Reviews for பள்ளிகொண்டபுரம்

திருவனந்தபுரத்தின் கோயில் வீதிகள் தத்ரூபமாகச் சித்தரிக்கப்பட்டுள்ளன. ஆனால் அதையே நகரின் ஆன்மாவைத் தொட்ட எழுத்தாகக் கொண்டாடுவது புரியவில்லை. ஆண் பாத்திரங்களின் பெயர்களில் தொடர்ந்து சாதிப் பின்னொட்டு வருவதும் கேள்வி எழுப்புகிறது. இறுதிப் பகுதிகள் பெரிய அதிர்வைத் தராவிட்டாலும், அகச்சிக்கல்களைப் பேசிய விதம் நிறைவளிக்கிறது. கதையும் மொழியும் தொடர்ந்து வாசிக்கையில் அயர்ச்சி தரவில்லை.

ஒரு முதியவரின் வாழ்க்கையையும் அவரைக் கடந்து சென்ற மனிதர்களையும் அழகாகச் சித்தரிக்கிறது. ஒவ்வொரு பாத்திரத்துக்கும் நீல பத்மநாபன் அளிக்கும் கவனம் சிறப்பு. திருவனந்தபுரத்தின் தெருக்களும் இடங்களும் கண்முன் விரிய, குடும்ப உறவுகளும் கடந்தகால நினைவுகளும் கதையாகின்றன. கதை மெதுவாகத்தான் உருப்பெறுகிறது; ஆனாலும் அந்த நிதானமான நகர்வு வாசிப்பின் பிடிப்பைக் குறைக்கவில்லை.

சோக உணர்வு நிறைந்திருக்கிறது.

இரண்டு நாட்களுக்குள் அனந்தன் நாயரின் வாழ்க்கையைத் திரும்பிப் பார்க்கச் செய்கிறது பள்ளிகொண்டபுரம். ஒருவரின் கதையாக இருந்தாலும் அவரது பார்வையோடு மட்டும் நின்றுவிடாமல் வெவ்வேறு கண்ணோட்டங்களுக்கும் இடமளிப்பது சிறப்பு. காலமாற்றங்களையும் எடுத்துரைக்கும் இந்நாவல், எழுதப்பட்டுப் பல ஆண்டுகள் கடந்த பின்னும் சிறிதும் சலிப்பூட்டாமல் வாசிக்க வைக்கிறது.

தமிழும் மலையாளமும் கலந்த நல்ல கதை. இறுதியில் கொடுக்கப்பட்டுள்ள சொற்பொருள் விளக்கங்களைத் தொடக்கத்திலேயே சேர்த்திருக்கலாம். அச்சுப் பிழைகளையும் திருத்த வேண்டும்.

சாதாரண மனிதனுக்கு அமைந்த அசாதாரண வாழ்க்கையைக் கச்சிதமான மொழியிலும் சுவாரசியமான நடையிலும் சொல்லும் செவ்வியல் நாவல்.

நாயகனின் சந்திப்புகளும் சிந்தனைகளும் வழியே சொல்லப்படும் கதை வாசிப்பில் ஆழ்த்துகிறது. பிள்ளைகள் குறித்த எதிர்பார்ப்புகள் பொய்க்கும்போது ஏற்படும் அவரது கையறுநிலையும் மனச்சோர்வும் இதில் இடம் பெறுகின்றன.

நீல. பத்மநாபனின் நேர்த்தியான நடை பழைய திருவனந்தபுரத்தை நேரில் காண்பதுபோல் உணரச் செய்கிறது. வாசித்து முடிக்கும்போது புதினமா, வரலாற்றுப் பதிவா என்று வியக்க வைக்கிறது.

அனந்தன் நாயரின் சுயபரிதாபப் பார்வையையும் அவரது பிள்ளைகளின் யதார்த்தப் பார்வையையும் இணைத்துச் சொல்லும் மிகச் சிறந்த படைப்பு. தொடக்கத்தில் அவரது மனவோட்டம் வழியே வெளிப்படும் திருவனந்தபுரத்தின் அழகு, மொழியின் சிறப்பை உணர்த்துகிறது.

திருவனந்தபுரத்தின் நினைவுகளையும் மாறிவரும் வாழ்க்கையையும் ஆழமான உளவியல் பார்வையுடன் பதிவு செய்கிறது பள்ளிகொண்டபுரம். பத்மநாபசுவாமி கோயிலின் பின்னணியில் மனித உறவுகளின் சிதைவும் காலத்தின் மாற்றங்களும் இடம் பெறுகின்றன. ஒரு கதையைச் சொல்வதோடு நின்றுவிடாமல், நகரத்தையும் ஒரு காலகட்டத்தின் அனுபவத்தையும் உணரச் செய்யும் படைப்பாக இருக்கிறது.