Reviews for ரயில் புன்னகை

அன்றாட வாழ்க்கையில் நிகழும் கசப்பான உண்மைகளை ஒவ்வொரு கதையும் வெளிப்படுத்துகிறது. எல்லாக் கதைகளின் முடிவுகளும் தாக்கத்தை ஏற்படுத்துகின்றன. சிறப்பாக எழுதப்பட்டுள்ள இந்தத் தொகுப்பு, தமிழ்ப் புத்தகங்களைப் புதிதாக வாசிக்கத் தொடங்குபவர்களுக்கும் நிறைவளிக்கும்.

ரயில் புன்னகை வருத்தத்தைத் தர, குதிரை வாய்விட்டுச் சிரிக்க வைக்கிறது. அரை வைத்தியன் தன்னைப் பற்றிய எண்ணத்தை மறுபரிசீலனை செய்ய வைக்கிறது; முழு வைத்தியன் பிழைப்பைப் பேசுகிறது. எல்லாம் இருந்தும் நிலவும் நம்பிக்கையின்மையையும் இயலாமையையும் சேவகி காட்டுகிறது. பேட்டி, விலங்குகளிடம் அன்பும் மனிதர்களிடம் கொடுமையும் ஒருவரிடமே இருக்கக்கூடுமென்று நினைக்க வைக்கிறது. ஆண்மையை அம்பலப்படுத்தும் ஜானகி சாகவில்லை வியக்க வைக்கும் திகில் கதை.

பரபரப்பு, நகைச்சுவை, சிந்தனை எனப் பலவகையான வாசிப்பை ஒரே தொகுப்பில் தரும் சிறுகதைகள். இயலாமை, கொடுமை, ஆண்மை போன்றவற்றையும் பேசுகின்றன. எண்பதுகளில் எழுதப்பட்டிருந்தாலும் இன்றைய வாழ்க்கையோடு பொருந்துகின்றன. சிறிய அளவில் நிறைவான வாசிப்பைத் தரும் இந்தத் தொகுப்பு, வாசிப்பில் தேக்கம் ஏற்பட்டிருப்பவர்களுக்கு நல்ல தேர்வு.

நகைச்சுவை, சோகம், மர்மம், குற்றம் எனப் பல தளங்களில் விரியும் எட்டு சிறுகதைகள். எண்பதுகளில் சுஜாதா எழுதிய இக்கதைகள் ஒவ்வொன்றும் கவனம் சிதறாமல் வாசிக்க வைக்கின்றன. ஒன்றை மட்டும் சிறந்ததாகத் தேர்ந்தெடுக்க முடியாத அளவுக்கு எல்லாமே சிறப்பாக உள்ளன. ஆனால் பொருத்தமற்ற அட்டைப்படத்தால் வாசகரைக் கவரக் கிழக்கு பதிப்பகம் செய்த முயற்சி தேவையற்றது.