Reviews for ஜிப்ஸி

நம்மை பயணம் செல்ல தூண்டும் புத்தகம். நாம் அறிந்திராத நாடோடிகளின் வாழ்க்கையைப் பற்றி அழகாகச் சொல்லியிருப்பார் ராஜூமுருகன்.

ராஜூமுருகன் நம்மை தெற்கிலிருந்து வட இந்தியா வரை, நாடோடிகளின் தெருக்கள் மற்றும் கூடாரங்கள் வழியாக ஒரு புதிய பயணத்திற்கு அழைத்துச் செல்கிறார். நாடோடி மக்களின் வாழ்க்கையை நெருக்கமாகப் பதிவுசெய்திருக்கும் அருமையான புத்தகம்.

ராஜூமுருகனின் ஜிப்ஸி புத்தகத்தின் சுருக்கம். புகழ்பெற்ற ஜோக்கர் படத்திற்குப் பிறகு ராஜூமுருகன் இயக்கிய ஜிப்ஸி திரைப்படத்தின் அடிப்படையாக இந்தப் புத்தகமே இருக்கலாம் என்று தோன்றுகிறது. ஜீவா நடிக்கும் ஜிப்ஸி திரைப்படமும் எதிர்பார்க்கப்படுகிறது.

பெரும் பணம் வைத்துக்கொண்டு, சொகுசாகச் செல்லும் பயணங்கள் பற்றி இப்புத்தகத்தில் மேற்கோள் காட்டவில்லை. நாடோடிகளைத் தேடி நாடோடிகளாக மாறி நாடோடிகளாக வாழ்ந்து எழுதிய புத்தகம் இது.

அன்றாட வாழ்வின் அலைச்சல்களில் வாழவே மறந்துவிட்ட நமக்கு, வாழ வழி சொல்லும் பயணங்களும் மனிதர்களும் இப்புத்தகத்தின் ஒவ்வொரு பக்கத்திலும் இருக்கிறார்கள்.

பயணம் பல மனிதர்களின் காதலையும், பாசத்தையும், புறக்கணிப்புகளின் வலியையும் நமக்கு கற்றுத்தரும் என்பதே ஜிப்ஸி தொடரின் கரு. இதை பல எடுத்துக்காட்டுகளுடன் எழுதியுள்ளார் ஆசிரியர் ராஜூமுருகன்.

பல மகத்தான தலைவர்கள் உருவாக நாடோடி வாழ்க்கை தான் உதவியது என்பதை ஏற்றுக்கொள்ள கூடிய கருத்தே. தந்தை பெரியார், புரட்சியாளர் சே, வைக்கம் முகமது பஷீர், புத்தர் இவர்களின் நாடோடி வாழ்க்கை கற்றுத்தந்த பாடங்களை ராஜூமுருகன் உதாரணமாக பதிவுசெய்துள்ளார்.

இயற்கை, இறை, இசை, இயக்கம், உறவு, நட்பு, போதை என மனிதன் தீவிரமாக எதையாவது பற்றிக்கொள்கிறான். பற்றிக்கொண்டது எது என்பதில்தான் இருக்கிறது ஒவ்வொருவரின் வாழ்வும் தாழ்வும் என்ற வரிகள் மிகவும் ரசிக்கத்தக்கவை. நாடோடி வாழ்க்கையின் சிரமங்களையும் அழகையும் சமநிலையோடு சொல்லியிருக்கும் நல்ல புத்தகம்.

ஆசிரியர் செல்லும் இடங்களுக்கெல்லாம் நம்மையும் அழைத்துச் செல்லும் அற்புதமான பயணப் புத்தகம். வாசிக்கும்போது நாமும் அவருடன் சேர்ந்து பயணிப்பது போன்ற உணர்வை ஏற்படுத்துகிறது.

"யாதும் ஊரே யாவரும் கேளிர்" என்ற சங்க இலக்கியத் தத்துவத்தை நாடோடி மக்களின் வாழ்க்கை வழியாக அழகாக உணர்த்தும் புத்தகம். படித்து முடித்ததும் மனதில் ஆழமான அமைதியை ஏற்படுத்தியது.

ஜிப்ஸி ராஜூமுருகனின் நாடோடிப் பயணம். இது ஒரு நாடோடி சர்க்கஸ்காரனின், பன்றி மேய்ப்பவனின், நரிக்குறவனின், வாத்து மேய்ப்பவனின், பக்கெட் விற்பவனின், தெருக்கூத்துக்காரனின், புகை போடுபவனின், சாட்டை அடிப்பவனின் வாழ்க்கைக் கதை. ஒன்றுமே பெரிதுமே இல்லாத அற்புதங்களின் அற்புதம்.

"நாள் ஒன்றின் விடியலையும், இருளையும் பார்ப்பதே பயணங்களின் பெரும் தரிசனம்" என ஜிப்ஸியில் என்னையும் பயணிக்கச் செய்தார். ஒரு நாடோடியின் சுயசரிதையை படைத்ததற்கு ராஜூமுருகனுக்கு நன்றி.

பயணங்களை நேசிப்பவர்கள் இந்தப் புத்தகத்தை நிச்சயம் விரும்புவார்கள். நாடோடிகளைப் பற்றிய புத்தகம் இது. தமிழ்நாடு முழுவதும் உள்ள நாடோடிகளின் கதைகளையும் அவர்களின் தற்போதைய வாழ்க்கையையும் ஆசிரியர் ராஜூமுருகன் தேடிச் சென்று பதிவு செய்திருக்கிறார்.

முழுமையான ஆராய்ச்சிப் புத்தகமாக இல்லாவிட்டாலும், இந்த விஷயத்தில் மேலும் படிக்க வேண்டிய நூல்களையும், ஆராய்ச்சி செய்பவர்களையும் குறிப்பிட்டிருக்கிறார். புத்தகத்தில் இரண்டு தடங்கள் ஓடுகின்றன - ஒன்று காசியில் ஆசிரியரின் அனுபவம், மற்றொன்று தமிழ்நாடு முழுவதும் நாடோடிகளைச் சந்தித்தது.

புத்தர் முதல் பிரபாகரன் வரை நாடோடிகளாக வாழ்ந்தவர்களை நுட்பமாக இணைத்திருக்கிறார். இசை, புத்தகங்கள், பயணங்கள் மீதான ஆசிரியரின் ஆர்வம் புத்தகம் முழுவதும் தெரிகிறது. தினமும் சந்திக்கும் மனிதர்களைப் பற்றி நாம் எவ்வளவு குறைவாக சிந்திக்கிறோம் என்பதை உணர்த்தும் சிறந்த சிறு வாசிப்பு.

வாழ்க்கை முழுவதும் நாடோடிகளாக வாழ நிர்பந்தப்படுத்தப்பட்டவர்கள் சபிக்கப்பட்டவர்களே!

பயணங்கள் மனிதர்களை பக்குவப்படுத்தும் என்பது உண்மைதான். ஆனால், பயணப்பட நினைக்கும் மனங்கள் திரும்பி வந்துசேர ஒரு வீடோ நிலமோ நிச்சயம் இருக்கும் எனும் நம்பிக்கை தான் மகிழ்ச்சியை தருமே தவிர, நிராதரவை விடப்பட்ட மனங்கள் என்றும் நாடோடி தன்மையை விரும்புவதே இல்லை.

நாடோடிகளாய் மாறிவிட நினைக்கும் மனிதர்களுக்கு தெரியும், அந்த வாழ்க்கை சிரமமென்றால், திரும்பவும் இயல்பு வாழ்க்கைக்கே வந்துவிடலாம் என்பது. ஆனால், நாடோடி குடும்பத்திலேயே பிறந்து, நாடோடியாகவே வளர்ந்து, பசிக்கு பயந்து, பலவித தொழில்கள் செய்து வாழ்க்கையை நகர்த்தும் பல இன குழுக்குள் வாழ்ந்து கொண்டுதான் இருக்கின்றன.

சர்க்கஸ் தொழில், குடுகுடுப்பைகாரர்கள், ஜோசியம் சொல்வது, ஊசி பாசி விற்பது, கம்பிமேல் நடப்பது, கத்திவீசும் வித்தை, இரவில் நடக்கும் கூத்து, பகல்வேச கலைஞர்கள் என எல்லா தொழில்களுமே வயிற்றுப் பசிக்கான நிர்பந்தத்தில் செய்யும் தொழில்கள் தான்.

கையை கீறி, கொளுத்தும் வெயிலில் தரையில் படுத்திருக்கும் சிறுவனின் மார்பில் ரத்தத்தை சிதறி விடுவதற்கு பெயரென்ன? கலையா? பள்ளி செல்லும் வயதுடைய சிறுமியை கம்பி மேல் நடக்கச்செய்யும் வித்தைக்கு பெயரென்ன? வீரமா? ஆழ்ந்து யோசிக்க தேவையில்லை. பசிதான் மானுடத்தின் பொது மொழி.

ராஜூமுருகனின் பயணம் மனிதர்களையும் மனித மனங்களையும் தேடுவதாகவே உணர்கிறேன். உலகின் ஒவ்வொரு நாடோடி மனிதனின் மனநிலையும் என் கண்முன்னால் விரிகிறது. இதுவரை நான் சிந்தித்தே பார்த்திராத மனிதர்களை அறிமுகப்படுத்தி, வாழ்க்கை பற்றிய புரிதலை இன்னுமொரு படி நகர்த்தியமைக்கு ராஜூமுருகனுக்கு நன்றிகள்.