கண்டேன் கனிந்தேன் கலந்தேன் கதையில் வரும் ராகவனின் கதை

“சீரியஸா பேசிட்டு இருக்கேன்-க்கா. புரிஞ்சுக்காம தூங்க போறேன்னு சொல்ற.. இவருக்கு பொண்ணு தேடிட்டு இருக்காங்க.. கிட்டத்தட்ட ஆறேழு வருஷமா பொண்ணு தேடுறாங்க.. ஜாதகத்துல தோஷம் இருக்கு. 34 வயசு ஆகிடுச்சு. இதுக்கு மேல யாரு பொண்ணு கொடுக்க போறாங்கன்னு ஆள் விரக்தியில் இருக்கார். உனக்கும் அவரைப் போலவே தோஷம் இருக்கு. அவர்கிட்ட நேரடியாக கல்யாண விஷயத்தை பத்தி பேச முடியாது.அவர் பிரண்டு கிட்ட விஷயத்த போட்டு வாங்கினேன்.

“அவர் தனக்கு மனைவியா வரப்போறவங்க கிட்ட எதிர்பார்க்கிறது ஒன்னே ஒன்னு தான். வீட்டை பொறுப்பா பார்த்துக்கணும். அன்பா இருக்கணும். அவ்வளவுதான். வேற எந்த எதிர்பார்ப்பும் இல்லையாம்..!! ஏழு,எட்டு வயசு மூத்த ஆள உன்னை கல்யாணம் பண்ண சொல்றது, எனக்கும் யோசனையா தான் இருந்தது.நம்ம வீட்டு சூழ்நிலைக்கு இவரை விட உனக்கு பெஸ்ட் ஆப்ஷன் இருக்காதுன்னு,ரெண்டு நாளா நல்லா யோசிச்சு தான் இப்போ உன்கிட்ட சொல்றேன். நல்ல முடிவு எடு” என்ற அவள் அத்தோடு நிறுத்தி இருந்தால், வைஷ்ணவி நல்ல பதிலாக சொல்லி இருக்கக்கூடும்.

போகிற போக்கில், “ஆபீஸ்ல அவர பத்தி தெளிவாக விசாரிச்சுட்டேன். எந்த பொண்ணு கிட்டயும் அவர் தப்பா நடந்ததா யாரும் சொல்லல.பொண்ணுங்க கிட்ட ரொம்ப கண்ணியமா நடந்துக்குவார். ஆனால் ஏன் அவர் மேல அப்படி ஒரு பழிச்சொல் வந்துச்சுன்னு எனக்கு தெரியலை” என்று நிறுத்தவும்,

திடுக்கிட்டு போய் வைஷ்ணவி பார்க்க, அக்காவை ஓரக்கண்ணால் பார்த்துக் கொண்டே, “கல்யாணமான பொண்ண லவ் பண்ணி, அவளுக்காக சூசைட் வரைக்கும் போயிருக்கார் என்று மட்டும் ஒரு தகவல் இருக்கு. வயசு கோளாறுல அடுத்தவன் பொண்டாட்டி வேணும்னு நினைச்சு இருக்கலாம். நீ எதுக்கும் யோசிச்சு ஒரு முடிவு எடு” என்று விட்டு சென்றுவிட,நெஞ்சில் கை வைத்து அமர்ந்து விட்டாள் வைஷ்ணவி.

தங்கையை நிற்க வைத்து கேள்வி கேட்கும் எண்ணம் கூட வரவில்லை.

'அடுத்தவன் பொண்டாட்டியை பார்த்தவனை போய்,எனக்கு கட்டி வைக்கணும் நினைக்கிறா பாவி.. இவளுக்கு நான் என்ன குறை வச்சேன்.. நான் வேலைக்கு போன புதுசுல, அவ ஆசைப்பட்டதை வாங்கி கொடுத்ததில்ல..அதுக்காக இந்த மாதிரி ஒரு ஆம்பளைய எனக்கு பார்ப்பாளாமா?' என்று திட்டிக்கொண்டே அறையை விட்டு வெளியே வர,அவள் வெளியே வருவதற்கு காத்திருந்தவள் போல, உள்ளே சென்று கதவை அடைத்துக் கொண்டாள் ரூபா.