Reviews for கோசலை

உடல் வளர்ச்சி குன்றிய கோசலை, பல நிராகரிப்புகளைக் கடந்து முன்னேறுவதோடு தன்னைச் சுற்றியிருப்பவர்களின் முன்னேற்றத்திற்கும் உழைக்கிறாள். அவளது நல்லுள்ளத்தைக் காட்டும் நாவல் இது. குடும்பம், சுற்றத்தார், நூலகம், பள்ளிக் குழந்தைகள், அப்பகுதி மக்கள் எனப் பலருடனான அவளது பிணைப்புகளின் வழியே கதை விரிகிறது.

பேட்டையைவிட இதில் தமிழ்பிரபாவின் கதை சொல்லும் திறன் கூர்மையடைந்துள்ளது. காட்சிகளாக விரியும் எழுத்தும் கோசலையின் கனவுகளில் வரும் மாய எதார்த்தமும் நினைவில் நிற்கின்றன. ஆனால் பிற்பாதி சற்றே மந்தம். சாதியால் திருமணத்தை எதிர்க்கும் தந்தையின் சாதியைச் குறிப்பிடாதது, சாதியை எதிர்க்கும் படைப்பில் ஏன் இந்தத் தவிர்ப்பு என்ற கேள்வியை எழுப்புகிறது. கோசலையின் உடலில் அல்ல, சமூகத்தில்தான் குறை இருக்கிறது என்ற பார்வை வலுவாக வெளிப்படுகிறது. கோவேறு கழுதைகள், கருக்கு போன்ற நூல்களையும் கோசன் நூலகத்தையும் அறிமுகப்படுத்துவதும் குறிப்பிடத்தக்கது.

சமூகம் ஒதுக்கும் ஒரு பெண்ணை, பிறரது இரக்கத்தை வேண்டாத பாத்திரமாக உருவாக்கியிருக்கிறார் தமிழ்பிரபா. அவரது இரண்டாவது நாவலான கோசலையும் சிந்தாதிரிப்பேட்டையைக் களமாகக் கொண்டது. எளிமையாகச் சொல்லப்பட்டிருக்கும் அவளது வாழ்க்கை, வாழ்வின் மீதான நம்பிக்கையை அதிகரிக்கச் செய்கிறது.

கல்வி, ஒற்றுமை, புரட்சி குறித்த அம்பேத்கரின் கருத்துகளுக்கு எடுத்துக்காட்டாக நாவல் முழுவதும் கோசலை திகழ்கிறாள்.