Reviews for மொஸாட்: இஸ்ரேலிய உளவுத் துறை

சர்வதேச அரசியல் மற்றும் உளவுத்துறை சம்பவங்களில் ஆர்வம் உள்ளவர்களுக்கு சுவாரசியமான புத்தகம். ஆசிரியரின் அழகான விவரிப்பு இந்த நூலை மிகவும் ரசிக்கத்தக்கதாக ஆக்குகிறது. நல்ல வாசிப்பு அனுபவம்!

சொக்கன் என்ற கைதேர்ந்த எழுத்தாளரின் கைவண்ணம் இந்த நூலில் நன்கு மிளிர்கிறது. ஆனால் மொஸாட்டின் நிகழ்வுகளை சற்று குறைத்து, அதன் கட்டமைப்பை பற்றி இன்னும் சற்று விரிவாக விளக்கியிருக்கலாம்.

மொஸாட் பற்றி கேள்விப்பட ஆரம்பித்ததிலிருந்து அதன் நடவடிக்கைகள் மீது பயங்கர ஆர்வம் இருந்து வருகிறது. அதன் சில வெற்றிகரமான நடவடிக்கைகளின் தொகுப்பே இந்த புத்தகம். முன்னமே சில நடவடிக்கைகள் பற்றி கேள்விப்பட்டிருந்ததால் வாசிக்கும்போது மிகப்பெரிய ஆச்சரியம் இல்லை.

மொசாட் – இஸ்ரேலிய உளவுத்துறை பற்றிய வரலாற்று நூல். இஸ்ரேலுக்கு வெளியிலிருந்து வரும் ஆபத்துகளைத் தடுப்பதுதான் மொசாட்டின் முக்கிய பணி.

இவ்வுளவுத்துறை உருவான விதம், அதன் தலைவர்கள், வெற்றிகள், சொதப்பல்கள் என நிறைய தகவல்கள் உள்ளன. எந்த ஒரு திட்டத்தையும் செயல்படுத்துவதற்கு முன்பு நிறைய தகவல்களைத் திரட்டுகிறார்கள். அதற்குப் பின்புதான் செயல்.

பிளாக் செப்டம்பர் படுகொலைக்கான எதிர்த்தாக்குதல், ஐக்மென் சம்பவம், யூதப் படுகொலை, கப்பல் கடத்தல், விமானக் கடத்தல், இரகசியமாய் அணு உலை அமைத்தல், உளவாளிகளாய் செயல்பட்ட சாதாரண பொதுமக்கள் என நிறைய தகவல்கள் இப்புத்தகத்தில் உள்ளன.

மொழிநடை பற்றி சொல்லியே ஆகவேண்டும். புத்தகத்தில் இருப்பது தகவல்கள்தான். ஆனால் வாசிக்கையில் யாரோ ஒருவர் பக்கத்தில் உட்கார்ந்து கதை சொல்வது போலவே இருந்தது. த்ரில்லர் வகை கதையை வாசிப்பது போன்றே இருந்தது. அவ்வப்போது இது கதையல்ல நிஜம் என்று எனக்கு நானே சொல்லிக்கொண்டேன்.

புத்தகம் எவ்வளவு சுவாரசியமானதாக இருந்தாலும், நிதானமாக யோசிக்கையில் இதற்குப் பின்பு எவ்வளவு உயிர்ச் சேதங்கள் இருக்கின்றன என்ற கேள்வி ஒரு வித அச்சத்தைத் தருகிறது. அமைதிக்கான குரல் நிச்சயம் உலகம் முழுவதும் தொடர்ந்து ஒலிக்கும்.

திரைப்படங்களில் காட்டப்படும் உளவு வேலைகளைப் போல் உண்மையாகவே பல உளவு வேலைகளை செய்து சி.ஐ.ஏ கண்களில் கூட விரலைவிட்டு ஆட்டிய அமைப்புதான் இஸ்ரேலின் மொஸாட். பாலஸ்தீனத்தில் இருந்து இஸ்ரேல் என்ற நாடு உருவாகவே மொஸாட்தான் முக்கிய காரணமாக இருந்துள்ளது.

அதிகபட்ச அதிகாரத்தில் இருக்கும் மொஸாட்டை இஸ்ரேல் பிரதமரைத் தவிர வேறு எந்த ஊழியருக்கும் கேள்வி கேட்க உரிமை கிடையாது. இந்த உளவுத்துறைக்கே மனித உயிர்கள் மீது அவ்வளவு அக்கறை கிடையாது. ஒரு சின்ன நாட்டில் இவ்வளவு சக்தி வாய்ந்த உளவுத்துறை இருக்க முடியுமா என வியக்கவைத்த புத்தகம்.

இந்த புத்தகத்தின் அட்டையில் இஸ்ரேல் உளவுத்துறையின் "விறுவிறுப்பான" வரலாறு என ஒரு வரி குறிப்பிடப்பட்டிருக்கும். அதில் ஒரு சதவிகிதம் கூட பொய்யில்லை. ஒரு த்ரில்லர் நாவலுக்கு இணையாக எழுதப்பட்டிருக்கும் விறுவிறுப்பான அபுனைவு நூல்.

மருதன் அவர்கள் எழுதிய "ஹிட்லரின் வதைமுகாம்கள்" புத்தகம் இதை வாசிக்க காரணமாக இருந்தது. யூதர்கள் தங்களுக்கான நாட்டை எப்படி அமைத்தார்கள்? பாலஸ்தீனியர்களின் மீது ஏன் ஒடுக்குமுறைகளை செலுத்தினார்கள்? நாஜிகளை என்ன செய்தார்கள் என்றெல்லாம் தெரிந்து கொள்ள விரும்பினேன்.

இஸ்ரேல் - பாலஸ்தீன் பிரச்சனை, பிரிட்டிஷ் அரசாங்கம், இஸ்ரேலை வளர்த்தெடுத்த அமெரிக்கா போன்ற விஷயங்கள் அங்கங்கே பேசப்பட்டிருக்கின்றன. மொசாட்டின் பங்களிப்பு எத்தனை முக்கியமானது, அரேபிய நாடுகளை பகைவர்களாக வைத்துக்கொண்டு எப்படி சாமர்த்தியமாக எதிரிகளை சமாளிக்கிறார்கள் என்பதெல்லாம் ஜேம்ஸ் பாண்ட் பட பாணி வேகத்தில் சொல்லப்பட்டிருக்கின்றன.

முக்கியமாக ரஷ்யாவின் மிக்-21 ரக விமானத்தை ஈராக்கில் இருந்து சாமர்த்தியமாக கடத்தி வந்தது, நாஜி ஐக்மேனை அர்ஜென்டினாவிலிருந்து இஸ்ரேலுக்கு கடத்தி கொண்டு வந்தது போன்ற சம்பவங்கள் அதிரடி திருப்பங்கள் நிறைந்த சினிமாக்காட்சிகளை விஞ்சும்.

அபுனைவு நூல் என்றாலே வெறும் தகவல்கள் நிறைந்த பாடப் புத்தகம் போலில்லாமல், ஜனரஞ்சகமாக, சில இடங்களில் நகைச்சுவை ததும்ப எழுதப்பட்டிருக்கிறது.

வீடு மட்டுமல்ல நாடு புகுந்தும் ஆட்களை கடத்தியிருக்கிறார்கள். பின் தொடர்ந்து சென்று ரகசியமாக கண்காணித்திருக்கிறார்கள், தனிப்பட்ட உரையாடல்களை ஒட்டுக்கேட்டிருக்கிறார்கள், லஞ்சம் கொடுத்திருக்கிறார்கள், திருடியிருக்கிறார்கள், கணக்கற்ற முறை பொய் சொல்லியிருக்கிறார்கள், பெண்களை தூண்டிலாகப் பயன்படுத்தியிருக்கிறார்கள், ஏமாற்றியிருக்கிறார்கள், மோசடி செய்திருக்கிறார்கள். இவை அனைத்தும் அரசாங்கத்தின் பரிபூரண ஆசிர்வாதத்துடன் செய்திருக்கிறார்கள், இன்னமும் செய்து கொண்டிருக்கிறார்கள்.

இஸ்ரேலிய உளவுத்துறை மொசாட்டுக்கு நம் கற்பனைக்கும் எட்டாத அளவுக்கு வானளாவிய அதிகாரம் கொடுக்கப்பட்டிருக்கிறது. எதுவும் தவறில்லை, எதற்கும் விசாரணை இல்லை, தண்டனை இல்லை. எதற்காக இந்த அமைப்பு உருவாக்கப்பட்டது? அதன் நோக்கம் என்ன? அவர்கள் இதுவரை என்னென்ன செய்திருக்கிறார்கள்? எளிய பின்னணியில் இருந்து உலகமே வியக்கும் மாபெரும் நிறுவனமாக வளர்ந்தது எப்படி? ஒரு துப்பறியும் நாவலைக் காட்டிலும் பல மடங்கு சுவாரசியத்துடன் ஆசிரியர் விவரிக்கின்றார்.

பல வருடங்களாக கண்ணில் பட்ட புத்தகம், கடைசியில் வாசித்தாகிவிட்டது. மிகவும் விறுவிறுப்பான முறையில் எழுதப்பட்டிருக்கிறது.

ஜேம்ஸ் பாண்ட் கதை சொல்லும் பாணியில், மொஸாட் உளவு அமைப்பின் தொடக்கம் முதல் குறிப்பான சம்பவங்களை தேர்ந்தெடுத்து, சஸ்பென்ஸ் நிறைந்த காட்சிப்படுத்துதலுடனும், நகைச்சுவை சொற்றொடர்களுடனும் எழுதியிருக்கிறார் என். சொக்கன்.

இஸ்ரேலிய உளவு அமைப்பை இவ்வளவு சிலாகிப்பதற்கு பல காரணிகள் உள்ளன. ஆங்கிலேய ஆட்சிக்குப் பின்னர், ஹிட்லரின் வெறியாட்டத்தை கடந்து, தனக்கென்று ஒரு நாட்டை நிர்மாணித்து, இன்று வரையில் பல்வேறு தொழில்நுட்பங்களையும் ஆயுதங்களையும் பயன்படுத்தி ஜாக்கிரதையாக பாதுகாத்து வருகின்றனர். அதற்கு மூலக்காரணம் அவர்கள் கடந்து வந்த கொடும் பாதையும், இனப்பற்றை முன்னிறுத்தி புத்திகூர்மையை பயன்படுத்திய விதமும்தான்.

உளவுத்துறை தலைவர்கள், அவர்கள் எடுத்த முடிவுகள், விளைவுகள், பிற நாடுகளின் அரசியல் ஆழத்துக்குள் உளவாளிகளை இறக்கியது, ஆள்கடத்தல்கள், போர்விமானக் கடத்தல்கள் என சகல விதமான சம்பவங்கள் விவரிக்கப்பட்டிருக்கின்றன.

உளவு வேலை ஒரு போதை என்பது பல சம்பவங்கள் மூலம் விளக்கப்பட்டிருக்கிறது. எதிரி நாடுகள் மட்டுமின்றி நட்பு நாடு, சொந்த நாட்டு அரசியல் தலைவர்களையும் உளவு பார்க்க உளவாளிகளை நிறுத்தியிருக்கின்றனர்.

யூதர்களின் அடிநாதமான கொள்கை, எந்த ஒரு யூதனும் உலகில் எந்த மூலையிலும் கொல்லப்படக்கூடாது. தோல்வியுற்ற உளவாளிகளையும் எப்படியாவது மீட்டு, அவர்களது மீதி வாழ்க்கையை கழிக்க ஏற்பாடு செய்கின்றனர்.

ஒரு நாட்டின் வளர்ச்சிக்கும் பாதுகாப்புக்கும் உளவு அமைப்பு எந்த எல்லை வரை தியாகங்கள் புரிந்திருக்கும் என்பதற்கு மொசாட்டின் காகித சாட்சியாக இந்த புத்தகத்தைப் பார்க்கலாம்.

இஸ்ரேலிய உளவுத்துறையான மொசாட் மற்றும் அதன் நடவடிக்கைகள் பற்றிய மிகவும் ஈர்க்கும் புத்தகம். படிக்க ஆரம்பித்தால் கீழே வைக்க முடியாத அளவுக்கு சுவாரசியமாக எழுதப்பட்டுள்ளது.

தமிழ் கிரைம் நாவல்களுக்கே உரிய துறுதுறு வேகம், விக்கிப்பீடியாத்தனமான ஆனால் அலுக்கவைக்காத நடையில் தகவல்கள், எளிய உரைநடைத்தமிழ், திரைக்கதையை ஒத்த காட்சி விளக்கங்கள் என அனைத்தும் இணைந்த கலவையாய் அமைந்த நூல் இது.

குறைகள் என்று பெரிதாக எதுவும் இல்லை, சிற்சில எழுத்துப் பிழைகள் இரண்டொரு இடங்களில் தலைப்படுகின்றன. எடுத்தால் கீழே வைக்கத்தோன்றாத அளவுக்கு சுவாரசியமான நடையில் உள்ளதால் எளிதாகப் படித்து முடித்துவிடலாம். மொசாட் பற்றி மட்டுமே இல்லாமல், வேறு சில உளவு அமைப்புகளையும் பற்றி எழுதியிருக்கலாம். உளவுத்துறை, வேகமான கதைகள், உலக அரசியல் ஆகியவற்றில் ஆர்வம் இருந்தால் தயங்காமல் வாங்கிப் படிக்கவும்.