Reviews for காடோடி

போர்னியோ மழைக்காடுகளின் உயிரினங்கள், தொல்குடிகளின் வாழ்வு, அவற்றின் அழிவு ஆகியவற்றை உயிரோட்டமுள்ள புனைவாக அளிக்கிறது காடோடி. தகவல்களை அடுக்காமல் தேர்ந்த பாத்திரங்களுடனும் செறிவான சொல்வளத்துடனும் கதையை உருவாக்கியிருப்பது சிறப்பு. பிலியவ், ஜோஸ், மூதாய் மரம் ஆகியவை வாசித்த பின்னும் நினைவில் நிற்கின்றன. மனிதர்கள் இயற்கைக்கு இழைக்கும் தீங்குகளைச் சிந்திக்க வைக்கும் இந்நாவல், இயற்கை ஆர்வலர்கள் தவறாமல் வாசிக்க வேண்டியது.

காட்சிகளை எளிதில் மனக்கண்ணில் காண வைக்கும் சுவாரசியமான காட்டுக் கதை. அனைவரும் வாசிக்க வேண்டிய நூல்.

வெப்பமண்டல மழைக்காடுகள், இயற்கை, குரங்கினங்கள் பற்றி நன்றாக எழுதப்பட்டுள்ளது. மனதுக்குப் புத்துணர்வு தரும் வாசிப்பு.

சூழலியலையும் அதைச் சுற்றியுள்ள வணிகம், அரசியலையும் அறிய அவசியம் வாசிக்க வேண்டிய நூல். காட்டின் மீது அன்பை ஏற்படுத்துகிறது.

மகிழ்ச்சியுடன் தொடங்கும் காட்டுப் பயணம் இறுதியில் கண்ணீர் வரவைக்கும் அளவுக்கு ஆழமாகப் பாதிக்கிறது. அந்தக் காட்டிலேயே வாழ்ந்த உணர்வைத் தருவதுடன், ஒரு மரத்தின் இழப்பையும் நெருக்கமான உயிரின் இழப்பாக உணரச் செய்கிறது. மனித உணர்வுகளைக் கண்முன் கொண்டுவரும் எழுத்து.

தலைப்பிலேயே ஈர்க்கும் காடோடி, வாசிக்கக் கிடைத்ததைப் பெரும் பேறாகக் கருத வைக்கும் அளவுக்கு மதிப்புமிக்க புத்தகம்.

அறிவியல், வாழ்க்கை முன்னேற்றம் என்ற பெயரில் இயற்கைக்கு நாம் இழைக்கும் தீங்குகளை அழகான தமிழில் சுட்டிக்காட்டுகிறது. கதையைப் படிப்பதோடு நிற்காமல் அதற்குள் வாழ்வது போன்ற உணர்வைத் தரும் நாவல். இயற்கையைப் போற்றும் நக்கீரனின் இதுபோன்ற படைப்புகள் இன்னும் வர வேண்டும் என்ற ஆவலை ஏற்படுத்துகிறது.

காடுகளையும் அங்குள்ள உயிர்களையும் நேசிப்பவர்களுக்கு ஆர்வமூட்டும் நூல். போர்னியோ காடுகளின் வழியே உணவுச் சங்கிலியின் முக்கியத்துவத்தையும் காட்டழிப்பால் விலங்குகள், பூச்சிகள், பறவைகளுக்கு நேரும் பாதிப்புகளையும் விளக்குகிறது. தொல்குடிகளின் வாழ்க்கை, பண்பாடு, இயற்கை குறித்த புரிதல் ஆகியவற்றுடன் அவர்களின் வேதனையையும் எடுத்துரைக்கிறது. எளிமையான எழுத்தில் பொருள் செறிந்த வாசிப்பு.

காட்டழிப்பின் பின்னுள்ள வணிகத்தையும் அரசியலையும் எளிமையாகவும் தெளிவாகவும் விளக்குகிறது காடோடி. கடைசிவரை காட்டுக்குள் அழைத்துச் செல்லும் எழுத்து, காடுகள் வெறும் கட்டைகளாக மாறுவதன் வலியையும் உணர்த்துகிறது. பிலியவ், துவான் உள்ளிட்ட பாத்திரங்கள் நினைவில் நிற்கின்றனர். துவான், ரலா இடையே மலரும் காதல் குறிப்பாக மனதைக் கனக்கச் செய்கிறது.

மரம் வெட்டும் நிறுவனத்தின் அலுவலராக போர்னியோ செல்லும் எழுத்தாளரின் அனுபவங்கள் வழியே மழைக்காட்டின் அழிவு பதிவாகிறது. காட்டின் இயல்பும் மரங்களும் தொல்குடிகளின் வாழ்வும் உயிர்ப்புடன் விரிகின்றன. ஒவ்வொரு மரமும் விழும்போது அதனால் ஏற்படும் இழப்பை உணர்த்துவதில் காடோடி முக்கியமான ஆவணமாகிறது. காட்டழிவில் நமக்குள்ள பங்கையும் எண்ணிப் பார்க்க வைக்கும் வலி வாசிப்புக்குப் பின்னும் தொடர்கிறது.