Reviews for தூண்டில் கதைகள்

வரலாற்றுக் காதல், திகில், சாகசம், அறிவியல் புனைவு, நீதிமன்றக் கதை எனப் பல வகைகளில் அமைந்த அருமையான சிறுகதைத் தொகுப்பு. முடிவில் வரும் சுஜாதாவுக்கே உரிய திருப்பங்கள் கதைகளுக்குச் சிறப்புச் சேர்க்கின்றன.

இந்தக் கதைகளின் பெருமை வெறும் வாசிப்புச் சுவையில் இல்லை; கடந்த கால உலகை இன்றைய தலைமுறைக்கும் வரப்போகும் தலைமுறைகளுக்கும் அறிமுகப்படுத்துவதில் இருக்கிறது. எல்.ஐ.சி. அலுவலகச் சூழல் கண்முன் நிற்கிறது. சோழர்களைப் பற்றிய நையாண்டியோ, கல்கியை வாசிக்கையில் தோன்றாத கோணத்தை யோசிக்க வைக்கிறது. அந்தந்தத் துறைக்குரிய சொற்களோடு சொல்லப்படும் கதைகள், அவை நிகழும் இடத்துக்கே அழைத்துச் செல்கின்றன.

இது இலக்கியமா என்ற கேள்வியோடு அணுக வேண்டாம் என்று முன்னுரையிலேயே சொல்லிவிடுகிறார் சுஜாதா. அந்த எதிர்பார்ப்பின்றிப் படித்தால் கதைகள் சுவாரசியமாக இருக்கின்றன. 1980களில் எழுதப்பட்டவை என்றாலும், நடையின் புதுமையும் எழுத்தின் துள்ளலும் இன்றும் வியக்க வைக்கின்றன.