Reviews for வசீகர நாடு: கண்போரை கவரும்

முதல் சில அத்தியாயங்களைக் கடக்க நேரமானாலும், போட்டிகள் தொடங்கியதும் வாசிப்பு வேகமெடுக்கிறது. செங்கனல், இளதீரன், சுருளி ஆகியோரின் நட்பும் மண்டபமலையேற்றப் போட்டியும் குறிப்பாகக் கவர்கின்றன. கோரநாட்டுக்கும் வசீகர நாட்டுக்கும் இடையிலான போர் உத்திகளும் போர்க்கள நிகழ்வுகளும் ரசிக்க வைக்கின்றன. திருப்பங்களும் கற்பனை அம்சங்களும் நிறைந்த, படித்ததற்கான நிறைவைத் தரும் நாவல்.

போர் உத்திகள் நன்றாக உள்ளன. மொத்தத்தில் இனிய வாசிப்பு.

இரு நாடுகளின் போரை மையமாகக் கொண்ட கதைக்களமும் அதன் கற்பனை வளமும் கவர்கின்றன. வடுமாறன், பொரிமுடி இடையிலான உறவும் பொரிமுடியின் போர் உத்திகளும் சிறப்பு. இடையிடையே வரும் ஓவியங்கள் காட்சிகளைக் கற்பனை செய்ய உதவுகின்றன. திருப்பங்களும் சீரான வேகமும் இருப்பதால் நூலின் நீளம் சுமையாகத் தெரியவில்லை. தமிழ் நாவல்களை விரும்புவோருக்குப் பரிந்துரைக்கத்தக்க வாசிப்பு.

கடல், நிலம், மக்கள் பற்றிய தொடக்க விவரணைகள் வாசிப்பைத் தாமதப்படுத்தினாலும், கிளைக்கதைகள் விரியும்போது வேகம் கூடுகிறது. எளிய நடையில் உருவாகும் இருண்ட கற்பனை உலகம், நினைவில் நிற்கும் பாத்திரங்கள், அரசியல் திருப்பங்கள், விலங்குகளின் ஆற்றலைப் பயன்படுத்தும் போர்க்காட்சிகள் ஆகியவை சிறப்பு. எனினும் எதிரிகளுக்குத் தெரியாமல் போரிட்டபடியே பதுங்குகுழிகள் தோண்டுவது எப்படிச் சாத்தியம் என்ற கேள்வி எழுகிறது. வரைபடமும் வண்ண ஓவியங்களும் இருந்திருந்தால் இன்னும் நன்றாக இருந்திருக்கும். கற்பனை நாவல் ரசிகர்களுக்கு நல்ல பொழுதுபோக்கு.

வேற்றுக் கோளின் அமைப்பையும் புதுமைகளையும் புரிந்துகொள்ளத் தொடக்கத்தில் நேரம் தேவைப்படுகிறது. அவை பிடிபட்டதும் அடுத்தடுத்த போர்களும் புதிய உயிரினங்களும் கதையை விறுவிறுப்பாக்குகின்றன. பொரிமுடி உள்ளிட்ட பல பாத்திரங்கள் கவர்கின்றன. செங்கனல், அரவிகா காதல் பகுதியும் அவர்களின் துணிவு, அறிவுக்கூர்மை, சமயோசிதமும் சிறப்பு. தமிழில் வித்தியாசமான கனவுருப்புனைவை விரும்புவோருக்குப் பரிந்துரைக்கத்தக்க நாவல்.

கதையமைப்பும் சொல்லும் விதமும் சுவாரசியமாக இருப்பதால் வாசிப்பு நல்ல வேகத்தில் செல்கிறது. பாத்திரங்கள் கவனமாக உருவாக்கப்பட்டுள்ளன; போர் உத்திகள், ஆயுதங்கள், கருவிகளில் படைப்பாற்றல் தெரிகிறது. ஆனால் கற்பனை உலகின் அமைப்பைத் தர்க்கரீதியாக நியாயப்படுத்தும் விளக்கங்கள் தொடக்கத்தில் இயல்பாகப் பொருந்தவில்லை. பாத்திரங்களுக்கும் கற்பனை விலங்குகளுக்கும் இன்னும் கவர்ச்சியான பெயர்களைத் தேர்ந்தெடுத்திருக்கலாம். இந்தக் குறைகளையும் தாண்டிப் பாராட்டத்தக்க எழுத்து.

போர்க்காட்சிகளும் கற்பனை உயிரினங்களும் வியப்பூட்டும் நாவல். நிலப்பகுதிகள், உயிரினங்கள், பாத்திரங்களுக்கு வைத்துள்ள பெயர்களும் நன்றாக உள்ளன. பொரிமுடியும் அவரது கண்டுபிடிப்புகளும் அடுத்த பக்கத்தைப் படிக்கும் ஆர்வத்தைத் தூண்டுகின்றன. போரில் காந்த ஆற்றலைப் பயன்படுத்தும் விதத்தைச் சமுரா சிறப்பாகக் கையாண்டுள்ளார். வாங்கிப் படிக்கத்தக்க நூல்.

எளிய நடையும் வேகமான நகர்வும் கொண்ட அருமையான கனவுருப்புனைவு நாவல். காளான் வீடு, சிப்பிப் படகு, மணிகாட்டும் பூ போன்ற புதுமைகள் கற்பனை உலகை ரசிக்க வைக்கின்றன. மீன்களைச் சார்ந்த ஆயுதங்களும் விலங்குகளின் ஆற்றல்களும் வியப்பூட்டுகின்றன. போர்ப் பயிற்சி, போர்க்காட்சிகள், போர் உத்திகள் ஆகியவை சிறப்பு. எல்லா வயதினரும் படித்து மகிழலாம்.

ஆர்வம் குறையாமல் கற்பனை உலகை விவரிக்கும் விதமும் சுவாரசியமான கதைக்களமும் வாசிப்பை இனிமையாக்குகின்றன. பாத்திரப் படைப்பு சிறப்பு; குறிப்பாகப் பொரிமுடி கவர்கிறார். நீளமான நூலாக இருந்தாலும் கதை வேகமாகப் பக்கங்களைத் திருப்ப வைக்கிறது. உள்ளே இடம்பெறும் ஓவியங்களும் அட்டைப்படமும் அழகு. மொத்தத்தில் ரசிக்கத்தக்க கற்பனைப் பயணம்.

கற்பனை உலகின் புதுமைகளை நம்பும்படி விளக்கும் விதம் வசீகர நாட்டின் பெரிய பலம். தனித்தன்மை கொண்ட பாத்திரங்களும் பரபரப்பான போர்க்காட்சிகளும் கதையோடு ஒன்றச் செய்கின்றன. புத்தகப் பக்கங்களைப் புரட்டப் பொரிமுடி பயன்படுத்தும் பூரான் போன்ற சிறு கற்பனைகளும் கவனம் ஈர்க்கின்றன. தமிழின் கனவுருப்புனைவுகளில் தனி இடம் பெறக்கூடிய பாராட்டத்தக்க முயற்சி.