Reviews for கோடுகள் இல்லாத வரைபடம்

தகவல்கள் கொஞ்சம்; உத்வேகம் அதிகம் தரும் நூல்.

எஸ்.ராவின் நெருக்கமான உரையாடல் நடையில் அமைந்த இந்த நூல், வியப்பூட்டும் பயணங்களையும் அவற்றைப் பதிவு செய்த நூல்களையும் அறிமுகப்படுத்துகிறது. தனிமனிதச் சாதனைகளாகச் சொல்லப்படும் பயணங்களுக்குப் பின்னால் உதவிய பலரின் உழைப்பை முன்னிறுத்துவது சிறப்பு. தடைகளைத் தாண்டிய முயற்சிகளுடன், முன்பின் தெரியாத மனிதர்களின் அன்பும் ஆதரவும் பயணத்தைச் சாத்தியமாக்குவதை உணர்த்துகிறது. வரலாற்றில் கவனிக்கப்படாதவர்களையும் சேர்த்துப் பார்க்க வைக்கிறது.

வரலாற்றில் நினைவுகூர வேண்டிய பயணங்களை எஸ்.ரா சுருக்கமாக அறிமுகப்படுத்துகிறார். மன்னர்களின் வரலாற்றுக்கு அப்பால், சாதாரண மக்களின் உணவு, பழக்கவழக்கங்கள், நம்பிக்கைகள் போன்றவற்றையும் பயணக் குறிப்புகளின் வழியே அறிய முடிகிறது. ஆங்கிலத்தில் வெளிவந்த பல பயண நூல்களை வாசிக்க முடியாதவர்களுக்கு இந்த அறிமுகங்கள் உதவும். பயணத்தில் ஆர்வமுள்ளவர்கள் வாசிக்க வேண்டிய நூல்.