Reviews for நட்சத்திரவாசிகள்

ஐ.டி. துறையில் பணிபுரியும் ஒருவருக்கு இந்த நாவலின் வாசிப்பு மனப்பாரத்தை அதிகரிக்கிறது.

ஐ.டி. வேலை என்றாலே அதிகச் சம்பளமும் மகிழ்ச்சியான வாழ்க்கையும் என்ற பொதுப்பார்வையை இந்த நாவல் கேள்விக்குள்ளாக்குகிறது. பாதுகாவலர் ராமசுப்புவிலிருந்து மென்பொருள் ஊழியர்கள் வரை அந்தச் சூழலைச் சார்ந்த பலரின் வாழ்க்கைக்கும் இடமளிக்கிறது. வெளிநாட்டு வாய்ப்புக்கான காத்திருப்பு, அலுவலக அரசியல், இரவுப்பணியின் உடல் மற்றும் மனச்சுமை ஆகியவற்றைச் செயற்கையின்றிப் பதிவு செய்திருப்பது சிறப்பு. இத்துறையின் வாழ்வியலைப் பேசும் முக்கியமான படைப்பு.

நடுத்தரக் குடும்பங்களின் வாழ்க்கைத் தரத்தை உயர்த்திய ஐ.டி. துறையின் இன்னொரு பக்கத்தை விரிவாகப் பதிவு செய்கிறது நாவல். அலுவலக அரசியல், உழைப்புச் சுரண்டல், குடும்ப உறவுகளில் ஏற்படும் சிக்கல்கள் ஆகியவை இதில் இடம் பெறுகின்றன. அந்தத் துறையில் பணிபுரிவோருக்குத் தங்கள் அலுவலக அனுபவங்களை நினைவூட்டும் அளவுக்கு நிகழ்வுகள் நெருக்கமாக அமைந்துள்ளன.