Reviews for மொஸாட்: இஸ்ரேலிய உளவுத் துறை

மொஸாட் - இஸ்ரேலின் உளவுத்துறை பற்றிய சுமார் 300 பக்கங்கள் கொண்ட புத்தகம். உளவுத்துறை பற்றிய தகவல்களை இவ்வளவு சுவாரசியமாக எழுத முடியுமா என்ற சந்தேகம் இருந்தது. ஆனால் மிகவும் விறுவிறுப்பாக பக்கங்கள் கிடுகிடுவென நகர்கின்றன.

முக்கியமாக மிக்-21 விமானம், இஸ்ரேல்-எகிப்திய போரில் மொசாட்டின் சித்துவேலைகள், பிரான்சிலிருந்து கப்பல்களை மீட்டெடுத்தல், அடால்ப் ஐக்மேன் போன்ற அத்தியாயங்கள் சிறப்பாக இருக்கின்றன. மயிர்கூச்செரியும் சம்பவங்கள். இரண்டு மணி நேரத்தில் ஒட்டுமொத்த புத்தகத்தையும் படித்து முடித்துவிடலாம்.

ஒலிம்பிக் விளையாட்டில் பங்கேற்கும் தங்கள் நாட்டு வீரர்கள் துப்பாக்கி முனையில் சிறைபட்டு கொலை செய்யப்படுகிறார்கள். இஸ்ரேல் நாடே கண்ணீர் வடிக்கிறது. அதிகாரம் உளவுத்துறையை அழைக்கிறது. உளவுத்துறை சந்தேகநபர்களின் பட்டியலை கொடுக்கிறது. அதிகாரம் முக்கிய பெயர்களை வட்டமிட்டு வேட்டையாட உத்தரவிடுகிறது.

நாடு விட்டு நாடு போய் வேட்டையாடிட்டு வந்ததால் மொசாட் புகழ் உலகம் முழுவதும் பரவியது. மிக்-21 போர் விமானத்தை எகிப்தில் இருந்து கடத்தியது, யுரேனியத்தை தந்திரமாக வாங்கியது, ஐக்மேனை அர்ஜென்டினாவிலிருந்து கடத்தி கொண்டு வந்து நீதிமன்றத்தில் நிறுத்தியது, போர்க் கப்பலை வேறு நாட்டிலிருந்து கடத்தியது, ஆறு நாள் போரில் அசுர வெற்றி — இவற்றை எளிய எழுத்து நடையில் விவரிக்கிறார் சொக்கன்.

புனைவை விட சுவாரசியமாக இருக்கும் உண்மை நிகழ்வுகளின் தொகுப்பு. படிக்க ஆரம்பித்தால் நிறுத்த முடியாது.

தனித்துவமான மற்றும் சுவாரசியமான நூல்! ஆனால் இன்னும் ஆழமாகவும் விரிவாகவும் எழுதியிருக்கலாம். ஆசிரியர் அருமையான வேலை செய்திருக்கிறார்.

ஒரு த்ரில்லர் நாவலைப் படிப்பது போல் இருந்தது. சொக்கனின் புத்தகங்கள் எப்போதும் எனக்கு மிகவும் பிடிக்கும். அவரது நடை, நகைச்சுவைத் துணுக்குகள் எப்போதும் புதுமையாக இருக்கும். இஸ்ரேல் பற்றிய ஆழமான பார்வையும் உத்வேகமூட்டும் கதையும் கொண்ட சிறந்த நூல்.

மிகவும் அருமையான புத்தகம். இந்த நூலை எழுதிய ஆசிரியருக்கு நன்றி!

மொசாட்டின் உலகப் புகழ்பெற்ற சாதனைகளை தமிழில் அறிமுகப்படுத்தும் நூல். ஆசிரியர் உண்மையான தேதிகளையும் தகவல்களையும் எளிமையான முறையில் தொகுத்துள்ளார். ஆனால் ஒவ்வொரு சாதனையையும் மிக ஆழமாக விவரிக்கவில்லை. மொசாட் பற்றிய அடிப்படை அறிமுகத்துக்கு இந்த நூல் நல்ல தொடக்கம்.

உண்மை நிகழ்வுகள் புனைவுகளை மிஞ்சும்படி எப்படி இருந்திருக்கின்றன என்பதையும், ஒரு உளவு அமைப்பு எல்லைகளற்று எப்படி செயல்பட்டிருக்கிறது என்பதையும் ஒரு நாவல் போன்ற நடையில் சுவைபட சொல்லியிருக்கிறார் ஆசிரியர் சொக்கன்.

இரண்டாம் உலகப் போர், இஸ்ரேல்-பாலஸ்தீன வரலாறு, நாசர், அராபத், சதாம் உசைன் போன்ற ஆளுமைகள், அமெரிக்காவுக்கும் மொசாட்டுக்கும் இடையான தொடர்பு, மொசாட் நிகழ்த்திய திட்டமிட்ட கொலைகள் பற்றியும் விவரிக்கும் இந்நூல் வரலாற்றை அறிய விரும்புவோருக்கு ஒரு விருந்தாய் அமைந்துள்ளது.

உளவுத்துறை பற்றி தெரிந்துகொள்ள வேண்டும் என்ற ஆர்வத்தினால் உலகின் முன்னணி உளவுத்துறையான மொஸாட்டை பற்றி சொக்கன் எழுதிய இந்நூலை வாசித்தேன்.

அமெரிக்காவின் சி.ஐ.ஏ கண்ணிலேயே விரலை விட்டு ஆட்டக்கூடிய உளவுத்துறை உண்டென்றால் அது இஸ்ரேலின் மொஸாட்தான். பல நூற்றாண்டுகளாக வாழ்வதற்கே சிரமப்பட்ட யூத இனம் 20ஆம் நூற்றாண்டின் பிற்பகுதியில் தங்களுக்கென ஒரு நாட்டை அமைத்துக் கொண்டார்கள்.

இஸ்ரேலின் பாதுகாப்பிற்கு மொசாட்டின் பங்கு என்ன, சுற்றிலும் அரேபியர்களை பகைவர்களாக வைத்துக்கொண்டு எவ்வாறு எதிரிகளை சமாளிக்கிறது என்பதெல்லாம் ஜேம்ஸ் பாண்ட் பாணியில் த்ரில்லராக சொல்லப்பட்டுள்ளது.

ஒரு சிறிய நாட்டில் இவ்வளவு சக்திவாய்ந்த உளவுத்துறை இருக்க முடியுமா என்று பிரமிப்பில் ஆழ்த்தும் புத்தகம். மொசாட்டை கதாநாயகனாக வைத்து எழுதியுள்ளார் சொக்கன்.

மொசாட் பற்றிய சுவாரசியமான விவரிப்பு. ஆசிரியரின் நடை, மொசாட்டின் நடவடிக்கைகள், அவர்களின் உத்திகள், தற்காப்பில் உளவுத்துறையின் முக்கியத்துவம் ஆகியவை மிகவும் பிடித்திருந்தன.

த்ரில்லர் வகை புத்தகங்களில் ஆர்வமுள்ளவர்களுக்கும், தமிழில் மொசாட் பற்றி அறிய விரும்புவோருக்கும் ஏற்ற நூல்.