தமிழக வரலாற்றில் என்ன நடந்தது, எப்படி நடந்தது என்பதைப் புரிந்துகொள்ளப் பொ. வேல்சாமியின் எழுத்துகளை வாசிக்க வேண்டும். பல ஆண்டுகளாக அவர் மேற்கொண்ட தேடலும் கற்றலும் உழைப்பும் இந்தக் கட்டுரைகளில் வெளிப்படுகின்றன.

ஏராளமான மேற்கோள்களுடன் வரலாற்றை ஆராயும் இந்த நூல் பல கேள்விகளை எழுப்பிப் பார்வையையும் மாற்றுகிறது. அரசர்களைப் பற்றிய பெருமிதக் கதைகளுக்கு அப்பால், பெரும் செலவில் கட்டப்பட்ட கோவில்கள், பிராமணர்களுக்கு வழங்கப்பட்ட நிலக்கொடைகள், அவற்றிலிருந்த ஏற்றத்தாழ்வுகள் ஆகியவற்றைக் கவனப்படுத்துகிறது. கோவில்களின் நிர்வாக அதிகாரம் அரசர்களுக்கே சவாலாக வளர்ந்ததாக நூல் முன்வைக்கும் விளக்கம் குறிப்பிடத்தக்கது.

பிராமணர்களும் பிற ஆதிக்கச் சாதியினரும் ஒருவரது அதிகாரத்தை மற்றவர் நியாயப்படுத்தி வலுப்படுத்திய விதத்தையும் அதன் தொடர்ச்சியையும் தெளிவாக விளக்கும் சிறந்த நூல். குறிப்பாக மருதநிலச் சமூகத்தில் அரசியல் தோன்றிய பின்னணியையும், ஒரு குழு ஆளும் தகுதியைப் பெற்றதாக ஏற்கப்படுவது எப்படி என்பதையும் பேசுகிறது. அதிகாரத்தின் அடிப்படைகளைப் புரிந்துகொள்ளப் படிக்க வேண்டிய நூல்.

அரசர்களின் வெற்றிகளை மட்டும் கொண்டாடாமல், அக்காலத்து மக்களின் வாழ்க்கையை வைத்தே வரலாற்றை மதிப்பிட வேண்டும் என்பதை வலியுறுத்தும் நூல். கோவில், நிலவுடைமை, சாதி அதிகாரம் ஆகியவற்றின் தொடர்புகளைக் கல்வெட்டுகள், இலக்கியங்கள் வழியாகப் பொ. வேல்சாமி ஆராய்கிறார். சோழர் ஆட்சியைப் பொற்காலமாகக் கொண்டாடும் பார்வையையும் சமய இலக்கியங்கள் குறித்த பெருமிதங்களையும் கேள்விக்குள்ளாக்குகிறது. சாதிய ஒடுக்குமுறையை எதிர்த்த சித்தர்களையும் கவனப்படுத்துகிறது. விரிவான ஆதாரங்களால் வரலாற்றுத் தேடலுக்குப் பயன்படும் முக்கிய நூல்.

கோவில்களிடம் பெருமளவு நிலம் சேர்ந்தது எப்படி, அவை அரசிடமோ அறநிலையத் துறையிடமோ இல்லாதது ஏன், நில உச்சவரம்புச் சட்டத்திலிருந்து விலக்கு எதற்காக என்ற கேள்விகளுக்கு இந்த நூலில் பதில் கிடைக்கவில்லை. சில விஷயங்களைத் தெளிவுபடுத்துவதோடு, மேலும் ஆராய உதவும் நூல்களையும் சுட்டுகிறது. இருந்தாலும் அடிப்படைக் கேள்விகள் விடையின்றியே நிற்பது ஏமாற்றமளிக்கிறது.