Reviews for சாமிகளின் பிறப்பும் இறப்பும்

மக்களோடு வாழ்ந்தவர்கள் தெய்வங்களாக மாறிய பின்னணியையும் பலவகை வழிபாடுகளையும் அழகாக விளக்குகிறது இந்நூல். சாதிப் பாகுபாடு, ஒடுக்குமுறைக்கு எதிர்ப்பு, குற்றவுணர்வு, அன்பு ஆகியவை மக்கள் தெய்வ வழிபாட்டில் பெறும் இடத்தை எடுத்துரைக்கிறது. மதங்களைக் கடக்கும் வழிபாடுகளையும் அறிமுகப்படுத்தி, கடவுளின் இருப்பு குறித்துத் தனக்கான நிலைப்பாட்டை வாசகரே சிந்தித்து முடிவெடுக்க இடமளிக்கிறது.

தமிழக நாட்டார் தெய்வங்களைப் பற்றி எளிதாகவும் விரைவாகவும் வாசிக்கக்கூடிய நூல். கடவுள் வழிபாட்டின் பின்னுள்ள குற்றவுணர்வை மையக் கருத்தாக முன்வைக்கிறது.

சிறுதெய்வங்களின் கதைகளைக் கொண்டு பகுத்தறிவுக் கருத்துகளை முன்வைக்கும் நூல். இதில் வரும் கதைகள் ஏற்கெனவே எங்கோ கேட்டவைபோல் தோன்றலாம். அவற்றைப் பகுத்தறிவுடன் அணுகும்போது, இறுதியில் ஆசிரியர் கூறும் கருத்துகளை இன்னும் ஆழமாகப் புரிந்துகொள்ள முடிகிறது. சிறுவர்களுக்கு அவசியம் பரிந்துரைக்க வேண்டிய புத்தகம்.

பள்ளிக் குழந்தைகளுக்கும் புரியும் எளிய விளக்கங்களும் சிறந்த எடுத்துக்காட்டுகளும் இந்நூலின் பலம். பெருந்தெய்வங்களுக்கும் நாட்டுப்புறத் தெய்வங்களுக்கும் உள்ள வேறுபாடு, கொடூரமாக அல்லது துயருற்று இறந்த மனிதர்கள் தெய்வமாக்கப்படுவது, நாட்டுப்புறத் தெய்வ வழிபாட்டில் நிகழும் சமஸ்கிருதமயமாக்கல் ஆகியவற்றைச் சிறுவர்களுக்கு அறிமுகப்படுத்துவதில் ச. தமிழ்ச்செல்வன் சிறப்பாகச் செயல்பட்டுள்ளார்.

தென்னிந்திய நாட்டுப்புறத் தெய்வங்களின் தோற்றக் கதைகளை எளிமையாகவும் தாக்கத்துடனும் அறிமுகப்படுத்தும் நூல். அவற்றின் சமூக, அரசியல், பொருளாதாரத் தாக்கங்களோடு நிறுவனமயமான மதங்களின் ஆதிக்கத்தையும் எடுத்துரைக்கிறது. மதங்கள் சமூகத்தில் ஏற்படுத்தும் விளைவுகளை அறிய விரும்புவோர் படிக்கத் தகுந்தது.

எளிய மக்கள் வழிபடும் தெய்வங்களுக்குப் பின்னுள்ள மனிதர்களையும் அவர்களின் துயரங்களையும் பேசுகிறது இந்நூல். குற்றவுணர்வு, ஆற்றாமை, தியாகத்தை நினைவுகூர்தல் ஆகியவை வழிபாட்டுடன் கொண்டுள்ள தொடர்பை விளக்குகிறது. சீலைக்காரி அம்மன், முத்தாலம்மன் கதைகளில் காவியத்துக்கு இணையான துயரம் உள்ளது. மத எல்லைகளைக் கடக்கும் வழிபாடுகள், கிறித்துவத்தில் தீண்டாமை, தர்க்காக்களின் பின்னணி போன்ற கேள்விகளுக்கும் விடை தருகிறது.

கடவுளும் மதமும் மனிதர்களால் உருவாக்கப்பட்ட வரலாற்றைத் துணிவுடன் விமர்சிக்கும் கட்டுரைகள். குழந்தைகளும் வாசிக்க ஏற்ற எளிய நடை சிறப்பு. ஏழை, பணக்காரக் கடவுள்களின் வேறுபாடுகளையும் சாதிய ஒடுக்குமுறையால் உருவான தெய்வக் கதைகளையும் அறிமுகப்படுத்துகிறது. சில கதைகள் தொ.பா., ஆ. சிவசுப்பிரமணியன் நூல்களில் உள்ளவற்றை நினைவூட்டுகின்றன. குழந்தைகளோடு பெரியவர்களும் வாசிக்க வேண்டிய சிறுநூல்.

நாட்டார் தெய்வங்களின் தோற்றம், வழிபாடு, பெருந்தெய்வங்களிலிருந்து அவை வேறுபடும் விதம், பின்னர் அவற்றால் உள்வாங்கப்பட்ட விதம் ஆகியவற்றை அடிப்படையிலிருந்து அறிமுகப்படுத்துகிறது. கிறிஸ்தவ, இஸ்லாமியச் சமூகங்களிலும் உள்ள இத்தகைய வழிபாடுகளை அறிய முடிகிறது. குழந்தைகளுக்காக எழுதப்பட்டிருந்தாலும், பெரியவர்கள் அதிகம் வாசிக்க வேண்டிய புத்தகம்.

கடவுளும் மதமும் மனிதர்களால் உருவாக்கப்பட்டவை என்ற பார்வையில் நாட்டார் தெய்வங்களின் கதைகள் பேசப்படுகின்றன. வாழ்ந்து இறந்த எளிய மனிதர்கள் தியாகத்தாலும் துயர மரணங்களாலும் தெய்வங்களாக நினைவுகூரப்படுவதாகச் சொல்லப்படுகிறது. செல்வம் மிக்க பெருந்தெய்வ வழிபாட்டையும் மேல்சாதியினரின் விலக்கத்தையும் விமர்சிக்கும் இந்தப் பார்வையில், ஏழை மக்களின் கிராமத் தெய்வங்களே உயர்வாகத் தெரிகின்றன.

குழந்தைகளுக்கான புத்தகம் போல இருக்கிறது.