Reviews for கங்காபுரம்

சோழர் காலச் சட்டங்கள், கோவில் நடைமுறைகள், நிவந்தங்கள் பற்றிய நுணுக்கமான ஆய்வு இந்நாவலின் முக்கியத்துவத்தை உயர்த்துகிறது. ஆனால் ராஜராஜனும் ராஜேந்திரனும் மனதில் பதியவில்லை; சில துணைப் பாத்திரங்களே நினைவில் நிற்கின்றன. தலைநகர் மாற்றத்திற்குக் கூறப்படும் காரணங்களில் தனித்த அடையாளம் தேடும் எண்ணம் மட்டுமே ஏற்கும்படி உள்ளது. ஆதாரங்களுக்கு அளித்த கவனம் பாராட்டத்தக்கது என்றாலும், மாபெரும் பேரரசனான ராஜேந்திரனின் ஆளுமை போதிய வலிமையுடன் வெளிப்படாதது பெரும் குறை.

காதலும் போரும் திருப்பங்களும் நிறைந்த வழக்கமான வரலாற்று நாவல் பாணியிலிருந்து கங்காபுரம் விலகுகிறது. ராஜராஜனின் நிழலிலிருந்து வெளிவர விரும்பும் ராஜேந்திரனின் தனிமையை அ. வெண்ணிலா சுவாரசியமாகச் சித்தரிக்கிறார். கல்வெட்டுச் செய்திகளின் வழியே ஊர்ச் சபைகள், கோவில் நிர்வாகம், சமூக மாற்றங்கள் கதைக்குள் வருகின்றன. அரசனுக்குள் இருக்கும் மனிதனை அணுகும் முயற்சி சிறப்பு. எனினும், அவனது ஐந்து மனைவியரைப் பற்றிய விவரங்களும் மேலும் விரிவான சித்தரிப்பும் இல்லாதது ஏமாற்றம்.