Reviews for மரபும் புதுமையும்

தொ. பரமசிவனின் சிந்தனைகளைத் தொகுக்கும் கட்டுரைகள். இராசராச சோழனின் ஏகாதிபத்தியத்தைப் பற்றிய பார்வை புதிதாக இருக்கிறது; தெய்வங்களின் உணவுரிமை குறித்த கட்டுரையும் வேறுபட்ட சிந்தனையை முன்வைக்கிறது.

சாதித் தீண்டாமை, வகுப்புவாதத்தின் உருவாக்கம், நவீன வாழ்க்கையை வடிவமைத்த உள்நாட்டு மற்றும் உலக அரசியல் ஆகியவற்றை விரிவாகப் பேசும் நூல். நல்ல மரபுகளைக் கைவிட்டிருப்பதையும் சுட்டிக்காட்டுகிறது. அதிகம் அறியப்படாத செய்திகளைத் துணிச்சலுடன் முன்வைப்பதோடு, விழிப்புணர்வுடன் வாழ்வதற்கான சிந்தனைகளையும் ஆழமாக எடுத்துரைக்கிறது. தவறவிடக் கூடாத நல்ல வாசிப்பு.

எளிய மொழிநடையில் அடர்த்தியான தரவுகளைத் தரும் தொ.ப.வின் எழுத்து வியக்க வைக்கிறது. இலையில் செய்த பீப்பியைக் கொண்டு உலகமயமாக்கலை விளக்கும் விதம் அவரது ஆழமான புரிதலைக் காட்டுகிறது. உணவு, தெய்வம், சாதி, உலகமயமாக்கல், பொருளாதாரம் எனப் பல தளங்களைத் தொண்ணூறு பக்கங்களில் அறிமுகப்படுத்தியிருப்பது பிரமிப்பூட்டுகிறது.

மரபு, புதுமை, அவற்றின் மீது ஏகாதிபத்தியம் செலுத்தும் தாக்கம் ஆகியவற்றை விளக்கும் சிறந்த கட்டுரைத் தொகுப்பு. சிறுவீட்டுப் பொங்கல் பற்றிய செய்திகளும், இலக்கியச் சுவடிகளை மீட்டுப் பதிப்பித்த உ.வே.சா.வின் உழைப்பும் கவனம் ஈர்க்கின்றன. சமண, பௌத்தத் துறவற மரபுகளை வைதிகம் தனதாக்கிக்கொண்டதாக விவாதிக்கும் கட்டுரை முக்கியமானது. ராஜராஜனின் ஆட்சியை ஏகாதிபத்தியக் கண்ணோட்டத்தில் ஆராயும் பகுதியும் இடம்பெறுகிறது.

தொ.ப.வின் பிற தொகுப்புகளிலிருந்து மேம்படுத்தப்பட்ட பன்னிரண்டு கட்டுரைகள் இந்நூலில் உள்ளன. தமிழ்ப்புத்தாண்டு, பெண் தெய்வ வழிபாடு, வைதிகம் பற்றிய தகவல்கள் மீண்டும் வருவது தொடர்வாசிப்பில் தெரிகிறது. இருந்தாலும் உ.வே.சா., ராஜராஜன், உணவு, உலகமயமாக்கல் பற்றிய பகுதிகள் புதிய தகவல்களைத் தருகின்றன. அன்றாடப் பழக்கங்கள் எவ்வாறு மாறுகின்றன என்று சிந்திக்கவும், சிறுதெய்வ வழிபாட்டையும் பண்பாட்டு வேர்களையும் புரிந்துகொள்ளவும் உதவும் தொகுப்பு.

புதுமையின் வருகையால் மறையும் மரபுகளையும் மாறும் பண்பாட்டுப் பழக்கங்களையும் தொ.ப. ஆராய்கிறார். உணவு பரிமாறும் முறைகள், வழக்கொழிந்த உணவுகள், வழிபாட்டு உரிமைகள் ஆகியவற்றின் வழியாக இழந்துவரும் வாழ்வியலை மீண்டும் பார்க்க வைக்கிறது நூல். சாதி ஆதிக்கமும் திணிக்கப்பட்ட கருத்துகளும் அன்றாட வாழ்வில் ஏற்படுத்தும் மாற்றங்களை விவாதிப்பது, மரபைப் பற்றிய மீள்பார்வைக்கு உதவுகிறது.

ஆதிக்க அரசியலின் மறுபக்கத்தையும் அதன் தாக்கங்களையும் இடதுசாரிப் பார்வையில் வெளிப்படுத்துகின்றன தொ.ப.வின் கட்டுரைகள்.

தொ.பரமசிவனின் படைப்புகளுக்குள் நுழைய ஏற்ற சிறிய நூல் இது. சுவாரஸ்யத்திற்காகத் தகவல்களை நீர்த்துப்போகச் செய்யாமல், கள ஆய்வில் கண்டவற்றை நேர்மையாகப் பகிர்கிறார். மரபைப் பற்றிய அலட்சியமான பார்வையை மறுபரிசீலனை செய்ய வைக்கிறது. சோழர் காலச் சமூகத்திலிருந்து வேளாண்மை, உலக வர்த்தகம் வரை பேசும் கட்டுரைகளில் மண்ணையும் மக்களையும் பேணும் அக்கறையும், அவற்றின் பின்னுள்ள ஆய்வு உழைப்பும் தெரிகின்றன.

தொன்மத்தையும் வரலாற்றையும் பிரித்தறியத் தொ.ப.வின் நூல்கள் உதவுகின்றன. கட்டுரைகள் துல்லியமாகவும் தரவுகளை அடிப்படையாகக் கொண்டும் அமைந்துள்ளன.

தமிழகம், இந்தியா சார்ந்த மானுடவியலை வாசிப்பவர்களுக்கு அவசியமான நூல். ஒவ்வொரு கட்டுரையும் எளிமையோடு ஆழமான புரிதலையும் அரசியல் பார்வையையும் தருகிறது.