Reviews for திராவிட இயக்க வரலாறு - முதல் பாகம்

திராவிட இயக்கத்தின் வரலாற்றை எளிதாகப் படிக்கக்கூடிய நடையில் எழுதப்பட்ட நூல். திமுக உருவாவதற்கான காரணங்களையும் சூழல்களையும் தெளிவாக விளக்குகிறது.

ஜஸ்டிஸ் கட்சி (நீதிக் கட்சி) உருவெடுத்த காரணமும், அதிலிருந்து திராவிட இயக்கம் பிறப்பதற்கான சூழலையும் சீரிய நடையில் அழகாய் விளக்கியிருக்கும் முத்துக்குமார் பாராட்டுதலுக்கு உரியவர்.

பெரியாரைப் பற்றியே வெகுவாக அறிந்த என்னைப் போன்றோருக்கு மாதவன் நாயர், தியாகராயச் செட்டியார், பனகல் அரசர் ராமராய நிங்கார் போன்றோரின் சமூக நீதிப் புரட்சிகளைப் பற்றி அறிவதற்கு இந்நூல் ஒரு நல்ல முன்னுரையாகத் திகழ்வது மகிழ்ச்சி. வகுப்புவாரி உரிமையை (கம்யூனல் ஜி.ஓ) பாமரர் பெற ஜஸ்டிஸ் கட்சி ஆற்றிய மாபெரும் தொண்டை தெளிவாக விளக்கும் அரசியல் சான்றாகவும் இந்நூல் விளங்குவது இதன் தனிச்சிறப்பு.

தந்தை பெரியாரால் திராவிடம் மலர்ந்த விதமும், அவரையே பின்னாளில் எதிர்க்க நேர்ந்து அண்ணாவால் உதயமாகிய திராவிட முன்னேற்றக் கழகத்தையும் பற்றிப் படிக்கப் படிக்க வியப்பும் ஆவலும் புத்தகத்தின் கடைசி பக்கம் வரை தொடர்வது வியப்பான உண்மை. உண்மைக்கும் சுவாரஸ்யத்திற்கும் இடையிலான இடைவெளியைத் தனது நேர்த்தியான நடையின் மூலம், உண்மை திரியாமலும் பொருள் சிதையாமலும் வேகம் குறையாமலும் தந்து வியப்பில் ஆழ்த்துகிறார் முத்துக்குமார்.

பல இடங்களில் அச்சுப் பிழை காரணமாகவோ பதிப்பாளர்களின் கவனக் குறைவினாலோ, முக்கியமான நிகழ்வுகளின் தேதிகள் முன்னும் பின்னுமாக இருப்பது இப்படைப்பின் சாரத்தைக் கெடுக்கும் விதத்தில் அமைந்துள்ளது. ஆனால் திராவிட இயக்கத்தின் மலர்ச்சியை எளிமையாக அறிய இந்நூல் கண்டிப்பாகப் பயன்படும். தமிழ்நாட்டின் அரசியல் வரலாற்றைத் திராவிட இயக்கப் பார்வையில் தெரிந்துகொள்ள விரும்பும் அனைவருக்கும் பரிந்துரைக்கத்தக்கது.

திராவிட இயக்கத்தின் வரலாற்றை முழுமையாகக் கூறும் இரு நூல்களின் முதல் பாகம். நீதிக் கட்சியாகத் தோன்றி, பெரியாரின் கீழ் திராவிடக் கழகமாக உருமாறி, பின் அண்ணாவால் ஆட்சிப் படியில் ஏறும் அளவுக்குக் கொண்டு வரப்பட்ட வரலாற்றை மிக விலாவாரியாகச் சொல்லும் நூல்.

தென்னிந்தியாவின் பல தலைவர்களைப் பற்றி நிறைய தெரிந்துகொள்ள முடிகிறது இந்தப் புத்தகத்தின் மூலம். இராஜாஜி, பெரியார், அண்ணா, பாரதிதாசன், என்.எஸ்.கே, சம்பத், கருணாநிதி, எம்.ஜி.ஆர் — இப்படிப் பல தலைவர்களின் அரசியல் செயல்பாடுகள் விலாவாரியாகக் கூறப்பட்டுள்ளன. இயக்கத்தை வளர்க்கப் பாடுபடுவதும், மன வருத்தங்களால் பிரிவதுமான இவர்களின் செயல்கள் மிகச் சுவாரஸ்யம்.

குறிப்பிட்டுச் சொல்ல வேண்டிய இருவர் — பெரியார் மற்றும் அண்ணா! நீதிக் கட்சியின் ஆரம்பக் காலங்களில் இருந்தே ஈடுபட்டு, திராவிடக் கழகமாக மாறியதற்கு முக்கியக் காரணகர்த்தாவாக இருந்து, திமுக பிரிந்து சென்ற பின்னும் கழகத்தைச் சீராக நடத்திவந்த ஈ.வெ.ரா பெரியார் — திராவிட இயக்கத்தின் பிதாமகர். கருத்து வேறுபாடுகள் ஏற்பட்டவுடன் திமுகவாகப் பிரிந்து, கொஞ்சம் கொஞ்சமாக மக்களின் ஆதரவைத் திரட்டி, பல வருடங்கள் போராட்டத்திற்குப் பின் காங்கிரஸை வீழ்த்தி ஆட்சியைப் பிடிக்கச் செய்தது அண்ணாவின் மகத்தான சாதனை. இருவருக்குமான உறவு மிக அருமையாகச் சொல்லப்பட்டிருக்கிறது.

பார்ப்பனர்களை எதிர்ப்பதில் கொஞ்சம் அதிகமாகத்தான் போனரோ திராவிடக் கழகத்தினர் என்ற சந்தேகம் புத்தகம் முழுவதும் உறுத்திக்கொண்டே இருந்தது. சுதந்திரத்திற்கு முந்தைய இந்தியாவில் நடக்கும் அரசியல் நிகழ்வுகளை ஒரு காங்கிரஸ் அல்லாத கண்ணோட்டத்தில் வாசிப்பது மிகச் சுவாரஸ்யம்! பல இடங்களில் ஆசிரியர் நடுநிலை வகிக்காமல் இருப்பது புத்தகத்தின் ஒரு பெரிய குறை என்றாலும், சுதந்திரத்திற்கு முந்தைய தமிழகத்தின் அரசியல் வரலாற்றைத் திராவிட இயக்கப் பார்வையில் அறிந்துகொள்ள ஒரு அருமையான புத்தகம்!

தென்னிந்தியாவின் சமீபகால அரசியல் வரலாற்றை 1909 முதல் 1969 வரை ஆவணப்படுத்தும் முக்கியமான நூல். போதுமான காலப் பின்னணி இருப்பதால் நடுநிலையான பதிவாக அமைந்துள்ளது. திராவிட இயக்கத்தின் தோற்றமும் வளர்ச்சியும் சிறப்பாக எழுதப்பட்டுள்ளன.

திராவிடத் தத்துவமும் அதன் பரிணாமவளர்ச்சியும், இரு மொழிக் கொள்கை, பிராமண ஆதிக்கத்திற்கு எதிரான போராட்டம், தீண்டாமை ஒழிப்பு, பெண்கள் வாக்குரிமை, கோயில் சொத்துகளில் வெளிப்படைத்தன்மை, சாதி அடிப்படையிலான கல்வி ஒழிப்பு, மக்கள்தொகை அடிப்படையிலான இட ஒதுக்கீடு, மொழி வாரி மாநிலப் பிரிவினை போன்ற பல முக்கிய மாற்றங்களை இந்நூல் விவரிக்கிறது.

பெரியாரை மார்க்ஸுக்கும், அண்ணாவை லெனினுக்கும் ஒப்பிடலாம் — பெரியார் தத்துவ ஆதாரத்தை வழங்கினார், அண்ணா அதை நடைமுறைப்படுத்தினார். பிரெஞ்சுப் புரட்சியின் சுதந்திரம், சமத்துவம், சகோதரத்துவம் என்ற கொள்கைகளை பெரியார் சுயமரியாதை இயக்கமாகவும் பகுத்தறிவாகவும் மாற்றியமைத்தார்.

இந்தியாவின் ஜனநாயகத்தின் மிகப்பெரிய வெற்றி, அனைத்துக் கட்சிகளையும் தேர்தல் ஆணையத்தின் கீழ் கட்டுப்படுத்தியது. நாடகம், கவிதை, திரைப்படம் என கலையைப் பயன்படுத்தி அரசியல் செயல்பாடுகளுக்கு நிதி திரட்டியதும், என்.எஸ்.கிருஷ்ணன், கண்ணதாசன், பாரதிதாசன், எம்.ஜி.ஆர்., சிவாஜி கணேசன் போன்ற கலைஞர்களின் அரசியல் தொடர்பும் சுவாரஸ்யமான அம்சங்கள்.

திராவிட இயக்க வரலாறு பாகம் ஒன்று படித்து முடித்தாயிற்று. தமிழ்நாட்டின் அரசியல் வரலாற்றைப் பொறுத்தவரை இந்தியா ஜனநாயக நாடாக மாறியதற்கு முன்பிலிருந்து இன்றுவரை மாநிலம் மற்றும் மொழி சார்ந்த அரசியலில் வலுவான கரம் கொண்டுள்ளது. 1967ல் காங்கிரஸ் ஆட்சி அல்லாத முதல் மாநிலம் என்ற நிலையை கொண்டுவந்த தருணம், இந்திய அரசியல் வரலாற்றில் நீங்கா இடம் பிடித்துள்ளது.

டில்லி மையமாக எழுதப்படும் வரலாற்றில், திராவிட இயக்க வரலாறு என்பது பிராமண எதிர்ப்பு, ஹிந்து மத வெறுப்பு, பிரிவினைவாதப் போக்கு மற்றும் மொழி பேரினவாதம் என்று குறுகிய மனப்பான்மையுடன் சித்தரிக்கப்படுகிறது. ஆனால் திராவிட இயக்க வரலாறு என்பது ஆதிக்க வர்க்கத்தினரிடம் உரிமைக்காகப் போராடிப் பெற்ற சுயமரியாதைப் போராட்டத்தின் கதை. அதை மிக எளிய முறையில், விறுவிறுப்பான நடையில், சற்றும் சலிப்பு தட்டாத வகையில் எழுதியுள்ளார் ஆர். முத்துக்குமார்.

நீதிக் கட்சி முதல் அண்ணா ஆட்சி வரை இப்பாகத்தில் மிகச் சுருக்கமாகவும் ஒரு அத்தியாயத்திற்கு வெறும் நான்கு அல்லது ஐந்து பக்கங்களில் படிப்பவர்களுக்கு எளிதான வகையில் ஆசிரியர் எழுதியுள்ளார். தென்னிந்திய நலஉரிமைச் சங்கம் என்று தொடங்கி திராவிட முன்னேற்றக் கழகம் என்று பரிணமித்த வரலாற்றை இப்புத்தகம் விவரிக்கிறது.

பெரியார் காங்கிரசில் இருந்து விலகி, அதைத் தொடர்ந்து திராவிடர் கழகம் கடந்துவந்த பாதையை சீரிய நடையில் 300 பக்கங்களில் எழுதியுள்ள ஆசிரியர் பாராட்டுக்குரியவர். தேசியவாதப் பார்வையில் பெரியார் நடத்திய மொழி உரிமை மற்றும் சமூக நீதிப் போராட்டங்கள் அடிப்படைவாதமாகவும் பிரிவினைவாதமாகவும் கட்டமைக்கப்பட்டாலும், அன்றைய சூழலில் யானை பலம் கொண்ட காங்கிரசுக்கு நேர் எதிர் துருவ அரசியல் செய்த இயக்கத்தின் வரலாற்றைப் படிக்கும்போது மிகுந்த வியப்பும் ஆச்சர்யமும் தருகிறது.

திராவிடர் கழகத்திலிருந்து திமுக எனப் பிரிந்து, மிகுந்த பொறுமையுடனும் சாமர்த்திய அரசியல் நுணுக்கத்துடனும் ஒவ்வொரு தேர்தலாக வளர்ச்சி பெற்று, பிறகு மக்களின் பேராதரவுடன் ஆட்சி அமைத்த வரலாற்றை இந்தப் புத்தகம் மிகச் சிறப்பாக விளக்கியுள்ளது. அண்ணாவின் மரணம் வரை இடம்பெற்றுள்ள இப்பாகத்தில் நிறைய அறியப்படாத தகவல்கள் கிடைத்தன.