Reviews for காடோடி

சமீபத்திய வாசிப்புகளில் மிகச் சிறந்த நூல்களில் ஒன்று.

போர்னியோ மழைக்காட்டின் உயிரினங்களையும் மரம் வெட்டும் முகாமில் பல இனத்தவர் பகிரும் அன்பையும் விறுவிறுப்பாகச் சித்தரிக்கிறது காடோடி. இயற்கைக்கு மனித உணர்வுகளைச் சுமத்த வேண்டாம் என்ற பிலியவின் தெளிவு குறிப்பிடத்தக்கது. காட்டழிவின் துயரத்தோடு, அதன் தீமையை அறிந்தும் முதலாளிகளின் கட்டுப்பாட்டில் இயங்க வேண்டியவர்களின் இயலாமையையும் உணர்த்துகிறது. சூழல் அழிவும் பருவநிலை மாற்றமும் தீவிரமாகும் பின்னணியில் அனைவரும் வாசிக்க வேண்டிய நாவல்.

காடுகளைப் பற்றிய அறிமுகத்தைத் தாண்டி அன்பு, நட்பு, பிரிவு எனப் பல உணர்வுகளைத் தருகிறது காடோடி. காட்டை வெளியிலிருந்து பார்ப்பவருக்கும் அங்கேயே வாழும் தொல்குடியினருக்கும் உள்ள பார்வை வேறுபாடு வியக்க வைக்கிறது. மனிதர்களின் உணர்வுகளைக் கவித்துவமாகச் சொல்லும் எழுத்து, விலங்குகளின் உணர்வுகளையும் கவனிக்கச் செய்கிறது. பேராசையால் இயற்கை வணிகப் பொருளாகும் அவலத்தை உணர்த்தி, சூழலின் மீது அக்கறையை வளர்க்கும் படைப்பு.

போர்னியோ மழைக்காடுகளை மையமாகக் கொண்ட காடோடி, காடு பற்றிய புரிதலை விரிவாக்கும் சிறந்த நாவல். ஓமர் வழியாக அறிமுகமாகும் மரங்களும் உயிரினங்களும் வியப்பூட்டுகின்றன; பழங்குடி மக்களின் வாழ்வும் யொகன்னாவின் நட்பும் நினைவில் நிற்கின்றன. காட்டழிப்புக்கு எதிராகப் பேசும் பிலியவின் சொற்கள் மனசாட்சியை உலுக்குகின்றன. வளங்களை அளவோடு பயன்படுத்தி, பல்லுயிர்களும் வாழ ஏற்ற உலகைக் காக்க வேண்டியதன் அவசியத்தை உணர்த்துகிறது.

மிகவும் கனமான நாவல்.

காட்டழிப்பு அங்குள்ள உயிரினங்களையும் மக்களையும் எவ்வாறு பாதிக்கிறது என்பதை விரிவாகக் காட்டுகிறது காடோடி. காட்டுவாழ் மக்களின் அன்றாடம், உணவுப் பழக்கங்கள், பல்வேறு மனிதர்களிடையே உருவாகும் உணர்வுகள் என அவர்களின் வாழ்வை நெருக்கமாக அறிய முடிகிறது. துவான், ஓமர், அன்னா ஆகியோருடன் சில காலம் வாழ்ந்ததுபோன்ற உணர்வைத் தருவதோடு, ரலாவைச் சந்திக்க வேண்டும் என்ற ஏக்கத்தையும் ஏற்படுத்துகிறது.

கிழக்கு மலேசியாவில் நிகழும் காட்டழிப்பில் பங்கேற்ற அல்லது அதற்குத் துணைநின்ற ஒருவரின் மனநிலையைப் பேசும் நாவல்.