிங்கள தமிழ் காதல்

கதையில் இருந்து ஒரு டீசர்

அடுத்த நாள் ராதிகாவின் பிறந்தநாள்... காலையில் எழுந்தவளோ அருகே இருந்த கோவிலுக்கு சென்று விட்டு அலுவலகத்துக்கு கிளம்பினாள். சிவப்பு நிற புடவை அணிந்து, நெற்றியில் திருநீறு பூசி, வந்தவளை ஆச்சரியமாகப் பார்த்த சாந்தனோ, "இண்டைக்கு என்ன ஸ்பெஷல்?" என்று கேட்க, "பேர்த் டே சாந்தன்" என்றாள் அவள்... "ஹப்பி பேர்த் டே மிஸ்" என்று சாந்தன் கையை குலுக்கி வாழ்த்தி இருக்க, பிரியந்தவோ அவளை அறைக்குள் அழைத்து இருந்தான். புடவையுடன் தனக்கு முன்னே நின்றவளை உறுத்து விழித்தான் பிரியந்த. "அய்யே" என்று அவள் ஆரம்பிக்க முதலே, "இண்டைக்கு சைட் விசிட் போகனும் எண்டு தெரிஞ்சும் ஏன் சாரீல வந்து இருக்கா?" என்று சிங்களத்தில் சீறினான்... அவளுக்கோ அவன் பேசியது முற்றாக புரியவே இல்லை. ஆனாலும் குத்து மதிப்பாக யூகித்துக் கொண்டவளோ, ஏதோ சொல்ல வர முதலே, "எனக்கு தெரியும், சோம்பேறி தனத்துல தான் வேணும் எண்டே சாரி கட்டி வந்து இருப்பா, நேத்தும் சுகமில்ல என்று நாடகம் ஆடுனநீனி தானே, வெளிய போ, அப்பிடியே ஒஃபிஸ் ல சீட்டை தேய்ச்சிட்டு இரு, ஒண்டும் செஞ்சு கிழிக்காதே" என்று சிங்களத்தில் திட்டு விழுந்தது. 'ஏதோ ஏசுறார் எண்டு மட்டும் தெரியுது, என்ன எண்டு தெரியலையே, விளங்குன போல மூஞ்சை வச்சுப்போம்' என்று நினைத்துக் கொண்டே முகத்தை பாவமாக வைத்துக் கொண்டாள் ராதிகா... "சொன்னது ஏதாவது மூளைல ஏறுதா?" என்று சிங்களத்தில் தான் கேட்டான். 'என்ன கேக்கிறார் எண்டு தெரியல, ஏதோ கேள்வி கேக்கிறார் எண்டு மட்டும் தெரியுது' என்று நினைத்துக் கொண்டே, அவனை ஏறிட்டுப் பார்க்க, "கியன்ன" (சொல்லு) என்றான். 'ஏதோ சொல்ல சொல்றார், கேள்வி விளங்குனா தானே சொல்றதுக்கு' என்று நினைத்துக் கொண்டே, குத்து மதிப்பாக ஆமோதிப்பாக தலையாட்ட, "கெட் அவுட்" என்று சொன்னான். 'அப்பாடா இதுவாச்சும் இங்க்லிஷ் ல சொன்னார், இல்ல எண்டா பைத்தியம் போல இங்கயே நிண்டு இருப்பேன்' என்று நினைத்துக் கொண்டே வெளியே வர, சாந்தனோ, "ராதிகா மிஸ், சேர் பேர்த் டே க்கு விஷ் பண்ணுனாரா?" என்று கேட்க, அவளோ அவனை மேலிருந்து கீழ் பார்த்துக் கொண்டே, "க்கும், அத சொல்ல விட்டா தானே, சாரி உடுத்து வந்துட்டனாம் எண்டு ஏசிட்டே இருக்கார், என்ன ஏசுனார் எண்டு தெரியல, விளங்காத வரைக்கும் சந்தோஷம் தான்" என்று சொல்லிக் கொண்டே, தனது இருக்கையில் அமர்ந்து தனக்கு முன்னே இருந்த ஃபைல்களை பார்த்தபடி, "சரியான துவேசம் பிடிச்ச ஆள் போல" என்றாள். "பிரியந்த சேரையா சொல்றீங்க? அவர் நல்ல மாதிரி தானே... இதுக்கு அவர்ட அப்பா மினிஸ்டர் தெரியும் தானே" என்று கேட்க, "ஓம் ஓம் ஜெயக்கொடி, தமிழ் மக்கள் இருக்கவே கூடாது எண்டு கோஷம் போட்ட ஆள் தானே, அதே ரத்தம் பிறகு எப்பிடி இருக்கும்? எல்லாம் நடிப்பு" என்று முடிக்கவில்லை, "மிஸ் பின்னால பாருங்க" என்று சொல்லிக் கொண்டே சாந்தன் அங்கிருந்து நகர்ந்து விட, பின்னால் திரும்பிப் பார்த்தவளுக்கு தூக்கி வாரிப் போட்டது... மார்புக்கு குறுக்கே கையை கட்டிக் கொண்டே நின்று இருந்தது என்னவோ பிரியந்த தான்... பயத்துடன் எச்சிலை கூட்டி விழுங்கிக் கொண்டே எழுந்து நின்றவளோ, 'வாயை வச்சுட்டு சும்மா இருக்க வேண்டியது தானே ராதிகா' என்று தனக்கு திட்டியவளோ, 'அவருக்கு தமிழ் தெரிஞ்சு இருக்காது, சமாளிப்போம்' என்று தனக்கு தானே சமாதனம் சொல்லிக் கொண்டே, அவனை பார்த்து மெலிதாக புன்னகைத்தாள். பெருமூச்சுடன் அவள் அருகே வந்தவன், "சிங்கள தன்னவத?" (சிங்களம் தெரியுமா?) என்று கேட்டான். "சுட்டக் சுட்டக் தன்னவா" (கொஞ்சம் கொஞ்சம் தெரியும்) என்றாள். இதழ் குவித்து ஊதிக் கொண்டே, அவளை மேலிருந்து கீழ் பார்த்தவன், "எனக்கு நல்லாவே தமிழ் தெரியும்" என்றானே பார்க்கலாம்... அழகு தமிழில் பேசினான். அவளுக்கோ புரையேறி விட்டது... இருமிக் கொண்டே வாயை மூடியவள், 'போச்சு போ, இப்ப நான் கதைச்சது எல்லாமே விளங்கி இருக்குமே' என்று நினைத்துக் கொண்டே, அவனை மிரட்சியாக பார்க்க, "என்ட அப்பாவை வச்சு என்ன எடை போடதே, அவர் வேற நான் வேற, விளங்குதா?" என்று கேட்டான்.