Reviews for மறக்கவே நினைக்கிறேன்

ஒருவரது வாழ்க்கையில் இத்தனை அனுபவங்களா என்று வியக்க வைக்கிறது. சில இடங்களில் சிரிப்பும், சில இடங்களில் கோபமும் கண்ணீரும் வருகின்றன. மாரி செல்வராஜ் நெருக்கமாகப் பேசுவதுபோன்ற உணர்வைத் தரும் நூல்.

கிராமத்து வாழ்க்கையின் அழகோடு குறும்புச் சிறுவன், விடலைப் பருவம், இளமைக் காதல், முதிர்ச்சி எனப் பல நிலைகளை அறிமுகப்படுத்துகிறது. மனதின் உணர்வுகளையும் வாழ்க்கையின் திருப்பங்களையும் சேர்த்துச் சொல்லும் இனிமையான பயணம்.

மாரி செல்வராஜின் வாழ்க்கையில் நடந்த சம்பவங்கள் உணர்ச்சிப்பூர்வமாகப் பதிவாகியுள்ளன. அத்தியாயங்கள் ஒவ்வொன்றும் கண்கலங்க வைக்கின்றன; அந்த அனுபவங்களைக் கடந்து வந்தவருக்கு ஆறுதல் சொல்லத் தோன்றுகிறது. அவசியம் வாசிக்க வேண்டிய நூல்.

தனித்துவமான எழுத்துநடை; பரியேறும் பெருமாளின் கதையோடு தொடர்புடைய பகுதிகளும் ஆங்காங்கே தென்படுகின்றன. சில பாத்திரங்கள் எதிர்பார்த்தபடியே அமைந்தாலும், சில சூழல்கள் புதிய அனுபவத்தைத் தருகின்றன. தத்தம் கிராமத்தைக் கொண்டு காட்சிகளைக் கற்பனை செய்ய முடிவது சிறப்பு. வாசிக்கத் தகுந்த நூல்.

மாரி செல்வராஜின் வாழ்க்கை அனுபவங்கள் சாதியும் மதமும் மனிதத்துக்கு எதிராகச் செயல்படுவதை உணர்த்துகின்றன. சாதியை ஒழிக்க வலியுறுத்தும்போது மதத்தின் பெயரிலான அநீதிகளுக்கும் விதிவிலக்கு தரக்கூடாது; இரண்டையும் ஒழிக்க வேண்டும் என்ற எண்ணத்தை வலுப்படுத்தும் அருமையான நூல்.

தன் வாழ்க்கையில் சந்தித்த எளிய மனிதர்களை நெருக்கமாக அறிமுகப்படுத்துகிறார் மாரி செல்வராஜ். இனிய நினைவுகளோடு வலிகளையும் சமூகத்தின் நிலையையும் ஒளிவுமறைவின்றிப் பதிவு செய்கிறார். அந்த மனிதர்களை உணரச் செய்யும் எழுத்து வாசிப்பில் ஈர்ப்பை ஏற்படுத்துகிறது.

பழைய நினைவுகளை மீண்டும் நினைத்துப் பார்க்கும் மகிழ்ச்சியைத் தரும் நூல். மாரி செல்வராஜின் உலகத்துக்குள் வாசிப்பவரையும் அழைத்துச் செல்கிறது.

பல சிறப்பான வாழ்வனுபவங்களை இயல்பான நடையில் சொல்லும் அருமையான நூல். ஆசிரியர் மேலும் பல நூல்களை எழுத வேண்டும் என்ற எதிர்பார்ப்பை ஏற்படுத்துகிறது.

வறுமையிலும் நிறைவோடு வாழ்ந்த அனுபவங்களைச் சொல்கிறது இந்தத் தொகுப்பு. கட்டுரைகள் அயர்ச்சி தருமோ என்ற எண்ணம் வருவதற்குள் முடிந்துவிடுகிறது. சென்னை அனுபவங்கள் குறைவு; பெரும்பாலும் திருநெல்வேலி, தூத்துக்குடி, கன்னியாகுமரி, கோயம்புத்தூர் சார்ந்தவை. சில இடங்கள் அ. முத்துலிங்கத்தை நினைவூட்டுகின்றன. மாரி இன்னும் எழுதவும் இயக்கவும் பேசவும் வேண்டும் என்ற விருப்பம் எழுகிறது.

என்றும் விருப்பத்துக்குரிய நூல்.