Reviews for இரண்டாம் உலகப் போர்

சோவியத் பக்கச் சார்புடன் எழுதப்பட்டுள்ளது. எனினும் ஒட்டுமொத்தமாக இரண்டாம் உலகப்போர் பற்றி முழுப் பரிணாமத்தையும், அரசியல் நிகழ்வுகளாக மட்டுமின்றி சமூக பொருளாதார அடிப்படையில் விளக்குவது சிறப்பு.

முதல் உலகப் போரில் ராணுவ வீரராகப் பங்கு பெற்ற ஹிட்லர், ஜெர்மனிக்கு நிகழ்ந்த அவமானத்தை வன்மத்தோடு மனதில் குறித்துக் கொண்டார். கம்யூனிஸ்ட்களையும் யூதர்களையும் அழிப்பது எனவும் சேர்த்தே முடிவு செய்தார். யூதர்கள் மீதான இனவொழிப்புத் தாக்குதலைத் தொடங்கியிருந்த காலத்தில் ஐரோப்பிய நாடுகள் அதை உள்நாட்டு விவகாரம் என்று பேசாமல் தவிர்த்திருக்கின்றன.

1919 வெர்சைல்ஸ் ஒப்பந்தத்தின் அவமானத்தைப் போக்கி ஜெர்மனியை வல்லரசாக மாற்ற நினைத்த ஹிட்லர் என்ற ஒற்றை மனிதரே இரண்டாம் உலகப் போரின் காரணகர்த்தா. கம்யூனிச வெறுப்பின் காரணமாக ஸ்டாலினையும் சோவியத் ரஷ்யாவையுமே ஐரோப்பிய நாடுகள் எதிரியாய் பார்த்தன. போலந்து, பெல்ஜியம், பாரிஸ் என ஹிட்லர் ஆடத் தொடங்கிய பின்பே சுதாரித்துக் கொண்டன.

ஜப்பான் மலேயா, சிங்கப்பூர் என ஆக்கிரமிப்பு செய்து, தேயிலைத் தோட்டங்களில் வேலை செய்த நூற்றுக்கணக்கான தமிழர்களை சிறைப்பிடித்து சயாம்-பர்மா ரயில் பாதை அமைக்கப் பயன்படுத்தியது. சொல்லில் அடக்கிட முடியாத துன்பங்களை அனுபவித்து இறந்தவர்கள் ஏராளம். அமெரிக்கா நாகசாக்கி, ஹிரோஷிமா மீது அணுகுண்டுகளைப் போட்டு பல்லாயிரக்கணக்கான அப்பாவி ஜப்பானிய மக்களை அழித்தது.

அழிவைத் தவிர எதையும் போர்கள் தருவதில்லை.

இரண்டாம் உலகப் போர் குறித்து பல ஆதாரங்களிலிருந்து ஏற்கனவே நிறையப் படித்திருந்தாலும், அவை பெரும்பாலும் ஒருதலைப்பட்சமாகவும் வெற்றியாளர்களின் பார்வையிலும் இருந்தன. இந்தப் புத்தகம் அந்தத் தவறைப் பெருமளவு தவிர்த்து, விஷயத்தின் முழுமையான பார்வையை அளிக்கிறது.

உலகத்தையே அழித்துவிட எண்ணம் கொண்டு இரு அணிகளாக உலகம் பிரிந்து போரிட்ட கதையை, அணு அளவும் நகரவிடாமல் படிக்க வைக்க இப்புத்தகத்தால் முடியும். அழிவு — எங்கு திரும்பினாலும் அழிவு. இப்போது இருக்கும் உலகம் அதன்பிறகே உயிர் பெற்று வந்திருக்கிறது.

உலக மக்களைப் பட்டினியில் சாக வைக்க, அனைத்துவிதமான தொழில்களும் ஆயுத உற்பத்திக்கே திருப்பப்பட்டன. மக்களை வாழ்விக்கும் எந்தவிதமான முன்னேற்றமும் காணாமலே போயிருந்தது.

1914 முதல் 1918 வரை நடந்த முதல் உலகப் போருக்கு என்ன காரணம் என்பது தெளிவாகத் தெரியவில்லை. ஆனால் 1939 முதல் 1945 வரை நடந்த இரண்டாம் உலகப் போருக்கு முக்கியமான காரணகர்த்தா ஹிட்லர்.

முதலாம் உலகப்போரில் பலத்த தோல்வி சந்தித்த ஜெர்மனி பெரும் பொருளாதார நெருக்கடிக்கு உள்ளாகிறது. அகண்ட ஜெர்மனியை கனவாகக் கொண்ட ஹிட்லர், ஆஸ்திரியாவில் பிறந்தவர். யூதர்கள்தான் ஜெர்மனியின் வளர்ச்சியைத் தடுக்கிறார்கள் என்று வலுவாக நம்பிய அவர், ராணுவத்தில் சேர்ந்து, பின் அரசியலில் நுழைந்து, சில வருடங்களிலேயே ஜெர்மனியின் சர்வ அதிகாரம் பொருந்திய அதிபராக ஆகிறார்.

ஹிட்லரின் நாடு பிடிக்கும் ஆசையை பிரிட்டனும் பிரான்சும் ஆரம்பத்தில் பெரிதாகக் கண்டுகொள்ளவில்லை — கம்யூனிச ரஷ்யாவையே எதிரியாகப் பார்த்தன. பிரான்ஸ் கைப்பற்றப்பட்ட பின்புதான் ஹிட்லரின் உண்மை முகம் தெரிகிறது. ஜெர்மனி, இத்தாலி, ஜப்பான் இணைந்த அச்சு சக்தி உருவாகிறது.

சோவியத் மீதான தாக்குதலில் பெருத்த சேதம் சந்தித்த ஜெர்மனி அதன்பின் எழவே இல்லை. ஹிட்லர் தற்கொலை செய்துகொள்கிறார். Pearl Harbour தாக்குதலால் போரில் இணையும் அமெரிக்கா, ஜப்பான் மீது அணுகுண்டை வீசுகிறது. பல ஆயிரம் மக்கள் கொல்லப்படுகின்றனர்.

இரண்டாம் உலகப் போரின் விரிவான வரலாறு தெரிந்துகொள்ள நிச்சயம் வாசிக்கத் தகுந்த நூல்.

தோற்றவன் வலியிலிருந்து மீண்டெழும்போது அவனின் முன் நியாயங்களின் மதிப்பு தரமிழந்துதான் போகும். முதல் உலகப் போரின் காரணகர்த்தா ஜெர்மனி என்று உலக நாடுகள் குற்றம்சாட்டி அதை ஒடுக்கியபோது, இரண்டாம் உலகப் போருக்கும் நானே காரணகர்த்தா என்று தன்னை மேம்படுத்திக்கொண்டு மீண்டும் ஜெர்மனி யுத்தத்திற்குத் தயார் நிலையில் நிற்கிறது.

படைவீரனான ஹிட்லர் முதலாம் உலகப்போரில் தன் நாடு வஞ்சிக்கப்பட்டது என்ற ஆதங்கத்தில் அரசியலை ஆயுதமாக்கி, வாய்ச் சாமர்த்தியத்தால் நாட்டை ஆளும் பொறுப்பிற்கு வருகிறார். தனிப்பட்ட யூத வெறுப்பிற்கு செயல் வடிவம் கொடுத்து அவர்களைக் கொன்று அழிப்பதை உலக நாடுகள் வெறும் வேடிக்கை பார்க்கின்றன.

போலந்து மீது ஜெர்மனி தாக்குதல் நடத்தியதே இரண்டாம் உலகப் போரின் அங்கீகாரமான தொடக்கம். பிரிட்டனின் மெத்தனப்போக்கும் ஹிட்லரின் செயல்களை வேடிக்கை பார்த்ததும் பல்லாயிரம் உயிர்களின் இழப்புக்குக் காரணம் எனலாம்.

பாரீஸைக் கைப்பற்றியது போல சோவியத் ரஷ்யாவையும் வளைக்க முடியும் என்ற கனவுடன் இருந்த ஜெர்மனிக்குக் கிடைத்த பதிலடி, போரின் முடிவை மாற்றியமைத்து ஹிட்லரின் சகாப்தத்தையும் முடித்து வைத்தது. ரஷ்யர்களின் ஒற்றுமையும் ஸ்டாலினின் முன்னேற்பாடுகளும் ஒரு கதாநாயக அந்தஸ்தைத் தருகின்றன.

இறுதியாக அமெரிக்கா உள்நுழைந்து உலகத்திற்கே "பெரிய அண்ணன்" என்ற பட்டத்தைத் தட்டிப்பறிக்கிறது. அதிகாரத்துடன் சேர்ந்த தனிமனித வெறுப்பின் ஆழம் இனவொழிப்பின் உச்சத்தைத் தொட்டு, எஞ்சிய மிச்சம் உலகத்திற்குச் சாட்சியாக மாறுகிறது.

திருமண வீட்டில் வயிறு முட்ட தின்றுவிட்டு, இனிப்பு பீடா ஒன்றை மென்றபடி பந்தியை விட்டு கிளம்பும்போது ஏற்படும் திருப்தியை இந்தப் புத்தகம் அளித்துவிட்டது. மருதன் எழுதிய "தி ஹிட்லர்" புத்தகத்தைப் படித்தேன். அதன் தொடர்ச்சியாக இரண்டாம் உலகப்போருக்கு சம்பந்தப்பட்ட அனைத்தையும் படித்தாகிவிட்டது. புத்தகங்கள் அப்படித்தான் இருக்க வேண்டும் — படிப்பதற்கான தொடர்பையும் ஆர்வத்தையும் பிடித்துக்கொண்டிருக்க வேண்டும்.

ஹிட்லர், ஸ்டாலின், ரஷ்ய உளவுத்துறை கே.ஜி.பி, லெனின், முசோலினி, சோவியத், நெப்போலியன், ஃபிடல் கேஸ்ட்ரோ, சே குவாரா, கம்யூனிசம், நாஜி என்று நீண்டுகொண்டே சென்ற பட்டியலுடன், The Imitation Game, Schindler's List போன்ற திரைப்படங்களின் உதவியுடன், இரண்டாம் உலகப்போரை முழுத்திருப்தியுடன் படித்திருக்கிறேன். முழுமையாக வாசிக்கத் தகுந்த நூல்.