Reviews for வசீகர நாடு: கண்போரை கவரும்

பாத்திரப் படைப்பும் கதைக்களமும் தொடக்கத்திலேயே ஈர்க்கின்றன; பாத்திரங்களுக்குப் பொருத்தமான தமிழ்ப் பெயர்கள் வைத்திருப்பதும் சிறப்பு. காந்த சக்தியை மையமாகக் கொண்ட கற்பனை உலகில் அறிவியல் விவரங்கள் விரிவாக இடம்பெறுகின்றன. ஆயுதங்கள், கோட்டைச் சுவர், சண்டை முறைகள், போர்த்தந்திரங்கள் ஆகியவற்றின் வர்ணனைகள் சிறப்பாக அமைந்துள்ளன. விறுவிறுப்பாக வாசிக்க வைக்கும் நாவல். நாடுகளின் வாழ்க்கைமுறை, உடை, பழக்கவழக்கங்கள் குறித்த விரிவான விவரங்களை இரண்டாம் பாகத்தில் அறியும் ஆவலை ஏற்படுத்துகிறது.

முழுக்கக் கற்பனையில் அமைந்த கதையிலும் நிகழ்வுகளுக்குத் தர்க்கரீதியான காரணங்களைத் தந்திருப்பது சிறப்பு. எழுத்தும் வர்ணனைகளும் மிகவும் ரசிக்க வைக்கின்றன. இந்த நூலுக்காகச் சமுர எடுத்துக்கொண்ட உழைப்பும் அக்கறையும் வெளிப்படுகின்றன. இரண்டாம் பாகத்தை எதிர்பார்க்க வைக்கும் அருமையான படைப்பு.

கற்பனையைத் தூண்டும் உலகமும் தனித்தன்மையுள்ள பாத்திரங்களும் இந்த நாவலின் பலம். எதிர்த்தரப்பை முதலில் அறிமுகப்படுத்தும் தொடக்கம் சிறப்பு; பொறிமுடியின் அறிவும் நட்பும் கவனத்தை ஈர்க்கின்றன. போர்த்தந்திரங்களும் முக்கியத் திருப்பங்களும் பிடிப்பைத் தந்தாலும், ஒன்றோடொன்று பின்னிய போர்க்காட்சிகள் சில இடங்களில் குழப்புகின்றன. படங்கள் புரிதலுக்கு உதவுகின்றன. நூலின் நீளமும், இலகுவான இடைவெளியின்றி முதல் பாதியில் குவியும் தகவல்களும் சிரமமளிக்கின்றன. மொத்தத்தில் சிறப்பான போர்க்காட்சிகள் நிறைந்த புனைவு.

கதைக்குள் இழுத்துக்கொண்டு பாத்திரங்களுடன் ஒன்ற வைக்கும் களம். ஒருவரை மிஞ்ச இன்னொருவர் இருப்பதையும் செயல்களுக்கு எதிர்வினை வருவதையும் பாத்திரங்கள் வழியே சமுர காட்டுகிறார். காந்த சக்தி போன்ற அறிவியல் கருத்துகளும் எளிதாகவும் சுவாரசியமாகவும் விளக்கப்படுகின்றன. வேகமான கதையோட்டத்தில் நிகழ்வுகள் ஒன்றோடொன்று நேர்த்தியாக இணைகின்றன; சில வரிகள் மனதில் பதிகின்றன. கற்பனையை விரிவாக்கும் இந்த முயற்சி இரண்டாம் பாகத்திற்கான எதிர்பார்ப்பையும் ஏற்படுத்துகிறது.