2018-2019ஆம் ஆண்டுகளில் இந்து தமிழ் திசைப் பத்திரிகையில் 'காமதேனு' என்கின்ற ஆன்லைன் பத்திரிகை ஒன்றைத் தொடங்கினார்கள்.

அப்போது அதில்பணியாற்றிக்கொண்டிருந்த என் இனிய நண்பர் எழுத்தாளர் திரு.ராம்ஜி அவர்கள் என்னோடு தொலைபேசியில் தொடர்புகொண்டு, 'ஐயா, அச்சில் வராத ஆன்லைனில் வருகின்ற இந்தக் காமதேனு பத்திரிகையில் நீங்கள் எழுதவேண்டும்’ என்று சொன்னார். எனக்கு மிகுந்த மகிழ்ச்சி.

லேண்ட்லைனில் (பழைய டெலிபோன்) பேசிக்கொண்டிருந்த நான் ஆன்லைனில் எழுதத் தொடங்கினேன் (இப்போது நான் கொரோனா காலத்தில் ஆன்லைனில் பேசிக்கொண்டு இருக்கிறேன்) அவ்வாறு நான் எழுதத் தொடங்கிய கட்டுரைகள்தான் 'கற்றதைச் சொல்லவா? மற்றதையும் சொல்லவா?’ எனும் இச்சிறிய நூல்.இதில் சில செய்திகள் நான் மேடைகளில் பேசி நீங்கள் கேட்டிருக்கலாம். இருந்தாலும் எழுத்து வடிவில் வாசிக்கும் போது அது தனி இன்பத்தைத் தரும். இதோ இந்நூல் உங்கள் கையில்.

இந்நூலைக் கட்டுரை வடிவில் காமதேனுவில் என்னை எழுதத் தூண்டிய ஆசிரியர் திரு. அசோகன் அவர்களுக்கும். நண்பர் ராம்ஜி அவர்களுக்கும், இந்துத் தமிழ் திசை காமதேனு ஆசிரியர் மற்றும் நண்பர்களுக்கும் என் மனமார்ந்த நன்றிகள்.

இந்நூலும் வழக்கம்போல் எங்களது 'அமுதம் பதிப்பகம்’ வெளியீடாகவே வெளிவருகிறது. இந்நூலைப் படியுங்கள், படித்த செய்திகளை பகிர்ந்து கொள்ளுங்கள். பாராட்ட நினைத்தாலும், விமர்சிக்க நினைத்தாலும் என்னோடு தொடர்பு கொள்ளுங்கள்..

அன்புடன் கு. ஞானசம்பந்தன் Show more