Reviews for ஊழல் - உளவு - அரசியல்

பதினாறு வயதில் லஞ்ச ஒழிப்புத்துறையில் எழுத்தராகச் சேர்ந்த சங்கர், அரசியலுக்கும் நிர்வாகத்துக்கும் உள்ள தொடர்புகளை அறிந்துகொண்ட விதம் இந்நூலில் விரிகிறது. தவறுகளைத் திருத்த முயன்றதும், பின்னர் வழக்கில் சிக்கி அரசு அமைப்பை எதிர்கொண்டதும் பதிவாகின்றன. வாதங்களைத் தெளிவாக முன்வைக்கும் எழுத்து பாராட்டத்தக்கது. கடுமையான அனுபவங்களைப் பேசினாலும் நகைச்சுவைக்கும் இடமுண்டு; எங்கும் சலிப்பு ஏற்படவில்லை.

தொலைபேசி ஒட்டுக்கேட்பு வழக்கில் சிக்கிய சங்கர், அரசு இயந்திரத்தை எதிர்கொண்டு நடத்திய போராட்டத்தை இந்நூல் விவரிக்கிறது. ஊழலும் அரசியல் தலையீடுகளும் நிறைந்ததாக அவர் காட்டும் நிர்வாகத்தின் செயல்பாடுகளையும், தொண்ணூறுகளுக்குப் பிந்தைய தமிழக அரசியலையும் அறிந்துகொள்ள முடிகிறது. எளிய மொழிநடை இந்த அனுபவப் பதிவை விறுவிறுப்பாக நகர்த்துகிறது.

சங்கரின் அரசுப்பணி அனுபவங்களும் அவர் எதிர்கொண்ட சிக்கல்களும் தனிப்பட்ட கதையாக மட்டும் நின்றுவிடவில்லை; தமிழகத்தின் இருபத்தைந்து ஆண்டுகால அரசியல், அதிகாரச் செயல்பாடுகளையும் அறிமுகப்படுத்துகின்றன. விறுவிறுப்பான வாசிப்பைத் தாண்டி, இங்குள்ள ஆட்சி அமைப்பு எவ்வாறு இயங்குகிறது என்பதைப் புரிந்துகொள்ள உதவும் முக்கியமான பதிவு இது. அதிகாரத்தின் தவறுகளுடன் சமரசம் செய்யாமல் கேள்வி எழுப்பும் ஆசிரியரின் நிலைப்பாடு பாராட்டுக்குரியது.

அதிகாரத்தை எதிர்த்த ஒரு சாமானியனின் அனுபவங்களைப் புனைவு அலங்காரமின்றி, வாசகருடன் பேசுவதுபோல் சொல்கிறார் சங்கர். அரசுப்பணி, ஊழலுக்கு எதிரான முயற்சிகள், சிறைவாசம், நீதிமன்றப் போராட்டம் என விரியும் பதிவில் சலிப்பில்லை. சிறை நிர்வாக முறைகேடுகளும் விசாரணைக் கைதிகளின் அவலமும் கவனம் பெறுகின்றன. விறுவிறுப்போடு சிந்திக்கவும் வைக்கும் இந்த ஆவணம், சமூக அக்கறையால் இன்னல்களை எதிர்கொள்பவர்களுக்குத் துணை நிற்க வேண்டியதையும் உணர்த்துகிறது.

காவல்துறை உயரதிகாரிகள், நீதிபதிகள் உள்ளிட்ட அதிகார மையங்களை ஓர் அரசுத் துறை எழுத்தர் எதிர்கொண்ட அனுபவம் சிறப்பாகப் பதிவாகியுள்ளது. முதல் நூறு பக்கங்கள் குறிப்பாகக் கவனிக்கத்தக்கவை; ஜெயலலிதாவின் சொத்துக்குவிப்பு வழக்கு நீண்டதற்குக் கருணாநிதியின் அணுகுமுறையும் எப்படிக் காரணமானது என்பதை நூல் விவரிக்கிறது. அரசாங்கம் செயல்படும் விதத்தைப் பாடநூல்களுக்கு அப்பால் அறிந்துகொள்ள இதுபோன்ற நூல்களைப் படிக்க வேண்டும்.