Reviews for மரப்பசு

பெண்களை அடிமைப்படுத்தும் சம்பிரதாயங்கள், கம்யூனிசம் பேசும் நண்பர்களின் சேர்க்கை, சீராளிக்கு நடந்த கொடூரம் இன்ன பிற சம்பவங்களால் திருமணத்தை வெறுத்து கோபாலியின் தவறான வழிகாட்டலாலும் "தீண்டும் புரட்சி" செய்யும் எண்ணத்தாலும் உறவுகளை உதறிவிட்டு தாசி வாழ்க்கை மேற்கொள்ளும் அம்மணி என்கிற பிராமணப் பெண்ணின் வாழ்க்கையையும் அவள் சந்திக்கும் நபர்களையும் விவரிக்கிறது மரப்பசு.

தி.ஜா அவர்களின் கதை சொல்லும் பாணியும் மனிதர்கள், நிகழ்வுகள் பற்றிய எளிமையான இயல்பான விவரணங்கள் அழகு. மார்க்சியத்தை நியாயப்படுத்திக் கொண்டு மார்க்ஸியம் பேசும் அம்மணியின் தோழிகளின் போலிவேடத்தை அம்மணியூடாகவும், அம்மணியின் போலிச் சீர்திருத்தவாதத்தை அவளின் பெரியப்பா மற்றும் இறுதி வரிகளூடாகவும் காட்டிய விதம் அருமை. க்ரைம் நாவல்களை மாத்திரம் வாசிக்கும் பெரியப்பா தனது வாசிப்புப் பழக்கத்தை நியாயப்படுத்திய விதம், காட்டான் கோபாலய்யரின் ஈனச்செயலூடாக ஒரு சிறு வதந்தி ஒரு பெண்ணின் வாழ்க்கையை எப்படிப் பாதிக்கிறது என்று எடுத்துக்காட்டிய விதம், பெரியப்பாவின் கோபத்தை அன்பின் வெளிப்பாடு என அம்மணி நியாயப்படுத்தும் இடம், மரப்பசு என்ற பெயருக்கு கூறப்பட்ட விளக்கம் என ரசித்து மகிழ்ந்தவை பல.

எனினும் பாத்திரப் படைப்பில் குறிப்பாக அம்மணி, கோபாலி ஆகிய பாத்திரங்களின் படைப்பில் பல ஓட்டைகளை காண முடிந்தது. திருமணம் செய்யாது சுதந்திரமாக வாழ்வதற்கும் தாசி வாழ்க்கைக்கும் இடையிலான மிகப்பெரிய இடைவெளியை சர்வசாதாரணமாக கடப்பது, கோபாலியுடன் நல்லுறவைப் பேணிக் கொண்டு வெறும் பாலியல் இச்சைக்காக தன்னை தேடிவருபவர்களிடம் சாதாரணமாக உறவு வைத்துக் கொள்வது போன்றவை குழப்பமாக இருந்தன. மூன்று அசாதாரணமான பாத்திரங்கள் கதையின் முக்கியமான கதாபாத்திரங்களாக அமைந்தமை சற்று மிகைப்படுத்தப்பட்டது போல் தோன்றியது.