Reviews for ஜெயகாந்தன் கதைகள்

வாழ்நாள் முழுவதும் பத்திரமாக வைத்துத் திரும்பத் திரும்ப வாசிக்க வேண்டிய தொகுப்பு. ஒவ்வொரு சிறுகதையும் வாசிப்பில் பிடிப்பை ஏற்படுத்துவதோடு, வெவ்வேறு கோணங்களில் சிந்திக்கவும் வைக்கிறது. அதுவே ஜெயகாந்தனின் வெற்றி.

ஜெயகாந்தன் மீண்டும் எழுத வரமாட்டாரா என்று ஏங்க வைக்கும் எழுத்து.

விகடனில் வெளியான இருபது கதைகளைக் கொண்ட இந்தத் தொகுப்பில் ஹீரோவுக்கு ஒரு ஹீரோயின், பிரளயம் ஆகியவை குறிப்பாகப் பிடிக்கின்றன. சமூகச் சடங்குகளையும் அவலங்களையும் ஜெயகாந்தன் கடுமையாக விமர்சிக்கிறார். பெண்ணியம், சுயமரியாதை, உறவுகள், திருமணத்தில் நிகழும் சுரண்டல், தனிமனிதச் சுதந்திரம் போன்ற பல விஷயங்களை அன்றே கதைகளில் பேசியிருப்பது குறிப்பிடத்தக்கது.

எழுதப்பட்ட காலத்தை நினைவூட்டுவதோடு நின்றுவிடாமல், இன்றைய வாழ்க்கைக்கும் பொருந்துகின்றன இந்தக் கதைகள். பிரளயம் கதையின் அம்மாசியும் சேரி மக்களும் எதிர்கொள்ளும் துயரம், 2015 சென்னை வெள்ளத்தை நினைவுக்குக் கொண்டுவருகிறது. பலதரப்பட்ட மனிதர்களுடன் நெருக்கத்தை ஏற்படுத்தும் எழுத்தில் உறவுகள், வாழ்க்கை நெறிகள், அவற்றிலிருந்து விலகுவதற்கான காரணங்கள், மரணம் குறித்த கேள்விகள் இடம் பெறுகின்றன. பழைய நினைவுகளை மட்டுமல்ல, எதிர்காலத்துக்கான சிந்தனையையும் தரும் தொகுப்பு.

ஆனந்த விகடனில் வெளியான கதைகளை அன்றைய விளம்பரங்கள், நகைச்சுவைகள், செய்தித் துணுக்குகளுடன் படிக்க முடிவதே இந்தப் பதிப்பின் சிறப்பு. பழைய இதழ்களிலிருந்து கதைகளைச் சேகரித்துப் படிக்கும் உணர்வைத் தருகிறது. கோபுலு, மாயாவின் ஓவியங்களும் எழுத்துக்குத் துணை நிற்கின்றன. இருபது கதைகளும் அருமை; குறிப்பாக விழுதுகள், ஹீரோவுக்கு ஒரு ஹீரோயின், சீசர் ஆகியவை கவனத்தை ஈர்க்கின்றன. ஜெயகாந்தனை வாசிக்கத் தொடங்குவோருக்கு அவரது சிறுகதைகள் நல்ல தேர்வு.