முழு நீள காமெடி அண்ட் ரொமான்டிக் நாவல்.. அதில் இருந்து ஒரு டீசர்

தந்தையையும் அண்ணனையும் தவிர ஆண்களுடன் அவள் பழகியது குறைவு தான்.. அதுவும் முதல் இரவன்று இப்படி குட்டியாக ஷார்ட்ஸை மட்டும் அணிந்தபடி அவன் இருந்தது அவளுக்கு மிகவும் சங்கடமாகி தான் போனது. தலையை குனிந்தபடி அமர்ந்தவளிடம், "அப்புறம் சொல்லு" என்று சொல்ல, அவளோ, "என்ன சொல்ல?" என்று கேட்டாள். அவனோ, "சொல்ல ஒண்ணும் இல்லன்னா கேளு… என்னை பத்தி தான் உனக்கு எதுவும் தெரிஞ்சு இருக்காதுல்ல" என்று உரைக்க, அவளை அப்போது தான் மெதுவாக ஏறிட்டுப் பார்த்தவள், "நிறைய தெரியும்" என்றாள். அவனோ புருவம் சுருக்கி அவளைப் பார்த்தவன், "என்ன தெரியும்?" என்று கேட்க, குரலை செருமியவள் அடர்ந்து வளர்ந்து இருந்த தாடியையும் மீசையையும் பார்த்துக் கொண்டே, "இந்த தாடிக்கு காரணம் என்னன்னு தெரியும்" என்று சொன்னாள். இந்திரவர்மனும் அவளை மேலிருந்து கீழ் விசித்திரமாக பார்த்து விட்டு தனது முகத்தை அங்கிருந்த நிலைக்கண்ணாடியில் எட்டி பார்த்தவன், "தாடிக்கு காரணமா? கலர்ஸுக்கு வச்ச தாடி தானே" என்று நினைத்துக் கொண்டவன், "ம்ம் அப்புறம்" என்றான். "நீங்க சொல்லலைன்னாலும் நீங்க படுற கஷ்டம் தெரியும்" என்று சொல்ல, அவளை மீண்டும் விசித்திரமாக பார்த்தவன், "என்ன கஷ்டம்?" என்று கேட்டான். "ஊரெல்லாம் கடன் வாங்கி இருக்கீங்களாம்னு கேள்விப்பட்டேன்.. கவலைப்படாதீங்க,..எனக்கு சென்னைல வேலை கிடைச்சு இருக்கு.. அதுல வர்ற பணத்துல சிக்கனமா வாழ்ந்து உங்க கடனை அடைச்சுடலாம்" என்று சொல்ல, அவனோ இரும ஆரம்பித்து விட்டான். தலையில் தட்டிக் கொண்டே, குரலை செருமியவனோ அருகே இருந்த நீரை அருந்திக் கொண்டே, "எங்க வேலை கிடைச்சு இருக்கு?" என்று கேட்டான். "நான் என்ன படிச்சு இருக்கேன்னு தெரியுமா?" என்று கேட்க, அவனோ, "தெரியல சொல்லு" என்றான் உணர்ச்சி துடைக்கப்பட்ட குரலில். "பி ஈ படிச்சு இருக்கேன். எனக்கு ஐ வி பில்டர்ஸ்ல டிசைன் பிரான்ச் ல வேலை கிடைச்சு இருக்கு.. அதுவும் இன்டெர்வியூ கூட வைக்காம.. அப்படின்னா நான் எவ்ளோ பெரிய புத்திசாலியா இருப்பேன்னு நினச்சு பாருங்க" என்று சொல்ல, அவளை மேலிருந்து கீழ் பார்த்தவன், "ம்ம் நீ ரொம்ப புத்திசாலின்னு எனக்கு இப்போ தெளிவா புரிஞ்சு போச்சு" என்று சொன்னான். அவளோ, "தேங்க்ஸ்" என்று சொல்ல, அவனோ, "க்கும்" என்று மனதுக்குள் சொல்லிக் கொண்டவன், "என்ன பத்தி வேற என்ன தெரியும்?" என்று கேட்டான். அவனை ஏறிட்டுப் பார்த்தவள், "கல்யாணம் தான் வாழ்க்கை.. காதல் எல்லாம் மறந்திடணும்," என்று சொல்ல, அவனோ பெருமூச்சுடன், "இதுக்கு என்ன கதை வச்சு இருக்கான்னு தெரியலையே" என்று நினைத்துக் கொண்டே, அவளை யோசனையாக பார்க்க, "உங்க மனசோட வலி எனக்கு தெரியும்.. எல்லாத்தையும் மறந்திடுங்க, நான் இருக்கேன்.. உங்களுக்காக காலம் பூரா இருப்பேன்" என்று சொல்ல, "இந்த அம்மாவை நம்பி பொண்ணு பார்க்க சொன்னது என் தப்பு தான்.. பொண்ண பார்க்க சொன்னா பைத்தியத்தை பார்த்து வச்சு இருக்காங்க" என்று நினைத்துக் கொண்டே, "ரொம்ப சந்தோசம்" என்றான். அவளோ, "பதினோரு மணிக்கு தான் முகூர்த்தமாம், அது வரைக்கும் என்ன பண்ணலாம்?" என்று கேட்க, அவனோ, "நீ தூங்கு, ஊருக்கு போய் பார்த்துக்கலாம்" என்றான் எரிச்சலாக. அவள் மனமோ, "நித்யா சொன்ன போல இவருக்கு முடியாதோ?" என்று நினைத்தவள், "டாக்டர் கிட்ட போகலாமா?" என்று கேட்டாள். அவனோ, "எதுக்கு?" என்று யோசனையாக கேட்க, அவளோ, "இப்போ நிறைய டெக்னலாஜி வளர்ந்து இருக்கு, அது முடியலைன்னா, குழந்தையை தத்தெடுத்து எடுத்து வளர்த்துக்கலாம்" என்று சொல்ல, அவளை அதிர்ந்து பார்த்தவனுக்கோ அத்தனை கோபம். "அடிப்பாவி, என்னை எப்படி எல்லாம் நினச்சு இருக்கா இவ" என்று நினைத்தவனுக்கோ நிலை கொள்ள முடியவே இல்லை. முதலிரவு அன்று அவளிடம் கோபப்பட கூடாது என்று நினைத்தவனோ, "அத அப்புறம் பார்த்துக்கலாம், இப்போ படு" என்று சொல்லி விட்டு லேப்டாப்பை எடுக்க, அவளோ, "நித்யா சொன்னது உண்மை தான் போல, படுக்க சொல்றாரே.." என்று பெருமூச்சுடன் சொன்னவள் மறுபக்கம் நடந்து வந்து படுத்துக் கொண்டாள். இடையில் என்ன நினைத்தாளோ தெரியவில்லை, அவனை திரும்பி பார்த்தவள், "இங்க தான் வீடியோக்காரங்க இல்லையே.. எல்லாத்தையும் கழட்டிட்டு ப்ரீயா இருக்கலாமே" என்று சொல்ல, அவனோ, "வாட்?" என்று அதிர்ந்தே விட்டான். அவள் சொன்னது என்னவோ அவன் தலையில் இருப்பது டோப்பா என்று நினைத்துக் கொண்டு தான்.. ஆனால் உண்மையான முடியை உடையவனோ நினைத்தது என்னவோ ஷார்ட்ஸ்சை தான்..