Reviews for பள்ளிகொண்டபுரம்

நாவலின் ஆரம்ப பகுதிகளில் திருவனந்தபுரம் கோயில் வீதிகள் தத்ரூபமாக வர்ணிக்கப்பட்டுள்ளன. பழகியவர்கள் ஏக்கமுற உணரலாம், புதிதாகச் செல்பவர்கள் கவனிக்கலாம்.

நாவலின் இறுதி பகுதிகள் பிடித்திருந்தன. அதிர்ச்சியளிக்கவில்லை, ஆனால் அகச்சிக்கல்களைப் பேசியது நிறைவானது. எழுத்துநடையில் ஒரு குறையுமில்லை — தொடர் வாசிப்பு அயர்ச்சியை உண்டுபண்ணாத கதையும் மொழியும்.

ஒரு மனிதனின் வாழ்க்கைப் பயணத்தையும் அவன் வாழ்வில் கடந்து செல்லும் பல்வேறு கதாபாத்திரங்களையும் விவரிக்கும் அழகான புத்தகம். நீல பத்மநாபனின் சிறப்பு என்னவென்றால் ஒவ்வொரு கதாபாத்திரத்திற்கும் அவர் அளிக்கும் விரிவான கவனம்.

கதை திருவனந்தபுரத்தில் நிகழ்கிறது — மகனும் மகளும் கொண்ட ஒரு முதியவரின் கதை. கடந்த கால வாழ்க்கையையும், தன்னை விட்டு செல்வந்தரொருவருடன் சென்றுவிட்ட மனைவியையும் நினைவுகூர்கிறார்.

நீல பத்மநாபனின் எல்லா புத்தகங்களையும் போல் கதை மெதுவாகக் கட்டமைக்கப்படுகிறது. ஆனால் அந்த மெதுவான அமைப்பிலும் வாசகரை இறுக்கமாகப் பிடித்து வைக்கிறது.

புத்தகம் முழுவதும் ஒரு ஆழமான சோகம் படர்ந்திருக்கிறது. வாசித்து முடிக்கும்போது மனதில் ஒரு கனம் தங்குகிறது.

பிரபல தமிழ்-மலையாள எழுத்தாளரும் சாகித்ய அகாடமி விருது பெற்றவருமான நீல பத்மநாபனின் மிகவும் புகழ்பெற்ற, பல மொழிகளில் மொழிபெயர்க்கப்பட்ட தமிழ் நாவல் இது. சமீபத்தில் ரஷ்ய மொழியிலும் மொழிபெயர்க்கப்பட்டுள்ளது.

பத்மநாபசுவாமி கோயிலின் முன்னாள் ஊழியரான அனந்தன் நாயர், திருவிதாங்கூர் இந்தியாவுடன் இணைந்தபோது ராஜாவின் பொருளாதார நிலை சரிவடைந்ததால் பணி நீக்கம் செய்யப்படுகிறார். அவரது வாழ்க்கைக்கதை இரண்டு நாட்களுக்குள் சொல்லப்படுகிறது.

ஒருவரின் கதையாக இருந்தாலும் ஒரே கோணத்தில் அவதரிக்கப்படவில்லை. மாறுபட்ட பார்வைகளும் கண்ணோட்டங்களும் வழங்கும் நாவல். காலகட்டங்களின் மாறுதல்களை விவரிக்கும் நாவல். ஐம்பது வருடங்களுக்கு முன் எழுதப்பட்டிருந்தாலும் சிறிதும் சலிப்பூட்டாத நாவல்.

நல்ல தமிழக-கேரள கலாசாரக் கதை. புத்தகத்தின் இறுதியில் கொடுக்கப்பட்ட மலையாள-தமிழ் சொல் விளக்கங்கள் தொடக்கத்திலேயே இருந்திருக்கலாம். சில அச்சுப் பிழைகளும் உண்டு.

சாதாரண மனிதனுக்கு நேர்ந்த அசாதாரண வாழ்க்கை. கச்சிதமான மொழியில், சுவாரசிய நடையில் சொல்லப்பட்டிருக்கும் செவ்வியல் நாவல்.

ஆழ்ந்து படிக்கத்தக்க நாவல். ஒரே நாளில் முக்கிய கதாபாத்திரத்தின் சந்திப்புகள் மற்றும் சிந்தனை ஓட்டங்கள் வழியாக கதை சொல்லப்படுகிறது. தன் குழந்தைகள் மீதான எதிர்பார்ப்புகள் பொய்த்துப் போகும்போது அவர் அனுபவிக்கும் இயலாமையும் மனச்சோர்வும் நெஞ்சை உருக்குகின்றன.

நீல பத்மநாபனின் எழுத்துநடை மிக நேர்த்தியானது. பழைய திருவனந்தபுரத்தை நேரில் சென்று பார்த்தது போன்ற ஒரு பிரமையை ஏற்படுத்திவிடுகிறார்.

கதை படித்து முடித்த பிறகு, இது புதினமா அல்லது ஒரு வரலாற்றுப் பதிவா என்ற ஐயப்பாடு எழுகிறது.

மிகச் சிறந்த படைப்பு. அனந்தன் நாயரின் வாழ்க்கையை அவரின் சுய கழிவிரக்கப் பார்வையிலும் அவர்தம் மக்களின் யதார்த்தப் பார்வையிலும் சொல்லிப் போகிறது. தொடக்கத்தில் கூறப்படும் அவரது அகம் வழியாக நாம் பார்க்கும் திருவனந்தபுரத்தின் அழகு மொழியின் உச்சம்.

திருவனந்தபுரத்தை களமாகக் கொண்டு 1970 வாக்கில் நடக்கும் கதை. அனந்தன் நாயர் என்ற கணக்காளரின் இரண்டு நாட்கள் வாழ்க்கையும், அதனூடாக அவரின் மண வாழ்வின் சுகமும் துக்கமும், கூடவே அந்நகரின் அரசியல் பண்பாட்டு மாற்றங்களும் முன்னும் பின்னுமாக நகர்கின்றன.

ராஜா செயலிலிருந்தபோது அவரின் காரியாலயத்தில் வேலையிலிருந்து, இந்திய அரசால் ராஜாக்கள் கைவிடப்பட்ட காலத்தில் வேலையிழந்த நாயரின் பொருளாதார நெருக்கடியும், மனைவி பிரிந்து வேறொருவனோடு சென்றதன் வலியும் கதை முழுதும் விரவிக் கிடக்கின்றன.

பெரும்பாலும் புறவுலக வர்ணனைகளும் சிறிது அகவுலக சிந்தனையோட்டங்களும் மிகச்சிறப்பாகச் சித்தரிக்கப்பட்டுள்ளன. எழுத்தாளர் நாகர்கோவிலைச் சேர்ந்தவர் என்பதால் இயல்பாகவே மலையாள வாழ்க்கைச் சூழலை உயிரோட்டத்துடன் பிரதிபலிக்க முடிகிறது. மலையாளப் பரிச்சயம் அற்ற தமிழ் வாசகர்களுக்கு மொழியோட்டம் சிறிது தடையாக இருக்கலாம், ஆனால் அவர்களின் சமூக பழக்கவழக்கங்கள் பற்றிய புரிதலை இந்நூல் அளிக்கக்கூடும். உடன் வாழ்வின் மீதான கசப்பான கேள்விகளையும்!