Reviews for தேசாந்திரி

நான் படித்த சிறந்த புத்தகங்களில் ஒன்று. குழந்தைப் பருவத்தில் கனவு கண்ட நினைவுகளையும், பயணம் செய்த நாட்களையும் மீண்டும் கொண்டு வருகிறது இந்நூல்.

நாம் அனுபவித்தும் எழுதாமல் விட்ட விஷயங்களைப் பேசுகிறது இந்தப் புத்தகம். வீட்டு ஜன்னல் வழியாகக் காணும் சின்ன விஷயங்களைக் கூட நேசிக்கச் சொல்கிறது. வாழுங்கள், ரசியுங்கள்.

நான் வாசித்த முதல் எஸ்.ரா புத்தகம். எனக்குள் தூங்கிக்கொண்டிருந்த பயணியை எஸ்.ரா தட்டி எழுப்பிவிட்டார். அவர் கூறிய இடங்களுக்குச் சென்று அவர் பார்வையில் உலகைப் பார்க்க வேண்டும்.

கொடைக்கானல் சைக்கிள் பயணம், மூணார் மேகங்கள், கங்கை கொண்ட சோழபுரம், மழை நிறைந்த லோனாவலா, கல் மரங்கள் உள்ள திண்டிவனம், குருமலை, சமணர் பள்ளிகள் — இன்னும் பல. இந்நூல் பயணத்திற்கு வழிகாட்டும். வாழ்க்கையே ஒரு முடிவே இல்லாத பயணம்தானே.

திரு.எஸ்.ராமகிருஷ்ணன் அவர்களின் அற்புதமான எழுத்து. ஒவ்வொரு அத்தியாயமும் நம் நாட்டின் பல்வேறு இடங்களுக்கு அழைத்துச் செல்கிறது. ஒரு சிறிய வீடு முதல் உயரமான சிகரங்கள் வரை, சிறிய கிராமங்கள் முதல் பெரிய நகரங்கள் வரை — இடங்களின் சிறப்பை மட்டுமல்ல, மனிதர்களின் மனிதநேயத்தையும் பதிவு செய்துள்ளார். திருநங்கைகளின் உணர்வுகள், நாம் இழந்துவிட்ட பொன்னான நினைவுகள் மற்றும் பண்பாடு பற்றியும் பேசுகிறார்.

எஸ்.ராவின் பயணக்கட்டுரைகள். தமிழ் வாரஇதழில் வெளியான 41 கட்டுரைகளின் தொகுப்பு. நான்கு பிரிவுகளாகப் பிரிக்கலாம்: 1) சாரநாத், புனித தாமஸ் மலை, தனுஷ்கோடி, கொற்கை போன்ற இடங்களின் விவரணை. 2) தண்டி, மணியாச்சி ரயில் நிலையம், கட்டபொம்மன் மறைந்த காடு, ராமானுஜர் இல்லம் போன்ற வரலாற்றுச் சிறப்புமிக்க இடங்கள். 3) மலைகள், மழை, மேகங்கள், கடல் குறித்த இயற்கை சிந்தனைகள். 4) திருநங்கை திருவிழா, மழைக்கான தவளை திருமணம் போன்ற மனிதர்கள் பற்றிய சிந்தனைகள்.

ஒவ்வொரு கட்டுரையும் 4-5 பக்கங்கள்தான், ஆனால் நிறையச் சிந்திக்க வைக்கும். குழந்தைப் பருவ எண்ணங்களை நினைவூட்டும் புத்தகம்.

"பால்யம் என்பது உலகம் நமக்கு மிக நெருக்கமாக இருந்த காலம்." இந்தப் புத்தகத்தை சீக்கிரம் வாசித்து மறந்துவிட முடியாது.

சிறுவயதில் ரசித்த சின்ன விஷயங்கள் முதல் வியந்த விந்தைகள் வரை — ஒரு மெல்லிய இளங்காற்று நம் பழைய நினைவுகளை வருடியது போன்ற இனிமையான சுகம் கிடைக்கும். ஆயிரம் ஆண்டுகள் பழமையான வரலாற்றுச் சிறப்புமிக்க இடங்கள் சிதிலமடைவது குறித்து ஆசிரியர் சொல்லும்போது துக்கம் தொண்டையை அடைக்கிறது.

வளர்ந்த பிறகு நாம் எதையும் ரசிப்பதில்லை — கைபேசி என்னும் கூண்டில் கிளிகளாக வாழ்கிறோம். இந்தப் புத்தகத்தை வாசித்த பின் எங்காவது பயணம் செல்ல ஆசையாக உள்ளது. "எல்லா பக்கமும் திறந்துகிடக்கிறது உலகம். விருப்பமும் தேடலும் நம்மைக் கொண்டு செல்ல அனுமதிப்பது மட்டுமே நமது வேலை!"

எஸ்.ரா எப்போதும்போல் சிறந்த வாசிப்பு அனுபவத்தைத் தருவதில் தவறுவதில்லை. அவரது பயண எழுத்து எப்போதும் ஈர்க்கும்.

நிச்சயம் வாசிக்க வேண்டிய புத்தகங்களுள் ஒன்று. "தேசாந்திரி" என்ற வார்த்தையே ஒரு வசீகரத்தன்மை கொண்டது. அது உங்கள் ஆயுளுக்கும் உள்ளிழுத்து வைத்துக்கொள்ளும்.

ஆசிரியரின் பயண நாட்குறிப்பு. சென்ற இடங்களின் உண்மைத்தன்மையை அழகாகச் சொல்கிறார். இந்தியாவின் பல இடங்களை அவரது கண் வழியாகப் பார்க்கும் அனுபவம் தருகிறது.

சிறப்பான பயணக்கட்டுரைப் புத்தகம். குறிப்பாக நண்பனின் மகள் பற்றிய கதை மிகவும் கனமானது, மனதை நெகிழ வைக்கிறது.

அதீத அனுபவம் தரும் புத்தகம். எஸ்.இராமகிருஷ்ணன் அவர்களின் பயண எழுத்து ஆழமாகவும் உணர்வுபூர்வமாகவும் இருக்கிறது. அவருக்கு நன்றி.