Reviews for ஆர். சோமசுந்தரத்தின் காதல் கதை

அன்றாட வாழ்வில் எதிர்ப்படும் ஒரு கதையை முற்றிலும் வேறு விதமாகச் சொல்லியிருக்கிறார். கதை சொல்லும் விதமே இதன் சிறப்பு. ரசித்துக் கொண்டாடிப் படிக்கக்கூடிய, தவறவிடக் கூடாத நூல்.

சாமானிய மனிதனின் பார்வையில் சொல்லப்படும் இலகுவான நகைச்சுவைக் கதை. திராவிடக் கொள்கை கொண்ட ஆசிரியர், ஆர்.எஸ்.எஸ். சித்தாந்தத்தைக் கேலியும் நகைச்சுவையும் கலந்து விமர்சிக்கிறார்.

கதை முழுவதும் சிரிக்க வைத்தபடியே பல சம்பவங்களைச் சொல்லிச் செல்கிறார். தோற்றத்தை மட்டும் வைத்து முடிவு செய்யாமல் ஆராய்ந்து புரிந்துகொள்ள வேண்டும் என்ற கருத்து நெடுகிலும் ஒலிக்கிறது. கண்டிப்பாகப் படிக்க வேண்டிய நூல்.

நகைச்சுவையான கதைநடை. முதல் பகுதி மிகவும் விறுவிறுப்பாகச் சென்றாலும், பிற்பகுதியில் சிறிது தொய்வு தெரிகிறது. இருந்தும் ஆங்காங்கே சிரிக்க வைப்பதுடன் சிந்திக்கவும் வைக்கிறார் ஆசிரியர்.

வித்தியாசமான கதைக்களத்தில், சொல்ல விரும்பும் கருத்துக்கே ஆசிரியர் முதன்மை கொடுத்திருக்கிறார். பாத்திரங்களுக்கும் அவற்றின் பெயர்களுக்கும்கூட காரணம் இருக்கிறது. பல இடங்களில் மனம்விட்டுச் சிரிக்க வைக்கும் நூல். படித்துப் பார்க்கலாம்.

கதை முழுவதும் ஆர்வம் குறையாமல் செல்கிறது. நகைச்சுவை நிறைந்திருந்தாலும் அதன் அளவு போகப்போகக் குறைகிறது. தத்துவம், பலவித உணர்வுகள், கொள்கை சார்ந்த நறுக்கான வசனங்கள் ஆகியவை சேர்ந்த மனிதநேயமிக்க, ரசிக்கத்தக்க படைப்பு.

இப்போது நாட்டில் நடப்பவற்றையே படிப்பது போன்ற உணர்வைத் தரும் சுவாரசியமான கதை. விமர்சனங்களை மறைமுகமாக வைக்காமல், வெளிப்படையாகவும் கடுமையாகவும் முன்வைக்கும் விதம் கவனத்தை ஈர்க்கிறது.

தான் சார்ந்த கழகத்தின் குரலை இளைஞர்களிடம் கொண்டு செல்லும் படைப்பாக இதை எழுதியிருக்கிறார். அந்தக் கழகத்தின் மறைந்த மூத்த எழுத்தாளர்களைப் போலவே, கருத்துப்பிழையின்றிக் கொள்கைகளை மக்களிடம் எடுத்துச் செல்லும் படைப்புகள் இவரிடமிருந்தும் வரட்டும்.

அடக்க முடியாத சிரிப்பை வரவழைக்கும் எழுத்து. க.சீ.சிவக்குமாரின் நகைச்சுவையை நினைவூட்டுவதோடு, அதைவிடவும் அதிகமான நக்கலும் எகத்தாளமும் நடையில் இருக்கின்றன.

சந்தானம் படங்களின் நகைச்சுவைக் காட்சிகளை நினைவூட்டும் கதை. பாத்திரப் பெயர்களும் சூழல்களும் சமகால விவாதங்களைச் சுட்டுகின்றன. எல்லாத் தரப்பையும் பகடி செய்யும் நகைச்சுவையை ரசிப்பவர்களுக்கு, விரைவாகப் படித்து மகிழ ஏற்ற நூல்.