Reviews for பொய்மான் கரடு

எளிமையான, சுவாரசியமான நாவல். படிக்க ரசிக்கலாம்.

சேலத்தில் இருந்து நாமக்கல் செல்லும் வழியில் "பொய்மான் கரடு" என்று அழைக்கப்படும் ஒரு கரிய பெரிய பாறை இருப்பதாக நூலில் கூறப்படுகிறது. அது உண்மையா கதைக்காகச் சொல்லப்பட்டதா என்று தெரியவில்லை.

நூலின் முன்னுரையில் கல்கி கூறுகிறார்: "நம் ஒவ்வொருவருடைய வாழ்க்கையிலும் சில சமயம் பொய்மான்கள் எதிர்ப்படுகின்றன. அந்தச் சமயத்துக்கு அவை உண்மையாகவே தோன்றுகின்றன. அந்தப் பொய் மான்களைத் துரத்திக்கொண்டு நாம் ஓடுகிறோம்..." — இக்கதையிலும் மெய் மான் இருக்கப் பொய் மானை நாடிச் சென்றவன் கதையே பொய்மான் கரடு.

கையில் இருக்கும் பொருளின் அருமை அதை இழந்த பிறகே புரியும். மனம் கை அருகில் இருக்கும் மெய் மானை விட்டு, கைக்கெட்டாத பொய் மானை நாடும். காலம் தாழ்த்தாமல் கையில் இருப்பவற்றைக் கொண்டாடி இன்புற்று வாழவேண்டும் என்ற எண்ணமே கதையின் முடிவில் எழுந்தது.

கவர்ந்த வரிகள்: "வானத்து வைரச் சுடர்களுக்கு மத்தியில் வெள்ளிப் படகு மிதந்து கொண்டிருந்தது", "மேலே வானமும் கீழே நான்கு திசைகளும் இருட்டி இருந்தன" — கல்கியின் வர்ணனை அழகு!

எதிர்பாராத கிளைமாக்ஸ் — அதுதான் இந்தக் கதையின் சிறப்பே!

அருமையான புத்தகம். இந்த ஆடியோபுக்கின் விவரிப்பாளர் அற்புதமான வேலை செய்திருக்கிறார். கதை, கதாபாத்திரங்கள், விவரிப்பு — எல்லாமே சிறப்பாக இருந்ததால் நிறுத்தவே மனமில்லை. செம்பவளவள்ளியும் செங்கோடனும் என் மனதில் நிற்கும் ஜோடிகளில் ஒருவர் ஆகிவிட்டார்கள்.

சுருக்கமான கதை. சற்று எதிர்பார்க்கக்கூடியதாக இருந்தாலும், கடைசியில் வரும் முடிவு எதிர்பாராத திருப்பமாக இருந்தது.

கிளைமாக்ஸில் வரும் ட்விஸ்ட் மிகவும் அருமையாக இருக்கிறது. நல்ல கதை!

இப்படியும் "திரில்லர்" கதை எழுதலாமா என்று ஆச்சரியப்பட வைக்கும் படைப்பு! கிளைமாக்ஸ் செம டச் — அமர கவிஞரின் கைவண்ணம்!

அமரர் கல்கி எழுதியுள்ள "பொய்மான் கரடு" மனித வாழ்வில் எதிர்படும் பொய்மான்களையும் அவற்றால் ஏற்படும் விளைவுகளையும் விவரிக்கிறது.

நம் வாழ்வில் பொய்மான்கள் எதிர்படுகின்றன. அவற்றை உண்மை என்று நம்பி அதன் பின்னால் ஓடுகிறோம். துரத்திக்கொண்டு ஓடும்போது மனதில் பரபரப்பு, கிளர்ச்சி, தீவிர பற்று ஏற்படுகின்றன. கடைசியில் அது ஒரு மாயை என்பதை உணர்ந்து ஏமாற்றம் அடைகிறோம்.

சேலத்தில் இருந்து நாமக்கல் செல்லும் வழியில் வாகன ஓட்டுநர் கல்கியிடம் கூறிய கதையே பொய்மான் கரடாக விரிவடைந்துள்ளது. கதைக்களம் சேலம் சுற்றுவட்டாரத்தில் அமைந்துள்ளது. கதாநாயகன் செங்கோடன் விவசாயம் செய்து ஐந்து ஏக்கர் காட்டுக்கு ராஜாவாக வாழ்கிறான். அவனது காதலி செம்பவளவள்ளி. இவர்களுக்கிடையில் பொய்மானாக குமாரி பங்கஜா வருகிறாள். செங்கோடன் அந்த மாயமான் வலையில் விழ, கொலைக்குற்றவாளி ஆகிறான். குமாரி பங்கஜாவும் அவள் கூட்டாளிகளும் யார்? அவர்களின் திட்டம் என்ன? செங்கோடன் எப்படி இவர்கள் சதியிலிருந்து மீள்கிறான் என்பதை எளிய நடையில் விவரிக்கிறார் கல்கி.

நாம் ஒவ்வொருவரும் கடமையை உணர்ந்து சரியாக நிறைவேற்ற முயற்சி செய்தால் பல பொய்மான்களின் வலையிலிருந்து தப்பிக்கலாம். கல்கியின் பொய்மான் கரடு அத்தகைய உண்மையை நமக்கு உரக்கச் சொல்கிறது.

ஆலமரம் தன் மகத்தான பருமனிலோ அல்லது பான்சாய் வடிவிலோ — எப்படி இருந்தாலும் பிரமிப்பூட்டும். கல்கி கிருஷ்ணமூர்த்தி அவர்களும் அப்படிப்பட்ட ஆலமரம் தான். 'பொன்னியின் செல்வன்', 'சிவகாமியின் சபதம்' போன்ற ஆயிரம் பக்கங்களுக்கு மேலான பிரம்மாண்ட நாவல்களை எழுதிய அந்த மேதை, இவ்வளவு சிறிய குறுநாவலையும் அதே தரத்தில் எழுதியிருப்பது ஆச்சரியமாக இருந்தது.

இது ஒரு காமெடி த்ரில்லர். கஷ்டப்பட்டு சம்பாதித்த பணத்தின் மீது அதீத பற்று கொண்ட செங்கோடக் கவுண்டனின் கதை. செம்பவளவள்ளி அவனது காதலி. இருவரும் காதலை வெளிப்படுத்தி திருமணம் திட்டமிடும் வேளையில், கவர்ச்சியான குமாரி பங்கஜா வருகிறாள் — செங்கோடனின் மனதை சற்று அசைக்கிறாள். ஆனால் பங்கஜாவுடன் வரும் இரண்டு உறவினர்களுக்கு வேறு நோக்கங்கள் இருக்கின்றன. அவர்களின் சதி என்ன? செங்கோடன் அதில் சிக்கினானா? காதலியை மணந்தானா? பணத்திற்கு என்ன ஆனது? — இவை அனைத்திற்கும் கல்கி பாணியில் — வேகமாக, சுவாரசியமாக, பொழுதுபோக்காக பதில் கிடைக்கிறது.

வருடத்தின் தொடக்கத்தில் படிக்க ஏற்ற அருமையான appetizer!