கணவனுக்கு தெரியாமல் எழுத்தாளராக இருக்கும் மனைவி கிருத்திகா... கதையில் இருந்து ஒரு டீசர் சமையலறை தான் அவள் உலகம்... சமைத்துக் கொண்டே இருந்தாள் கிருத்திகா... காலையில் இருந்து வேலையை இழுத்துப் போட்டுக் கொண்டே செய்து கொண்டு இருக்கின்றாள். அது அவளுக்கு பழகியும் விட்டது... ஹாலில் அவளது நாத்தனார் ராஜியோ அலைபேசியையே பார்த்துக் கொண்டு இருந்தாள். " எப்போ பார்த்தலும் ஃபோன் தானா? " என்று திட்டிக் கொண்டே கிருத்திகாவின் கணவன் சந்த்ருவோ ராஜிக்கு அருகே அமர , ராஜியோ , " அண்ணா கதை வாசிச்சுட்டு இருக்கேன்... " என்றாள். அவனோ , " என்னடி எப்போ பார்த்தாலும் கதை கதைன்னே சொல்லிட்டு இருக்க?? " என்று சீறிக் கொண்டே அலைபேசியை பிடுங்க , " ஐயோ கொடுங்க செம்ம இன்டெரெஸ்ட் ஆஹ் இருக்கு " என்று சொல்லிக் கொண்டே மீண்டும் அலைபேசியை பறித்து எடுத்தாள். " அப்படி யாரோட கதையை விழுந்து விழுந்து வாசிக்கிற ?? " என்று அவன் கேட்க , " ரைட்டர் ஜென்சி... எவ்ளோ சூப்பரா இருக்கு தெரியுமா? ஹீரோ பேர் கூட சந்த்ரூ தான் " என்று சொன்னதுமே சமையலறைக்குள் நின்ற கிருத்திகாவுக்கு புரையேறியது... தலையில் தட்டிக் கொண்டே டீயை போட்டு முடித்தவன் ஹாலினுள் எல்லோருக்கும் கொடுத்தாள். அவள் மாமியார் கமலமோ , " கல்யாணம் கட்டி ஒரு வருஷம் ஆக போகுது.. இன்னும் வயித்துல ஒரு புழு பூச்சி கூட இல்ல " என்று திட்ட , அவள் பதில் சொல்லவில்லை... தலையை குனிந்து கொண்டே டீயை எல்லோருக்கும் கொடுத்து விட்டு கடைசியாக சந்தரூவிடம் நீட்ட அவனும் அவளை ஏறிட்டுப் பார்க்காமலே எடுத்து வாயில் வைத்தான். இதெல்லாம் அவளுக்கு பழகிப் போன ஒன்று தான். மீண்டும் சமையலறைக்குள் சென்று விட்டாள். சமையல் கட்டில் இரு கைகளையும் வைத்துக் கொண்டே கண்களை மூடி திறந்தாள். கல்யாணம் என்று பெயர் மட்டும் தான். இருட்டினுள் எண்ணி நான்கைந்து தடவை தாம்பத்தியம் நடந்து இருக்கும்... அது கூட அவன் எப்போவாவது குடித்து விட்டு நிதானம் இல்லாமல் மேலே பாய்ந்து இருப்பான்... அவள் முகத்தை கூட அவன் பார்த்து பேசியது இல்லை... ஏதாவது அவளாக கேட்க போனால் எகிறிப் பாய்ந்து பதில் சொல்வான்... வெறுத்தே போய் விட்டது. எதிர்பார்த்து ஏமாந்து இப்போது எதிர்பார்ப்பதை நிறுத்தி விட்டாள். பெருமூச்சுடன் மீண்டும் சமைக்க தொடங்க , " இந்த ரைட்டர நான் ஒரு நாளைக்கு பார்க்கணும்... எவ்ளோ.அழகா எழுதுறாங்க. " என்று சொன்னாள் ராஜி. " ஆம்பிளையா இருக்க போறான் டி " என்றான் சந்த்ரூ. " ஏன் பொண்ணுங்க எழுத மாட்டாங்களா? " என்று அவள் கேட்க , " எந்த பொண்ணுக்கு கதை எழுதுற அளவுக்கு திறமை இருக்கு?? கரண்டி பிடிக்கிறவங்க பேனா பிடிச்சுட முடியாது... வேணும்னா உன் அண்ணியை கூப்பிட்டு அவ பேரை எழுத சொல்லு பார்ப்பம்.. அதுவே தப்பு தப்பா தான் எழுதுவா... " என்று இளக்காரமாக வந்தது அவன் வார்த்தைகள்... இதனை சமையலறைக்குள் இருந்து கேட்ட கிருத்திகாவுக்கு சுள்ளென்று தைத்தது... என்ன மாதிரியான வார்த்தைகள் அவை??