Reviews for கடல்புரத்தில்

மனதுக்கு நெருக்கமான அருமையான நாவல். பிலோமியின் பாத்திரம் மிகவும் இயல்பாக அமைந்திருக்கிறது. மீனவ மக்களின் வாழ்க்கையை உணரச் செய்கிறது.

வண்ணநிலவனின் மிகச் சிறந்த நாவல்.

எதிர்பார்த்த அளவுக்கு நன்றாக இல்லை.

நகரவாசிகளுக்குப் பரிச்சயமில்லாத கடலோர மக்களின் வாழ்க்கையை நெருக்கமாக உணர வைக்கும் எழுத்து. வாசித்து முடித்த பின்னும் அந்தச் சூழல் மனதில் தங்குகிறது; பிலோமியும் நினைவில் நிற்கிறாள்.

தொடக்கத்தில் நடை கடினமாக இருந்தாலும் நல்ல படைப்பு. ஆழ்ந்து வாசிக்க வேண்டிய நூல்.

எழுபதுகளில் நடக்கும் கதையென்றாலும் இன்றைய வாழ்க்கையைப் பார்ப்பது போன்ற உணர்வு கிடைக்கிறது. ஒரு மீனவரின் வாழ்வை அருகிலிருந்து அறியும் நெருக்கம் இருக்கிறது. பிலோமி, சாமிதாஸ் இடையிலான அன்பில், விரும்பியவர் எங்கிருந்தாலும் நன்றாக இருக்க வேண்டும் என்ற எண்ணம் வெளிப்படுகிறது.

மணப்பாட்டிலேயே அமர்ந்து வண்ணநிலவன் கதை சொல்வதைக் கேட்பது போன்ற நெருக்கத்தைத் தருகிறது நாவல். கடினமான கடலோர வட்டார மொழியின்றி இருப்பதால் வாசிப்பு எளிதாகிறது. வேப்பங்காட்டூரிலிருந்து உடன்குடிக்கான தூரத்தை இருமுறை குறிப்பிடுவதையும், பனிக்கால வர்ணனைகள் திரும்பத் திரும்ப வருவதையும் தவிர்த்திருக்கலாம். இவை சிறிய குறைகள்.

மணப்பாடு மீனவர்களின் வாழ்க்கையையும் இடர்களையும் அவர்களது பேச்சுத் தொனியிலேயே காட்டுகிறது நாவல். மனிதர்களின் மறுபக்கங்களை நாசூக்காக விமர்சிக்கிறது. இழப்புக்குப் பிறகே அன்பின் ஆழம் புரிவதை உறவுகளின் வழியாக உணர்த்துகிறது. பிலோமி என்ன முடிவெடுப்பாள் என்ற ஆர்வத்தைத் தக்கவைக்கும் கதை, அவள் தெளிவாக வாழ்க்கையை எதிர்கொள்ளும் விதத்திலும் கவனம் பெறுகிறது.

குரூஸ் மிக்கேலின் குடும்பக் கதையாகத் தொடங்கி, பிலோமியின் வழியே கடலோர மக்களின் வாழ்க்கையை விரிக்கிறது நாவல். பாசமும் ஏமாற்றமும், புதுமையும் பழமையும், அன்பும் பகையும் அவர்களின் வாழ்வில் மோதுகின்றன. பலவிதமான தோல்விகளைச் சந்திக்கும் மனிதர்களின் மனப்போராட்டங்களே கதையின் மையம்.

மணப்பாடு கிராமத்தின் மணம் மாறாமல், பிலோமியின் குடும்பத்திலிருந்து கடல்சார் வாழ்வின் சிக்கல்கள் வரை இயல்பாக விரிகிறது கதை. உறவுகளின் அன்பும் நட்பும் ஏமாற்றங்களும் ஒரு நிலப்பரப்புக்குள் அடங்காத சமூக வாழ்வை உணர்த்துகின்றன. வல்லத்துக்கும் லாஞ்சிக்கும் இடையிலான வேறுபாடு காதலிலும் குறுக்கிடுவதைக் காட்டுகிறது. ரஞ்சியின் ஆறுதலும் பிலோமி வாழ்க்கையை ஏற்றுக்கொள்ளும் விதமும் குறிப்பிடத்தக்கவை. வாசிக்க வேண்டிய நாவல்.