இதுவரை திருமணமே செய்து கொள்ளாத நாயகன், இரண்டு திருமணங்கள் செய்து கொண்ட பெண்ணை திருமணம் செய்கிறான். அவனுக்கும் இது முதல் திருமணமாகவும், அவளுக்கு இது மூன்றாம் திருமணமணமாகவும் நடைபெற்றது.ஏன் ? இதில் விடுபட்ட கேள்விகளுக்கு விடைகள் அனைத்தும் பாகம் இரண்டில் காணலாம்.

கத்தரிப்பூ வண்ண புடவையில், ஆங்காங்கே வெள்ளை பூக்களால் வேலைப்பாடுகள் செய்திருந்த பூனம் புடவை அணிந்திருந்தாள். வேலை செய்வதால் மொத்தமாக அள்ளி இடுப்பில் சொருகி இருக்க.. அந்த இடுப்பில் தான் அவனது விழிகளும் சொருகி இருந்தது.

சமையல் மீது ஒரு கண்ணும் , சம்சாரத்தின் மீது ஒரு கண்ணுமாக இருந்திருந்தான் அமர்.

" நல்லா மசாலா தடவி கொடுங்க நான் பொருச்சு எடுக்குறேன்" என்றதும் அமர் மீன்களுக்கு மசாலாவை தடவி கொண்டு, தனது மனைவியை பார்க்க..

" போதும் நிலவன்.. இங்க இருந்து நீங்க பார்க்குறது அப்பட்டமா தெரியுது " என அவன் முகம் பார்க்காமல் கலாய்த்து விட்டு, சட்டென சேலையை இறக்கி விட..

கண்களை இறுக்க மூடி திறந்தவன்.. 'கண்டு கொண்டாளே ' என தலையில் அடித்துக் கொண்டவன்.. " அது வந்து.. அப்படி தப்பா ஒன்னும் பார்க்கல ஆழி " திணறினான்.

தன் மனைவியை உரிமையாய் பார்க்கிறான். ஆனால் அதை கூட பயந்து பயந்து செய்யும் இவனது காதலை விசித்திரமாக பார்த்தாள் ஆழி. உண்மையிலேயே இவர் எனக்கு கணவராக கிடைக்க நான் கொடுத்து வைத்திருக்க வேண்டும் என நினைத்துக் கொண்டாள்.

" தப்பா பார்த்தீங்கன்னு நான் சொல்லவே இல்ல நிலவன். உங்களுக்கான உரிமை அது " என ஆழியும் பட்டென கூறி விட.. அமர் மகிழ்ச்சியின் உச்சத்திற்கு சென்று இருந்தான்.

" அப்போ நான் பார்க்கலாம்னு சொல்லுறீயா " அவனும் விடவில்லை.

" பாருங்கன்னு சொல்லல.. ஆனால் பார்க்க பயப்பட வேண்டாம்னு சொல்லுறேன் " என்றதும் குழம்பி போனவன்.

" என்னவோ போ.. இந்தா மீனுக்கு எல்லாம் மசாலா தடவிட்டேன்" என அவளிடம் கொடுத்து விட்டு.. அவனது கையில் ஒட்டி இருந்த மிச்ச மசாலாவை அவளது இடையில் பட்டு படாமல் பூசி விட்டு, அடுத்த நொடி அங்கிருந்து பறந்திருந்தான் அமர்நிலவன்.

கணவனது செயலில் உறைந்து நின்றாள் ஆழி. அவனை நன்றாக நெருங்கி இருப்பது போல அவள் மனதிற்கு தோன்றியது. அந்த நெருக்கமும் பிடித்து இருந்தது.