Reviews for தண்ணீர் தேசம்

கவிதை நடையில் தமிழில் புதிதாய் அழகாகக் கோர்க்கப்பட்ட சுவாரசியமான புதினம். தென்றலாகத் தொடங்கி புயலாய் முடிகையில் படபடப்பின் உச்சத்தில் பெங்களூரிலும் புழுக்கம் எடுத்தது உண்மை தான். படித்த ஒவ்வொரு பத்தியிலும் கதையைப் படமாகக் கண்முன் ஓட்டுகிறார் கவிப்பேரரசு, காதல் கவிமுரசு.

"அனுபவம் வேண்டுமா - இளமையை இழ. காதல் வேண்டுமா - இதயத்தை இழ." கவிதை நடையிலான என் முதல் தமிழ் நாவல், தனித்துவமான அனுபவம்! கவிஞர்கள் கதை சொல்லும்போது நிகழ்வுகளை விட நடை தான் கவர்கிறது. இந்தக் கடற்பயண காவியத்தில் விரக்தி மிக உண்மையானது - கடல் நீரின் சுவையும் உப்புக் காற்றும் வார்த்தைகளில் உணர முடிகிறது. ஒவ்வொரு அத்தியாயத்தின் முடிவிலும் நெருக்கமாக இருந்தும் எட்டாத மீட்பு - இவ்வளவு கஷ்டமாக இருக்க வேண்டுமா என ஏங்க வைக்கிறது. வைரமுத்துவின் வார்த்தைகள் கலப்படமில்லாத போதை. மறக்க முடியாத படைப்பு.

வைரமுத்துவின் வித்தியாசமான நாவல் - கவிதை நடையில் ஒரு நாவல். விஞ்ஞானம், காதல், மனித உணர்வுகள், சமூகம் என அனைத்தும் இருக்கின்றன. ஒவ்வொரு வரியும் அழகு. "தன்மேல் விழும் மண்ணைச் சோதனை என்று சொன்னதுண்டா விதை?", "இயற்கை தாலாட்டினால் கடல் தொட்டில், இயற்கை தள்ளிவிட்டால் கடல் கல்லறை", "உழைக்காதவன் கையில் தங்கமும் அழுக்கு, உழைப்பவன் கையில் அழுக்கும் தங்கம்". சிறிது செயற்கையாக இருந்தாலும் படிக்கும்போது பெரிதாகத் தெரிவதில்லை. கடல் படத்தில் வரும் "சித்திரை நிலா" பாடல் வரிகள் இந்த நாவலிலிருந்தே வந்தவை!

சிறிது விஞ்ஞானம், சிறிது அறிவியல், சிறிது காதல், சிறிது பகுத்தறிவு, நிறைய நம்பிக்கை கொண்ட அழகு தமிழில் அருமையான கதை. வைரமுத்துவின் இலக்கியப் படைப்பை முதல்முறையாக வாசிக்கிறேன். கவிதை நடையிலான தமிழை ரசித்தேன், தத்துவமும் கவித்துவமும் பிடித்தது, கடலுக்குள் சென்ற குழுவின் துயரத்தில் துடித்தேன், அவர்களின் பாதுகாப்புக்காக பிரார்த்தித்தேன், இறுதி வரை வேதனைப்பட்டேன்.

காதலிக்கிறது சுலபம், காதலிக்க வைக்கிறது ரொம்ப கஷ்டம். பெண்களுக்கு அப்புறம் அதைச் செய்யக் கூடியவர்கள் கவிஞர்கள் மட்டும் தான். அந்த வகையில் என்னைக் காதல் கொள்ள வைத்த காவியம். கடல் மேல் காதல். "வாசிக்கக் கிடைக்காத வரலாறுகளைத் தின்று செரித்து நின்று சிரிக்கும் நிஜம்" - அடடா!

கற்பனை நதிகளின் சங்கமம். தென்றலாய் துவங்கி புயலாய் மாறிய காதல் கடற்பயணம். தமிழோடு இத்தனை காதலா! காதலோடு இத்தனை விஞ்ஞானமா! விஞ்ஞானத்தோடு இத்தனை மெஞ்ஞானமா! தமிழ் மேல் காதல், கலைவண்ணன் மேல் காதல், குட்டி எலியின் மீதும் காதல் பிறந்தது!

"தண்ணீரைக் கூட சல்லடை கொண்டு அள்ளலாம் - அது பனிக்கட்டி ஆகும் வரை பொறுத்திருந்தால்." கவிதை நடையில் எழுதிய நாவல். கடலை நேசிக்கும் கலைவண்ணன், தண்ணீரை அஞ்சும் தமிழ்ரோஜா. அவளது பயத்தைப் போக்க நினைக்கிறான். படகு பழுதடைந்து உணவும் குடிநீரும் இன்றி வாடும் இவர்கள் உயிர் பிழைத்தார்களா? செந்தமிழும் விஞ்ஞானமும் சரிவரக் குழைத்து எழுதியிருக்கிறார் கவிப்பேரரசு. வாழ்க்கையின் எல்லா நிலைகளிலும் நம்பிக்கை இழக்காமல் போராடக் கற்றுக் கொடுக்கும் கதை.

இந்தப் புத்தகத்தை வாங்கியபோது தவறு செய்துவிட்டேன் என நினைத்தேன். சில மாதங்கள் திறக்கவில்லை. ஒரு நாள் வேறு வழியில்லாமல் திறந்தேன் - முடிக்காமல் விட முடியவில்லை! வைரமுத்து மகத்தானவர். படிக்கும்போதே கதையை கற்பனை செய்ய முடிகிறது. எந்தப் புத்தகத்தோடும் ஒப்பிட முடியாத, மிகவும் சுவாரசியமான படைப்பு. "இனி தமிழுக்கு மரணம் இல்லை" - அழகான வரிகள்.

படிச்சு முடிச்சதும் தோணுனது - சேவனாக கடற்கரையில் உட்கார்ந்து பார்த்துக்கொண்டிருந்தவளை, தைரியத்தை வளர்க்கிறேன் வாழ்க்கையைக் காட்டுகிறேன் என்று வம்படியாக இழுத்துக்கொண்டு போய் புயலில் புலம்ப வைத்துவிட்டானே! தமிழ்ரோஜாவை தர்க்கம் செய்து இழுத்துச் செல்லும் கலைவண்ணன், இக்காலத்தின் பார்வையில் அவளது விருப்பத்திற்கு மாறாக பலவந்தப்படுத்தும் ஒரு நச்சுக் காதலனாகவே தெரிகிறான்!

வைரமுத்துவின் எழுத்தின் தீவிர ரசிகை நான். கவிதை வடிவிலான கதையின் அழகில் மூழ்கித் திளைக்கச் செய்தது தண்ணீர் தேசம். கடல் தான் இந்தக் கதையின் மூலம். கடற்காதலன் கலைவண்ணன், தண்ணீரைக் கண்டாலே ஓடும் தமிழ்ரோஜா - இருவரும் நான்கு மீனவர்களுடன் படகில் கடலுக்குள் சிறு பயணம் மேற்கொள்ள, அது எதிர்பாராத நெடும்பயணமாக மாறுகிறது. கடலன்னை வைத்த அனைத்து சோதனைகளிலும் வெற்றிகரமாக மீண்டார்களா என்பதே கதை. விஞ்ஞானக் காவியம் என்ற பெயருக்கு ஏற்ப தகவல் பெட்டகமாக மாற்றியிருக்கிறார் கவிப்பேரரசு. கடலையும் தமிழையும் அறிவியல் தகவல்களையும் நேசிக்கும் எனக்கு முக்கனி விருந்தாக தித்தித்தது.